പൊതുടാപ്പുകളിലൂടെ കുടിവെള്ളം വിതരണം: വാട്ടർ അതോറിറ്റിക്ക് കിട്ടാനുള്ളത് 916 കോടി

തൃശ്ശൂർ: പൊതുടാപ്പുകളിലൂടെ കുടിവെള്ളം വിതരണംചെയ്തതിന്റെ കരമായി വാട്ടർ അതോറിറ്റിക്ക് കിട്ടാനുള്ളത് 916 കോടി രൂപ. വെള്ളക്കരം 228 ശതമാനത്തോളം കൂട്ടിയെങ്കിലും കോടികൾ കുടിശ്ശികയായതോടെ കടുത്ത പ്രതിസന്ധിയിലാണ് വാട്ടർ അതോറിറ്റി. പൊതുടാപ്പുകളുള്ളിടത്തെ തദ്ദേശ സ്ഥാപനങ്ങളാണ് കരം അടയ്ക്കേണ്ടത്. വെള്ളക്കരം പിരിച്ചെടുക്കാൻ കൃത്യമായ സംവിധാനമില്ലാത്തതും പിടിപ്പുകേടുമാണ് പ്രശ്നമാകുന്നത്.

ഈ ബജറ്റിൽ 356 കോടിയാണ് വാട്ടർ അതോറിറ്റിക്ക് വകയിരുത്തിയതെങ്കിലും 46 കോടിയാണ് നൽകിയത്. സാമ്പത്തികവർഷം തീരാൻ നാലു മാസമേയുള്ളൂ. കഴിഞ്ഞ ബജറ്റിൽ 369 കോടി അനുവദിച്ചതിൽ 189 കോടിയാണ് കിട്ടിയത്. കിട്ടാനുള്ള ബജറ്റ് വിഹിതം കെ.എസ്.ഇ.ബി.ക്ക് നൽകിയാൽ മതിയെന്നാണ് വാട്ടർ അതോറിറ്റി സർക്കാരിനോട് ആവശ്യപ്പെടുന്നത്. വൈദ്യുതിനിരക്കായി 1,595 കോടി രൂപ വാട്ടർ അതോറിറ്റി കെ.എസ്.ഇ.ബി.ക്ക് നൽകാനുണ്ട്.

Content Highlights: Supply of drinking water through public taps water bills arrears 916 crores