അടിച്ചും തിരിച്ചടിച്ചും ഇസ്രയേലും ഹിസ്ബുള്ളയും; ലെബനനില്‍ 24-ഉം ഇസ്രയേലിൽ ഏഴുപേരും കൊല്ലപ്പെട്ടു
ടെല്‍ അവീവ്: വടക്കന്‍ ഇസ്രയേലില്‍ ഹിസ്ബുള്ള നടത്തിയ വ്യോമാക്രമണത്തില്‍ ഏഴു പേര്‍ കൊല്ലപ്പെട്ടതായി ഐഡിഎഫ്. ഇരുപക്ഷവും തമ്മിലുള്ള യുദ്ധം ആരംഭിച്ചതിനു ശേഷമുള്ള ഹിസ്ബുള്ളയുടെ ഭാഗത്തു നിന്നുള്ള ഏറ്റവും വലിയ വ്യോമാക്രമണമാണെന്ന് ഇസ്രയേല്‍ പ്രതിരോധ സേനയുടെ വാദം.
ആക്രമണത്തില്‍ കൊല്ലപ്പെട്ട ഏഴുപേരില്‍ നാലു പേര്‍ വിദേശികളാണ്. അതേസമയം ഹിസ്ബുള്ളയെ ലക്ഷ്യംവെച്ച് ഇസ്രയേല്‍ ലെബനനില്‍ വ്യാഴാഴ്ച അർദ്ധരാത്രി നടത്തിയ വ്യോമാക്രമണത്തില്‍ 24 പേര്‍ കൊല്ലപ്പെട്ടതായി ലെബനന്‍ ആരോഗ്യ മന്ത്രാലയത്തെ ഉദ്ധരിച്ചുകൊണ്ട് അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു.
ഇസ്രയേലിലെ വടക്കേ അറ്റത്തുള്ള നഗരമായ മെറ്റൂലയിലെ കൃഷി ഭൂമിയിലേക്കാണ് ലെബനനില്‍ നിന്നുള്ള റോക്കറ്റുകള്‍ പതിച്ചത്. ആക്രമണത്തില്‍ നാല് തായ് തൊഴിലാളികളും ഒരു ഇസ്രയേല്‍ കര്‍ഷകനും കൊല്ലപ്പെട്ടു. ആക്രമണം നടന്ന് മണിക്കൂറുകള്‍ക്കു ശേഷം ഇസ്രയേലി തീര നഗരമായ ഹൈഫയിലേക്കും ലെബനനില്‍ നിന്ന് 25 റോക്കറ്റുകളോളം പതിച്ചതായി ഇസ്രയേല്‍ സൈന്യം റിപ്പോര്‍ട്ട് ചെയ്തു. ഈ അക്രമണത്തില്‍ 30 വയസ്സുകാരനും 60 വയസ്സുകാരിയും കൊല്ലട്ടതായുംറിപ്പോര്‍ട്ടുകളുണ്ട്.
യുദ്ധഭൂമിയായ വടക്കന്‍ ഗാസയില്‍ പ്രവര്‍ത്തിച്ചിരുന്ന അവസാന ആരോഗ്യ കേന്ദ്രമായിരുന്ന കമല്‍ അദ്വാന്‍ ആശുപത്രിയും വ്യാഴാഴ്ച്ച നടന്ന ഇസ്രയേല്‍ ആക്രമണത്തില്‍ തകര്‍ന്നു. ലോകാരോഗ്യ സംഘടന വിതരണം ചെയ്തിരുന്ന അത്യാവശ്യ മെഡിക്കല്‍ ഉപകരണങ്ങള്‍ ഉള്‍പ്പടെ സൂക്ഷിച്ചിരുന്ന ആശുപത്രിയാണ് ഇസ്രയേല്‍ തകര്‍ത്തത്.
വ്യാഴാഴ്ച 90-ഓളം റോക്കറ്റുകളുടെ ആക്രമണം ലെബനനില്‍ നിന്ന് ഇസ്രയേലിനു നേരെ നടന്നതായായി ഇസ്രയേലും അവകാശപ്പെടുന്നുണ്ട്. ലെബനനില്‍ 24 മണിക്കൂറിനിടെ ഇസ്രയേല്‍ നടത്തിയ ആക്രമണത്തില്‍ 45 പേര്‍ കൊല്ലപ്പെടുകയും 110-ഓളം പേര്‍ക്ക് ഗുരുതരമായി പരിക്കേറ്റതായും ലബനീസ് ആരോഗ്യ മന്ത്രാലയം അറിയിച്ചു.
Content Highlights: Hezbollah launched a rocket attack in northern Israel,Israel airstrikes in Lebanon, killing 24