ട്രംപിനെ ബോധവൽകരിക്കാനൊരുങ്ങി നെതന്യാഹു; പിക്ആക്സ് മൗണ്ടനിലെ ഇറാന്റെ ആണവപ്രവർത്തനങ്ങളിൽ ചർച്ച

മോസ്‌കോ: ഇറാന്റെ ആണവ പ്രവർത്തനങ്ങളെക്കുറിച്ച് ചർച്ച ചെയ്യുന്നതിനായി അമേരിക്കൻ പ്രസിഡന്റ് ഡൊണാൾഡ് ട്രംപുമായി നിർണായകമായ കൂടിക്കാഴ്ചയ്‌ക്കൊരുങ്ങി ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു. നയതന്ത്ര പരിഹാരങ്ങൾക്കായി ശ്രമിക്കുന്നുവെന്ന ഇറാന്റെ അവകാശവാദങ്ങൾ തെറ്റാണെന്നും, അവർ രഹസ്യമായി പിക്ആക്‌സ് മൗണ്ടൻ എന്നറിയപ്പെടുന്ന മലനിരകളിലേക്ക് ആണവ ഉപകരണങ്ങൾ മാറ്റുകയാണെന്നുമാണ് നെതന്യാഹുവിന്റെ വാദം.

നയതന്ത്രപരമായ ഒരു പരിഹാരത്തിന് ഇറാൻ ആത്മാർത്ഥമായി ശ്രമിക്കുന്നില്ല എന്ന് ട്രംപിനെ ബോധ്യപ്പെടുത്തുന്നതിനായി ഇസ്രയേലിന്റെ പക്കലുള്ള തെളിവുകൾ നെതന്യാഹു അദ്ദേഹത്തിന് മുന്നിൽ അവതരിപ്പിക്കുമെന്ന് ഒരു ഇസ്രയേലി ഉറവിടത്തെ ഉദ്ധരിച്ച് ന്യൂയോർക്ക് പോസ്റ്റ് റിപ്പോർട്ട് ചെയ്തു. ആണവ അടിസ്ഥാന സൗകര്യങ്ങൾ ഇറാൻ അടുത്തിടെ പിക്ആക്‌സ് മൗണ്ടനിലേക്ക് മാറ്റിയതും ഇതിനുള്ള പ്രധാന തെളിവായി ഇസ്രയേൽ ചൂണ്ടിക്കാട്ടുന്നു.

യുഎസും ഇറാനും തമ്മിൽ ധാരണാപത്രം ഒപ്പിട്ടതിന് തൊട്ടുപിന്നാലെ ഇറാൻ പിക്ആക്‌സ് മൗണ്ടൻ സമുച്ചയത്തിലേക്ക് സെൻട്രിഫ്യൂജുകൾ മാറ്റിയതായി ഇസ്രയേലിന് തെളിവ് ലഭിച്ചിട്ടുണ്ടെന്ന് വാൾസ്ട്രീറ്റ് ജേണൽ നേരത്തെ റിപ്പോർട്ട് ചെയ്തിരുന്നു. നേരത്തെ ഈ മേഖലയിൽ വലിയ തോതിലുള്ള പ്രവർത്തനങ്ങൾ ഇല്ലെന്ന് കരുതിയിരുന്ന ട്രംപ്, പുതിയ വിവരങ്ങളുടെ അടിസ്ഥാനത്തിൽ കടുത്ത നിലപാടുകളിലേക്ക് മാറുന്നതായും സൂചനകളുണ്ട്.

2020-ൽ ഇറാൻ രഹസ്യമായി നിർമ്മാണം ആരംഭിച്ച പിക്ആക്‌സ് മൗണ്ടനിലെ ഈ ഭൂഗർഭ സമുച്ചയം നതാൻസ് ആണവ നിലയത്തിന് 1.5 കിലോമീറ്റർ തെക്കായാണ് സ്ഥിതി ചെയ്യുന്നത്. കഴിഞ്ഞ ഇറാൻ യുദ്ധസമയത്ത് നതാൻസ് കേന്ദ്രം പലതവണ ആക്രമിക്കപ്പെട്ടിരുന്നു.

ഇറാൻ തങ്ങളുടെ ആണവ പദ്ധതി വികസിപ്പിക്കാൻ ഈ കേന്ദ്രം ഉപയോഗിക്കുന്നുണ്ടെന്നതിന് മതിയായ തെളിവുകൾ ഇല്ലാത്തതുകൊണ്ടാണ് മുൻപ് നടന്ന സംഘർഷ സമയത്ത് പിക്ആക്‌സ് മൗണ്ടനെ ലക്ഷ്യം വെക്കാതിരുന്നതെന്നാണ് ട്രംപ് നേരത്തെ പറഞ്ഞത്. എന്നാൽ, കഴിഞ്ഞയാഴ്ച ലെബനീസ് പ്രസിഡന്റ് ജോസഫ് ഔനുമായി നടത്തിയ കൂടിക്കാഴ്ചയിൽ, ഇവിടെ ആക്രമണം നടത്തുമെന്ന് ട്രംപ് പറഞ്ഞിരുന്നു.

നിലവിൽ, ഹോർമുസ് കടലിടുക്കിലെ ഇറാന്റെ ആക്രമണങ്ങൾ അവസാനിപ്പിക്കുന്നത് ലക്ഷ്യമിട്ടുള്ള പുതിയ ചർച്ചകൾ ഉയർന്നുവന്നതിനെത്തുടർന്ന്, രണ്ടാഴ്ചയോളം നീണ്ടുനിന്ന ബോംബാക്രമണം ട്രംപ് ശനിയാഴ്ചയോടെ നിർത്തിവെച്ചിട്ടുണ്ട്. പിക്ആക്‌സ് മൗണ്ടനിലെ ഇറാന്റെ പ്രവർത്തനങ്ങളെക്കുറിച്ച് ചർച്ച ചെയ്യുന്നതിനൊപ്പം, ഇറാന്റെ നിഴൽ സൈന്യങ്ങൾ (proxies) പ്രവർത്തിക്കുന്ന ലെബനനിലും ഗാസയിലും വെടിനിർത്തൽ നിലനിർത്താനുള്ള ശ്രമങ്ങളെക്കുറിച്ചും നെതന്യാഹു ട്രംപിനെ അറിയിക്കും.

ചൊവ്വാഴ്ചയും നെതന്യാഹു വാഷിങ്ടണിൽ തുടരും. അന്തരിച്ച സെനറ്റർ ലിൻഡ്‌സി ഗ്രഹാമിന് ആദരാഞ്ജലികൾ അർപ്പിക്കുന്ന ചടങ്ങിൽ ട്രംപിനും മറ്റ് ലോക നേതാക്കൾക്കുമൊപ്പം അദ്ദേഹം പങ്കെടുക്കും.

Content Highlights: Netanyahu to present evidence of Iran's nuclear activity at Pickaxe Mountain to Trump. Iran allegedly moved centrifuges to the underground site post-MOU. Trump considers potential military action against the Pickaxe Mountain complex. Discussions to cover ceasefire efforts in Lebanon and Gaza alongside Iran's nuclear status.