സ്മാര്ട്ടാകാന് പുതിയ തീയതി; സ്മാര്ട്ട് സിറ്റി റോഡുകള് ജൂണ് 15-നകം സഞ്ചാരയോഗ്യമാക്കും
തിരുവനന്തപുരം: ഏറെ പഴികേട്ട തിരുവനന്തപുരം നഗരത്തിലെ സ്മാര്ട്ട് റോഡ് നിര്മാണത്തിന് വീണ്ടും സമയപരിധി പുതുക്കി. സ്മാര്ട്ട് സിറ്റി പദ്ധതി പ്രകാരം നിര്മാണം പുരോഗമിക്കുന്ന റോഡുകള് ജൂണ് 15-നകം സഞ്ചാരയോഗ്യമാക്കുമെന്നാണ് പുതിയ തീരുമാനം. മന്ത്രി വി. ശിവന്കുട്ടിയുടെ അധ്യക്ഷതയില് ചേര്ന്ന ഉദ്യോഗസ്ഥതല യോഗത്തിലാണ് തീരുമാനമെടുത്തത്. മൂന്നു ദിവസമായി പെയ്യുന്ന കനത്ത മഴയെത്തുടര്ന്നു നഗരത്തിന്റെ ചില മേഖലകളിലുണ്ടായിട്ടുള്ള വെള്ളക്കെട്ട് നിവാരണം രണ്ടു ദിവസത്തിനകം പൂര്ത്തിയാക്കാനും യോഗത്തില് തീരുമാനമായി.
റോഡ് നിര്മാണം നഗരത്തിലെ പ്രധാന കേന്ദ്രങ്ങളില് വെള്ളക്കെട്ട് ഉണ്ടാക്കിയത് വലിയ വിമര്ശനങ്ങള്ക്ക് വഴിവെച്ചിരുന്നു. ഇതിന് പിന്നാലെ മഴക്കാല പൂര്വ ശുചീകരണം പാളിയത് നഗരസഭയെയും പ്രതിരോധത്തിലാക്കിയിരുന്നു. ഇതിന് പിന്നാലെയാണ് മന്ത്രി ഉന്നതതല യോഗം വിളിച്ചത്. വിഷയത്തില് മനുഷ്യാവകാശ കമ്മീഷന് അടക്കം കേസെടുത്തിരുന്നു. ജനങ്ങള്ക്കിടയില് പ്രതിഷേധം കനത്തതോടെയാണ് പുതിയ തീയതി വന്നത്.
സ്മാര്ട്ട് സിറ്റി പദ്ധതിയുടെ ഭാഗമായി 10 റോഡുകളിലാണ് നിലവില് നിര്മാണ പ്രവര്ത്തനങ്ങള് നടക്കുന്നതെന്ന് മന്ത്രി ചൂണ്ടിക്കാട്ടി. ജോലികള് വേഗത്തിലാക്കി സമയബന്ധിതമായി നിര്മാണം പൂര്ത്തിയാക്കാന് മന്ത്രി ബന്ധപ്പെട്ട ഉദ്യോഗസ്ഥര്ക്കു നിര്ദേശം നല്കി. റോഡ് നിര്മാണത്തിനായി കുഴിയെടുത്തു വെള്ളക്കെട്ടുണ്ടായ ഭാഗങ്ങളില് മുന്നറിയിപ്പ് ബോര്ഡുകള് സ്ഥാപിച്ച് സുരക്ഷിതമാക്കണം. റോഡ് നിര്മാണവുമായി ബന്ധപ്പെട്ട് വിവിധ വകുപ്പുകള് തമ്മില് ഏകോപിച്ചു നടത്തേണ്ട പ്രവര്ത്തനങ്ങള് സംബന്ധിച്ചു ബന്ധപ്പെട്ട ഉദ്യോഗസ്ഥര് കൃത്യമായ ചര്ച്ചകളും ആസൂത്രണവും നടത്തണം.
