പാക് അധീന കശ്മീരിൽ പ്രതിഷേധക്കാർക്ക് നേരെ വെടിയുതിർത്ത് പാക് സൈന്യം; 6 പേർ കൊല്ലപ്പെട്ടു

റാവലക്കോട്ട്: പാക് അധീന കശ്മീരിലെ റാവലക്കോട്ടിൽ പ്രതിഷേധക്കാർക്ക് നേരെ പാകിസ്താൻ സുരക്ഷാ സേന നടത്തിയ വെടിവെപ്പിൽ ആറ് സാധാരണക്കാർ കൊല്ലപ്പെട്ടു. പ്രദേശത്തെ പുതിയ ബസ് ടെർമിനലിന് സമീപം ഉണ്ടായ സംഘർഷത്തെത്തുടർന്നാണ് സേന വെടിയുതിർത്തത്. ഇതോടെ മേഖലയിൽ പാക് ഭരണകൂടത്തിനെതിരെയുള്ള ജനരോഷം കൂടുതൽ ശക്തമായിരിക്കുകയാണ്. സുധ്‌നോതി ജില്ലയിലുണ്ടായ സംഘർഷത്തിൽ കൊല്ലപ്പെട്ടവരിൽ നാലുപേരെ തിരിച്ചറിഞ്ഞിട്ടുണ്ട്. ഈ സംഘർഷത്തിന് തലേദിവസം അമേരിക്കയിലെ വൈറ്റ് ഹൗസിന് മുന്നിൽ പാക് അധീന കശ്മീർ സ്വദേശികൾ വലിയ പ്രതിഷേധം സംഘടിപ്പിച്ചിരുന്നു. കശ്മീരിലെ മനുഷ്യാവകാശ പ്രതിസന്ധിയിൽ അന്താരാഷ്ട്ര ഇടപെടൽ വേണമെന്നും, ജനവാസ മേഖലകളിൽ നിന്ന് പാക് സൈന്യത്തെ പിൻവലിക്കണമെന്നും ആവശ്യപ്പെട്ടായിരുന്നു പ്രതിഷേധം.

സഹായത്തിനായി ഇന്ത്യ ഇടപെടണമെന്നും, മാനുഷിക പരിഗണന മുൻനിർത്തി പൂഞ്ച്, ദോഡ സെക്ടറുകളിലൂടെ നിയന്ത്രണരേഖ തുറന്നുകൊടുക്കണമെന്നും അവർ അഭ്യർത്ഥിച്ചു. മേഖലയിലെ നാല് ദശലക്ഷത്തോളം ആളുകൾ മാസങ്ങളായി ഇന്റർനെറ്റ് വിച്ഛേദിക്കപ്പെട്ട അവസ്ഥയിലാണെന്നും അവർ ചൂണ്ടിക്കാട്ടി.

സംഭവത്തിൽ പാകിസ്താനെതിരെ ഇന്ത്യ കടുത്ത ഭാഷയിൽ പ്രതികരിച്ചു. പാക് അധീന കശ്മീരിലെ നിലവിലെ സംഘർഷങ്ങൾ പാകിസ്താൻ പതിറ്റാണ്ടുകളായി നടത്തിവരുന്ന വ്യവസ്ഥാപിതമായ ചൂഷണത്തിന്റെയും ഭരണകൂട പീഡനത്തിന്റെയും ഫലമാണെന്ന് വിദേശകാര്യ മന്ത്രാലയ വക്താവ് രൺധീർ ജയ്സ്വാൾ പറഞ്ഞു. ജനങ്ങളുടെ ന്യായമായ ആവശ്യങ്ങൾ പരിഗണിക്കുന്നതിന് പകരം സൈനിക ശക്തി ഉപയോഗിച്ച് സ്ത്രീകളെയും കുട്ടികളെയും ഉൾപ്പെടെ അടിച്ചമർത്താനാണ് പാകിസ്താൻ ശ്രമിക്കുന്നതെന്നും ഇന്ത്യ കുറ്റപ്പെടുത്തി. ഈ വിഷയത്തിൽ പാകിസ്താനെ അന്താരാഷ്ട്ര സമൂഹം ഉത്തരവാദികളാക്കണമെന്നും ഇന്ത്യ ആവശ്യപ്പെട്ടു.

മേഖലയിലെ സാമ്പത്തികാവസ്ഥ അതീവ ഗുരുതരമാണെന്ന് റിപ്പോർട്ടുകൾ സൂചിപ്പിക്കുന്നു. 2025-ൽ പുറത്തുവന്ന പഠനങ്ങൾ പ്രകാരം പാക് അധീന കശ്മീരിലെ 57 ശതമാനത്തിലധികം കുടുംബങ്ങൾ ഭക്ഷ്യക്ഷാമം നേരിടുന്നുണ്ട്. കൃഷിയെ ആശ്രയിച്ചു കഴിയുന്ന ജനവിഭാഗങ്ങൾക്കിടയിൽ പോഷകാഹാരക്കുറവും ശിശുമരണ നിരക്കും വർദ്ധിച്ചു വരുന്നത് വലിയ ആശങ്കയുണ്ടാക്കുന്നുണ്ട്.

Content Highlights: Six civilians killed by Pakistani security forces in Rawalakot., Protests erupted against systematic exploitation and military oppression., India officially condemned the violence, citing decades of state-sponsored abuse., Over 57% of families in PoK face severe food shortages as of 2025 reports., Protesters demand international intervention and restoration of internet access.