കാട്ടുപോത്തിനെ കൊന്ന് ഇറച്ചി കടത്തി; കായികാധ്യാപകൻ പിടിയിൽ

കാട്ടാക്കട: നെയ്യാർഡാം നെട്ടുകാൽത്തേരി തുറന്ന ജയിലിനടുത്തെ മുക്കാട്ടുമല റബ്ബർ എസ്റ്റേറ്റിനുള്ളിൽ കാട്ടുപോത്തിനെ വെടിവെച്ച് കൊന്ന് ഇറച്ചി കടത്തിയ കേസിൽ കായികാധ്യാപകൻ അറസ്റ്റിൽ. വെള്ളറട വി.പി.എം. ഹയർസെക്കൻഡറി സ്‌കൂളിലെ കായിക അധ്യാപകൻ വെള്ളറട ജങ്ഷനിൽ ദാസ് ഹൗസിൽ ഡെനിൻ ദാസിനെ (44) യാണ് വനം വകുപ്പ് പരുത്തിപ്പള്ളി റേഞ്ച് ഉദ്യോഗസ്ഥർ അറസ്റ്റ് ചെയ്തത്. കേസിൽ രണ്ടുപ്രതികൾ നേരത്തെ അറസ്റ്റിലായിരുന്നു. കേരള-തമിഴ്‌നാട് അതിർത്തി കേന്ദ്രീകരിച്ചുള്ള നായാട്ട് സംഘങ്ങളിലെ പ്രധാനിയാണ് അറസ്റ്റിലായ ഡെനിൻ ദാസ്. കേസിലെ ഒന്നാം പ്രതിയാണിയാൾ.

കേരളത്തിൽ വേട്ടയാടുന്ന മൃഗങ്ങളുടെ മാംസം തമിഴ്‌നാട്ടിലെ ചില റിസോർട്ടുകളിലേക്കാണ് ഇവർ കൈമാറിയിരുന്നത്. മുക്കോട്ടുമല എസ്റ്റേറ്റ് കേന്ദ്രീകരിച്ച് ഇത് രണ്ടാം തവണയാണ് ഈ സംഘം നായാട്ട് നടത്തുന്നത്. ചില തമിഴ്‌നാട് സ്വദേശികളും നായാട്ടുസംഘത്തിൽ ഉൾപ്പെട്ടിട്ടുണ്ടെന്നും ഇവർ ഉടൻ പിടിയിലാകുമെന്നും ഉദ്യോഗസ്ഥർ പറഞ്ഞു.

സെപ്റ്റംബർ 26- ന് പുലർച്ചെയാണ് കാട്ടുപോത്തിനെ വെടിവച്ചു വീഴ്ത്തിയത്.

തുടർന്ന് ഇറച്ചി കഷണങ്ങളാക്കി വാഹനത്തിൽ കടത്തുകയായിരുന്നു. പരുത്തിപ്പള്ളി റേഞ്ച് ഓഫീസർ വി.വിപിൻചന്ദ്രൻ, ഡെപ്യൂട്ടി ആർ.എഫ്.ഒ. അനിൽകുമാർ, എസ്.എഫ്.ഒ. അനിൽ, ബി.എഫ്.ഒ. മാരായ റോയ്, റോഷ്ണി, മനു, ഡ്രൈവർ രാജേഷ് എന്നിവരടങ്ങുന്ന സംഘമാണ് പ്രതിയെ പിടികൂടിയത്. പ്രതിയെ നെടുമങ്ങാട് വനം കോടതിയിൽ ഹാജരാക്കി റിമാൻഡ് ചെയ്തു.

Content Highlights: A physical education teacher was arrested for shooting and killing a wild bison in the Mukkattumala rubber estate near Neyyar Dam., The accused is identified as Denin Das (44), the prime suspect in the poaching ring operating along the Kerala-Tamil Nadu border., Poached meat was allegedly supplied to resorts in Tamil Nadu., The forest department produced the accused before the Nedumangad forest court, leading to his remand.