മൂന്നു ദിവസമായി പെയ്യുന്ന കനത്ത മഴ നഗരത്തില് ചില മേഖലകളില് വെള്ളക്കെട്ടിനു കാരണമായിട്ടുണ്ട്. ഈ പ്രദേശങ്ങളില് പൊതുമരാമത്ത് വകുപ്പ്, വാട്ടര് അതോറിറ്റി, മേജര്- മൈനര് ഇറിഗേഷന് വകുപ്പുകള്, കോര്പ്പറേഷന് എന്നിവര് യുദ്ധകാലാടിസ്ഥാനത്തില് യോജിച്ചുള്ള പ്രവര്ത്തനം നടത്തി മേയ് 23 നകം പ്രശ്നപരിഹാരമുണ്ടാക്കണം. തുടര്ന്നുള്ള ദിവസങ്ങളിലും നഗരത്തില് കനത്ത മഴയുണ്ടാകുമെന്ന കാലാവസ്ഥാ മുന്നറിയിപ്പിന്റെ പശ്ചാത്തലത്തില് ഈ വകുപ്പുകളിലെ താഴേത്തട്ടിലുള്ള ഉദ്യോഗസ്ഥര്വരെയുള്ളവര് ഓരോ പ്രദേശങ്ങളിലെയും സ്ഥിതിഗതികള് മുന്കൂട്ടി വിലയിരുത്തി പ്രവര്ത്തനങ്ങള് ആസൂത്രണം ചെയ്യണം.
നഗരത്തിലെ വെള്ളക്കെട്ട് നിവാരണവുമായി ബന്ധപ്പെട്ടു നടത്തുന്ന പ്രവര്ത്തനങ്ങള് സംബന്ധിച്ചു ബന്ധപ്പെട്ട വകുപ്പുകള് ജില്ലാ കളക്ടര്ക്കു റിപ്പോര്ട്ട് നല്കണം. കളക്ടര് ഇതു സംബന്ധിച്ച റിപ്പോര്ട്ട് സര്ക്കാരിനു കൈമാറണം. ഓരോ ദിവസവും വൈകിട്ട് ബന്ധപ്പെട്ട വകുപ്പുകളിലെ ഉദ്യോഗസ്ഥരുടെ യോഗം ചേര്ന്നു കളക്ടര് പ്രവര്ത്തനങ്ങള് വിലയിരുത്തണം. മണ്സൂണ് കാലത്ത് നഗരത്തിലും ജില്ലയുടെ മറ്റു ഭാഗങ്ങളിലുമുണ്ടാകുന്ന വെള്ളക്കെട്ട് അടക്കമുള്ള കെടുതികള് അടിയന്തരമായി പരിഹരിക്കുന്നതിന് ഓരോ പ്രദേശങ്ങളുടേയും ചുമതലയ്ക്ക് ഡെപ്യൂട്ടി കളക്ടര്മാരെ ചുമതലപ്പെടുത്തണം. ഇവര് കോര്പ്പറേഷനുമായും സര്ക്കാര് സംവിധാനങ്ങളുമായും ചേര്ന്നു പ്രവര്ത്തനങ്ങള് ഏകോപിപ്പിക്കണമെന്നും മന്ത്രി യോഗത്തില് നിര്ദേശിച്ചു.
തിരുവന്തപുരം പി ഡബ്ല്യു ഡി റെസ്റ്റ് ഹൗസില് ചേര്ന്ന യോഗത്തില് മേയര് ആര്യ രാജേന്ദ്രന്, എം.എല്.എമാരായ കടകംപള്ളി സുരേന്ദ്രന്, ആന്റണി രാജു, വി.കെ. പ്രശാന്ത്, ജില്ലാ കളക്ടര് ജെറോമിക് ജോര്ജ്, എ ഡി എം പ്രേംജി സി ,സബ്കളക്ടര് ഡോ. അശ്വതി ശ്രീനിവാസ് തുടങ്ങിയവരും പങ്കെടുത്തു.
Content Highlights: Smart city roads will be made passable v sivankutty