ഹിസ്ബുള്ളയുടെ 'മഹാനായ ജിഹാദി കമാന്ഡര്', ആരാണ് ഇസ്രയേല് വധിച്ച ഹൈതം അലി തബ്തബായി?
ജറുസലേം: ലെബനന്റെ തലസ്ഥാനമായ ബയ്റുത്തിൽ നടത്തിയ വ്യോമാക്രമണത്തിലൂടെ ഹിസ്ബുള്ളയുടെ ചീഫ് ഓഫ് സ്റ്റാഫ് ഹൈതം അലി തബ്തബായിയെ വധിച്ചതായി ഇസ്രയേൽ അവകാശപ്പെട്ടതിന് പിന്നാലെ തബ്തബായിയുടെ മരണം ഹിസ്ബുള്ള സ്ഥിരീകരിച്ചു. മുതിർന്ന കമാൻഡറെ ലക്ഷ്യമിട്ടായിരുന്നു ഇസ്രയേലിന്റെ ആക്രമണം. ഹിസ്ബുള്ളയെ പുനഃസംഘടിപ്പിക്കാൻ ഹൈതം അലി ശ്രമിച്ചെന്നാണ് ഇസ്രയേൽ ആരോപണം. 2016-ൽ ഇയാൾക്കുമേൽ യുഎസ് ഉപരോധമേർപ്പെടുത്തിയിരുന്നു. ഹിസ്ബുള്ള സകലപരിധിയും ലംഘിച്ചെന്നാരോപിച്ചാണ് ഞായറാഴ്ച തെക്കൻ ബയ്റുത്തിലെ ഹാരെത് ഹ്രെയ്കിലുള്ള ഒൻപതുനില അപ്പാർട്ട്മെന്റിനുനേരേ ഇസ്രയേൽ സൈന്യം ആക്രമണം നടത്തിയത്.
ആക്രമണത്തിൽ അഞ്ചുപേർ മരിക്കുകയും 28 പേർക്ക് പരിക്കേൽക്കുകയും ചെയ്തു. ലെബനനിൽ ഹിസ്ബുള്ളയും ഗാസയിൽ ഹമാസും വീണ്ടും സംഘം ചേരുന്നത് തടയാൻ വേണ്ടതെല്ലാം ഇസ്രയേൽ ചെയ്യുമെന്ന് പ്രധാനമന്ത്രി ബെഞ്ചമിൻ നെതന്യാഹു ഞായറാഴ്ച പറഞ്ഞതിനുപിന്നാലെയാണ് ആക്രമണം നടത്തിയത്. കെട്ടിടത്തിന്റെ മൂന്നും നാലും നിലകൾ ലക്ഷ്യമിട്ട് മൂന്ന് മിസൈലാണ് ഇസ്രയേൽ അയച്ചത്. 2024 നവംബറിൽ വെടിനിർത്തൽ നിലവിൽവന്നശേഷം ഹിസ്ബുള്ളയുടെ ശക്തികേന്ദ്രംകൂടിയായ ഈ മേഖലയിൽ ഇസ്രയേൽ നടത്തുന്ന അഞ്ചാമത്തെ ആക്രമണമാണിത്. ലിയോ പതിന്നാലാമൻ മാർപാപ്പ ലെബനൻ സന്ദർശിക്കാൻ ആഴ്ചകൾ ശേഷിക്കുന്ന പശ്ചാത്തലത്തിൽക്കൂടിയാണ് ആക്രമണം.
"തന്റെ അനുഗൃഹീത ജീവിതത്തിന്റെ അവസാനനിമിഷം വരെ ഇസ്രയേലി ശത്രുവിനെ നേരിടാൻ പ്രവർത്തിച്ച മഹാനായ ജിഹാദി കമാൻഡർ" എന്ന് ഹിസ്ബുള്ള അദ്ദേഹത്തെ വിശേഷിപ്പിച്ചതായി വാർത്താ ഏജൻസിയായ റോയിട്ടേഴ്സ് റിപ്പോർട്ട് ചെയ്തു. 2023-24ലെ തീവ്രമായ യുദ്ധം അവസാനിപ്പിച്ച് യുഎസ്-മധ്യസ്ഥതയിലുള്ള വെടിനിർത്തലിന് ഏകദേശം ഒരു വർഷത്തിന് ശേഷമാണ് തബ്തബായിയുടെ വധം. യുദ്ധസമയത്ത്, ഇറാൻ പിന്തുണയുള്ള ഹിസ്ബുള്ള ഗ്രൂപ്പിന്റെ മുതിർന്ന നേതാക്കളിൽ ഭൂരിഭാഗത്തെയും ഇസ്രയേൽ ഇല്ലാതാക്കിയിരുന്നു. സംഘർഷത്തെ അതിജീവിച്ച ശേഷിക്കുന്ന ചുരുക്കം നേതാക്കളിൽ ഒരാളായിരുന്ന തബ്തബായി, റദ്വാൻ ഫോഴ്സിലും യുദ്ധകാല പ്രവർത്തനങ്ങളിലും പ്രധാന പങ്ക് വഹിച്ചിട്ടുണ്ട്.
