യുഎസ് തിരഞ്ഞെടുപ്പ്: എഐ ആശങ്കയിൽ വാൾ സ്ട്രീറ്റിൽ വൻ കൂപ്പുകുത്തൽ; 2020-ന് ശേഷമുള്ള ഏറ്റവുംവലിയ തകർച്ച

ന്യൂയോർക്ക്: യു.എസ്. കോൺഗ്രസ് തിരഞ്ഞെടുപ്പിൽ ഡെമോക്രാറ്റുകളും മുന്നേറ്റത്തിന് പിന്നാലെ അമേരിക്കൻ ഓഹരി വിപണിയായ വാൾ സ്ട്രീറ്റിൽ വൻ ഇടിവ്. നിർമ്മിത ബുദ്ധി (എഐ) മേഖലയിലെ നിക്ഷേപങ്ങളെക്കുറിച്ചുള്ള ആശങ്കകളെത്തുടർന്ന് നാസ്ഡാക് ഓഹരിവിപണി 2.3 ട്രില്യൺ ഡോളറിന്റെ ഭീമമായ നഷ്ടത്തിലേക്ക് കൂപ്പുകുത്തി.

കൊവിഡ് മഹാമാരിക്ക് ശേഷം (2020 മാർച്ച്) വാൾ സ്ട്രീറ്റ് നേരിടുന്ന ഏറ്റവും വലിയ ഒറ്റദിവസത്തെ തകർച്ചയാണിത്. എഐ ചിപ്പ് നിർമാതാക്കൾ ഉൾപ്പെടെയുള്ള സാങ്കേതികവിദ്യാ (ടെക്) ഓഹരികളെയാണ് വിറ്റഴിക്കൽ തുടക്കത്തിൽ കൂടുതൽ ബാധിച്ചത്. എന്നാൽ, വിപണിയിലെ അപകടസാധ്യത കുറയ്ക്കാനായി നിക്ഷേപകർ പൊതുവായി ഓഹരികൾ വിറ്റഴിച്ചതോടെ ഇടിവ് മറ്റ് മേഖലകളിലേക്കും പടരുകയായിരുന്നു.

വിപണിയിലെ പ്രധാന സൂചികകളെല്ലാം വലിയ നഷ്ടത്തിലാണ് വ്യാപാരം അവസാനിപ്പിച്ചത്. നാസ്ഡാക് 100 സൂചിക ആറ് ശതമാനത്തിലധികം ഇടിഞ്ഞു. ഒക്ടോബർ 6-ലെ സർവകാല റെക്കോർഡിൽ നിന്ന് 15 ശതമാനത്തോളം താഴേക്ക് പതിച്ച നാസ്ഡാക് സൂചികയ്ക്ക് വിപണി മൂല്യത്തിൽ 2.3 ട്രില്യൺ ഡോളറിന്റെ ഭീമമായ നഷ്ടമാണുണ്ടായത്. എസ് ആൻഡ് പി 500 സൂചിക 4.4 ശതമാനം ഇടിഞ്ഞു. പ്രമുഖ ചിപ്പ് നിർമ്മാണ കമ്പനികളുടെ പ്രകടനം വിലയിരുത്തുന്ന ഫിലാഡൽഫിയ സെമികണ്ടക്ടർ സൂചിക 12 ശതമാനം തകർന്നു. ലോകത്തിലെ ഏറ്റവും മൂല്യമുള്ള കമ്പനിയായ എൻവിഡിയയുടെ ഓഹരികൾ ഒമ്പത് ശതമാനത്തിലധികം താഴേക്ക് പോയി. ഡൗ ജോൺസ് ഇൻഡസ്ട്രിയൽ ആവറേജിലെ 30 ഓഹരികളും ഇടിവിലാണ് വ്യാപാരം പൂർത്തിയാക്കിയത്.

എഐ ചിപ്പുകൾ, കമ്പ്യൂട്ടിങ് ഉപകരണങ്ങൾ, ഡാറ്റാ സെന്ററുകൾ എന്നിവയ്ക്കുള്ള ഉയർന്ന ആവശ്യകത മുൻനിർത്തി സാങ്കേതികവിദ്യാ ഓഹരികൾ കൈവരിച്ച റെക്കോർഡ് മുന്നേറ്റമാണ് ഈ വർഷം വാൾ സ്ട്രീറ്റിനെ നയിച്ചിരുന്നത്. എന്നാൽ, ഡാറ്റാ സെന്ററുകൾ നിർമ്മിക്കുന്നതിനും അടിസ്ഥാനസൗകര്യങ്ങൾക്കും ആയി ചെലവഴിക്കുന്ന ഭീമമായ തുക തുടർന്നും നിലനിർത്താനാകുമോ എന്നും അതിന് തക്കതായ സാമ്പത്തിക ലാഭം ലഭിക്കുമോ എന്നും നിക്ഷേപകർ സംശയിച്ചു തുടങ്ങി.

