വാഹന മോഡിഫിക്കേഷൻ: UDF അധികാരത്തിലെത്തിയ ശേഷം നടപടിയെടുത്തത് 7,360 പേർക്കെതിരെ, പിഴയായി ഈടാക്കിയത് 5.7 കോടി രൂപ

പാലക്കാട്: സംസ്ഥാനത്ത് വാഹനങ്ങൾ രൂപമാറ്റം വരുത്തിയതിന് (മോഡിഫിക്കേഷൻ) പുതിയ സർക്കാർ വന്നശേഷം പിഴയീടാക്കിയത് 5.7 കോടി രൂപ. സർക്കാർ അധികാരത്തിലേറിയ മേയ് മുതൽ ഓഗസ്റ്റ് 25 വരെയുള്ള കാലയളവിൽ 7,360 പേർക്കെതിരേയാണ് പിഴ ചുമത്തിയത്.

2026-ൽ 15,784 വാഹനങ്ങൾക്കെതിരേ രൂപം മാറ്റിയതിന് നടപടിയെടുത്തെന്നാണ് മോട്ടോർവാഹന വകുപ്പിൽനിന്ന് ലഭിച്ച വിവരാവകാശരേഖകൾ പറയുന്നത്. 12.66 കോടി രൂപയാണ് പിഴചുമത്തി ചലാൻ നൽകിയിട്ടുള്ളത്.

കോടതിനിർദേശം വന്നതോടെ ഓരോ രൂപമാറ്റത്തിനും 5,000 രൂപവീതം പിഴചുമത്തുന്നത് നിർബന്ധമാക്കി. കഴിഞ്ഞ ആറുവർഷത്തിനിടെ 1.04 ലക്ഷം വാഹനങ്ങൾക്കെതിരേയാണ് നടപടിയെടുത്തത്. 145 കോടി രൂപയാണ് ഈയിനത്തിൽ പിഴചുമത്തിയത്.

ബൈക്കുകളും സ്കൂട്ടറുകളും ബസുകളുമാണ് കൂടുതലായി രൂപമാറ്റം വരുത്തിയതായി കണ്ടെത്തിയിട്ടുള്ളതെന്നും വിവരാവകാശരേഖയിൽ പറയുന്നു. നാല് രൂപമാറ്റംവരെ കണ്ടെത്തിയ വാഹനങ്ങളുണ്ട്. വലിയ ചക്രങ്ങൾ സ്ഥാപിക്കൽ, അനുമതിയില്ലാതെ നിറം മാറ്റൽ, ഉപകരണങ്ങൾ ഘടിപ്പിക്കൽ തുടങ്ങിയവയാണ് ഏറെയും.

നിലവിൽ അനുമതിയോടെ ഏഴ് മാറ്റങ്ങൾ വരുത്താനാണ് മോട്ടോർവാഹനവകുപ്പ് തീരുമാനിച്ചിട്ടുണ്ട്. ആർ.സി.യിൽ ഉൾപ്പെടുത്തിക്കൊണ്ടുള്ള നിറം മാറ്റൽ, എൻജിൻ മാറ്റൽ, ഷാസിയും ഫ്രെയിമും മാറ്റൽ, ഭിന്നശേഷി സൗഹൃദമാക്കൽ തുടങ്ങിയ നിർദേശങ്ങളാണ് ഇപ്പോഴുള്ളത്.

ഇനിയും കിട്ടാനുണ്ട് 19.62 കോടി രൂപ

2021 മുതൽ 2025വരെ രൂപമാറ്റം വരുത്തിയ വാഹനങ്ങൾക്കുള്ള പിഴയിനത്തിൽ 19.62 കോടി രൂപയാണ് വകുപ്പിന് കിട്ടാനുള്ളത്. ഈ കാലയളവിൽ 113 കോടി രൂപ പിഴയായി ലഭിച്ചു. 2024-ലെ മാത്രം 5.26 കോടി രൂപ അടയ്ക്കാനുണ്ട്.

Content Highlights: According to RTI data, the Kerala Motor Vehicles Department penalised 7,360 people and imposed ₹5.7 crore in fines for illegal vehicle modifications between May and August 25 following the new government taking office.