അറസ്റ്റ്, പിരിച്ചുവിടല്‍; ചാര്‍ളി കിര്‍ക്കിനെ വിമര്‍ശിക്കരുത്…! ട്രംപ് നയിക്കുന്നത് പുതിയ മെക്കാര്‍ത്തിസത്തിലേക്കോ?

ഏതാനും നാളുകള്‍ക്ക് മുന്‍പാണ് അമേരിക്കയെ നടുക്കി യുവ യാഥാസ്ഥിതിക നേതാവും ഡൊണാള്‍ഡ് ട്രംപിന്റെ അടുത്ത അനുയായിയുമായ ചാര്‍ളി കിര്‍ക്ക് കൊല്ലപ്പെടുന്നത്. യൂട്ടാ സര്‍വകലാശാലയില്‍ പ്രസംഗിച്ചുകൊണ്ടിരിക്കെയായിരുന്നു ടേണിങ് പോയന്റ് അമേരിക്ക എന്ന സംഘടനയുടെ സ്ഥാപകനായ ചാര്‍ളിക്കിന് വെടിയേറ്റത്. അതിന് ശേഷം എഫ്ബിഐ ഉള്‍പ്പടെയുള്ള സുരക്ഷ ഏജന്‍സികളുടെ നേതൃത്വത്തില്‍ വലിയ അന്വേഷണങ്ങള്‍ നടക്കുകയും വൈകാതെ കൊലയാളി പിടിയിലാകുകയും ചെയ്തു. ഇതെല്ലാം കഴിഞ്ഞ് ദിവസങ്ങള്‍ പിന്നിട്ടിട്ടും അമേരിക്കന്‍ പൊതുസമൂഹത്തിലും രാഷ്ട്രീയത്തിലും ഈ കൊലപാതകമുണ്ടാക്കിയ അലയാലികള്‍ അവസാനിക്കുന്നില്ല. കൊലപാതകത്തിന്റെ പേരു പറഞ്ഞ് അമേരിക്കയില്‍ സമാനതകളില്ലാത്ത രാഷ്ട്രീയ വേട്ടയും നിയമനടപടികളുമാണ് ട്രംപ് സര്‍ക്കാര്‍ നടത്തിക്കൊണ്ടിരിക്കുന്നത്. ചാര്‍ളി കിര്‍ക്കിന്റെ കൊലപാതകവും അതുണ്ടാക്കിയ പ്രത്യേക സാഹചര്യവും മുതലെടുത്ത് എതിരാളികളെയും വിമര്‍ശകരെയും ഇല്ലാതാക്കാനുള്ള ശ്രമങ്ങളാണ് ഡൊണാള്‍ഡ് ട്രംപ് നടത്തുന്നതെന്നാണ് വിമര്‍ശകര്‍ ചൂണ്ടിക്കാട്ടുന്നത്. ചരിത്രത്തിലെ ഏറ്റവും ഇരുണ്ടതും ജനാധിപത്യ വിരുദ്ധവുമായ കാലത്തിലേക്കാണ് അമേരിക്ക നടന്നടുക്കുന്നതെന്നാണ് രാഷ്ട്രീയ നിരീക്ഷകരുടെ പക്ഷം.

ചാര്‍ളി കിര്‍ക്കിനെതിരെയോ അദ്ദേഹത്തിന്റെ നിലപാടുകള്‍ക്കെതിരെയോ വിമര്‍ശനപരമായ പരാമര്‍ശങ്ങള്‍ നടത്തിയ ഒട്ടേറെ പേരാണ് അറസ്റ്റ് ചെയ്യപ്പെടുകയോ ഫെഡറല്‍ ഏജന്‍സികളാല്‍ ഭീഷണിപ്പെടുത്തുകയോ ചെയ്യപ്പെട്ടത്. ഒട്ടേറെ പേരെ ജോലിയില്‍നിന്ന് പിരിച്ചുവിടുകയും ചെയ്തു. ചാര്‍ളി കിര്‍ക്ക് വംശീയവാദിയായിരുന്നെന്ന് വിമര്‍ശിച്ച് സോഷ്യല്‍ മീഡിയ പോസ്റ്റുകളിട്ട പല പ്രൊഫസര്‍മാരെയും അധ്യാപകരെയും ജോലിയില്‍നിന്ന് നീക്കം ചെയ്തു. ചാര്‍ളിയെ വിമര്‍ശിച്ചതിന്റെ പേരില്‍ പണിപോയവരുടെ കൂട്ടത്തില്‍ പൈലറ്റുമാര്‍ വരെയുണ്ട്. ചാര്‍ളി ഒരു നിയോ നാസിയായിരുന്നുവെന്നും സ്ത്രീ വിരോധിയായിരുന്നുവെന്നും വിമര്‍ശിച്ചവരെല്ലാമാണ് ഇത്തരത്തില്‍ നടപടിക്ക് വിധേയരായത്.

Content Highlights: Charlie Kirk assassination America entering a new era of McCarthyism