യു.എസ്. കോൺഗ്രസ് തിരഞ്ഞെടുപ്പിൽ ഡെമോക്രാറ്റുകൾ നേടിയ വൻ വിജയത്തെ നിക്ഷേപകർ ആദ്യം ആവേശത്തോടെ സ്വാഗതം ചെയ്തിരുന്നു. പ്രസിഡന്റ് ഡൊണാൾഡ് ട്രംപിന്റെ രാഷ്ട്രീയ നയങ്ങൾക്ക് തടയിടാനും ഇറാൻ സംഘർഷം കുറയ്ക്കാനും ഇത് സഹായിക്കുമെന്ന് കരുതി. എന്നാൽ, പിന്നാലെ ഈ രാഷ്ട്രീയ മാറ്റം എഐ വ്യവസായത്തിന്റെ വളർച്ചയെ മന്ദഗതിയിലാക്കുമോ എന്ന ഭയത്തിലേക്ക് കാര്യങ്ങൾ മാറി.

യു.എസ്. കോൺഗ്രസ് ഡെമോക്രാറ്റുകളുടെ നിയന്ത്രണത്തിലാകുന്നതോടെ ഡാറ്റാ സെന്ററുകളുടെ വികസനം, ഊർജ്ജ ഉപഭോഗം, അടിസ്ഥാനസൗകര്യങ്ങൾ എന്നിവയിൽ കൂടുതൽ പരിശോധനകളും നിയന്ത്രണങ്ങളും ഉണ്ടായേക്കാമെന്ന സംശയം ശക്തമായി. ഭീമമായ തുക നിക്ഷേപിക്കുന്ന ഡാറ്റാ സെന്റർ നിർമ്മാണത്തിന്റെ വേഗത കുറഞ്ഞാൽ, ചിപ്പ് നിർമ്മാതാക്കളുടെയും സാങ്കേതിക കമ്പനികളുടെയും ഭാവി വരുമാനത്തെ അത് ദോഷകരമായി ബാധിക്കും. നിലവിലെ രാഷ്ട്രീയ സാഹചര്യം എ.ഐ. അനുബന്ധ വ്യവസായത്തെ മന്ദഗതിയിലാക്കുമോ എന്ന് നിക്ഷേപകർ വിലയിരുത്തിത്തുടങ്ങി.

എന്നാൽ, സാങ്കേതികവിദ്യാ മേഖലയിൽ മാത്രമായി വിറ്റഴിക്കൽ ഒതുങ്ങിനിന്നില്ല. വിപണിയിലെ അപകടസാധ്യത കുറയ്ക്കാനുള്ള ശ്രമത്തിനിടെ വാൾമാർട്ട് പോലെയുള്ള സുരക്ഷിതമെന്ന് കരുതപ്പെടുന്ന ഓഹരികളും ഇടിവ് നേരിട്ടു. ഓഹരി വിപണി സമ്മർദ്ദത്തിലായതോടെ നിക്ഷേപകർ സുരക്ഷിത താവളമായ യുഎസ് ഗവൺമെന്റ് ബോണ്ടുകളിലേക്ക് ശ്രദ്ധ മാറ്റി. യുഎസ് ട്രഷറി ബോണ്ട് വിലകൾ ഉയർന്നതോടെ, വിവിധ കാലാവധികളിലുള്ള ബോണ്ട് റിട്ടേണുകൾ 12 ബേസിസ് പോയിന്റ് വരെ ഇടിഞ്ഞ് സെപ്റ്റംബർ തുടക്കത്തിന് ശേഷമുള്ള ഏറ്റവും കുറഞ്ഞ നിരക്കിലെത്തി.

Content Highlights: Wall Street experienced its largest single-day drop since the COVID-19 pandemic, driven by investor concerns over AI infrastructure spending and shifting political dynamics impacting tech stocks.