1980-കളിൽ തബ്തബായി ഹിസ്ബുള്ളയിൽ ചേർന്നതായും പിന്നീട് എലൈറ്റ് റദ്വാൻ ഫോഴ്സ് ഉൾപ്പെടെ നിരവധി പ്രധാന സ്ഥാനങ്ങൾ വഹിച്ചതായും ഇസ്രയേൽ സൈന്യം പറഞ്ഞു. ഇസ്രയേൽ ലെബനനിലേക്ക് കരയാക്രമണം ആരംഭിക്കുന്നതിന് മുമ്പായി മിക്ക റദ്വാൻ കമാൻഡർമാരും കൊല്ലപ്പെട്ടിരുന്നു. 2023-24 യുദ്ധകാലത്ത് ഹിസ്ബുള്ളയുടെ ഓപ്പറേഷൻസ് വിഭാഗത്തിന്റെ മേൽനോട്ടം വഹിച്ചത് തബ്തബായി ആയിരുന്നു. മുതിർന്ന കമാൻഡർമാർ കൊല്ലപ്പെട്ടതോടെ അദ്ദേഹം സംഘടനാ തലത്തിൽ മുകളിലേക്ക് ഉയർന്നു കൊണ്ടിരുന്നുവെന്ന് ഇസ്രയേൽ പറഞ്ഞു.
1968-ൽ ലെബനനിലാണ് തബ്തബായി ജനിച്ചത്. അദ്ദേഹം ഹിസ്ബുള്ളയുടെ സ്ഥാപക സംഘത്തിന്റെ ഭാഗമായിരുന്നില്ല, എന്നാൽ സംഘടനയുടെ രണ്ടാം തലമുറയിൽ പെട്ടയാളായിരുന്നു. സിറിയയിലെയും യെമനിലെയും പ്രാദേശിക യുദ്ധങ്ങളിൽ സഖ്യസേനയ്ക്കൊപ്പം തബ്തബായി പങ്കെടുത്തു. വെടിനിർത്തൽ പ്രാബല്യത്തിൽ വന്നതോടെ തബ്തബായിയെ ഹിസ്ബുള്ളയുടെ ചീഫ് ഓഫ് സ്റ്റാഫായി നിയമിച്ചു. ഈ പദവിയിലിരുന്ന് ഇസ്രയേലുമായുള്ള യുദ്ധത്തിന് സംഘടനയുടെ ശേഷി പുനഃസ്ഥാപിക്കാൻ തബ്തബായി പ്രവർത്തിച്ചു എന്ന് ഇസ്രയേൽ സൈന്യം പറഞ്ഞു.
തബ്തബായിയുടെ ദ്രുതഗതിയിലുള്ള വളർച്ച ലെബനീസ് സുരക്ഷാ ഉദ്യോഗസ്ഥനും സ്ഥിരീകരിച്ചു. ഹിസ്ബുള്ളയുടെ ഉന്നത തലങ്ങളിൽ നഷ്ടങ്ങൾ വർദ്ധിച്ചതോടെ കഴിഞ്ഞ ഒരു വർഷത്തിനിടെയാണ് അദ്ദേഹം ഏറ്റവും ഉയർന്ന സൈനിക പദവിയിലേക്ക് ഉയർത്തപ്പെട്ടതെന്ന് അദ്ദേഹം ചൂണ്ടിക്കാട്ടി. സിറിയയിലും കഴിഞ്ഞ വർഷം ലെബനനിലുണ്ടായ യുദ്ധസമയത്തും തനിക്കെതിരെ ഇസ്രയേൽ നടത്തിയ നിരവധി വധശ്രമങ്ങളെ തബ്തബായി അതിജീവിച്ചിരുന്നുവെന്ന് സുരക്ഷാ ഗവേഷണ ഗ്രൂപ്പായ അൽമ സെന്റർ പറഞ്ഞു. അവസാനത്തെ ആക്രമണമാണ് ഒടുവിൽ അദ്ദേഹത്തെ കൊലപ്പെടുത്തിയതെന്ന് വാർത്താ ഏജൻസി റിപ്പോർട്ട് ചെയ്തു.
2023 ഒക്ടോബർ ഏഴുമുതൽ ഗാസയിൽ ഇസ്രയേലുമായി ഏറ്റുമുട്ടുന്ന ഹമാസിന്റെ സഖ്യകക്ഷിയാണ് ഹിസ്ബുള്ള. ഹമാസിനെന്നപോലെ ഹിസ്ബുള്ളയ്ക്കും ഇറാന്റെ പിന്തുണയുണ്ട്.
Content Highlights: Israel claims to have assassinated Hezbollah Chief of Staff Haitham Ali Tabtabai in a Beirut airstrike. Hezbollah confirms his death.