പി.വി അൻവറിന് പിറകില്‍ അൻവർ മാത്രം, മറ്റൊരാളുമില്ല - എം.വി ഗോവിന്ദൻ
ഒറ്റപ്പാലം: എ.ഡി.ജി.പി എം.ആർ അജിത് കുമാറിനെതിരായ അന്വേഷണം അട്ടിമറിക്കാനുള്ള കഴിവൊന്നും കേരളത്തിൽ ഒറ്റയാൾക്കുമില്ലെന്ന് സി.പി.എം സംസ്ഥാന സെക്രട്ടറി എം.വി ഗോവിന്ദൻ. ഒരു അട്ടിമറിയും നടക്കില്ല. ഡി.ജി.പിയാണ് കേസ് അന്വേഷിക്കുന്നത്. എ.ഡി.ജി.പിക്കെതിരായ സർക്കാരിന്റെ അന്വേഷണം പൂർത്തിയായാൽ അതിനനുസരിച്ചുള്ള നിലപാട് സ്വീകരിക്കുമെന്നും എം.വി ഗോവിന്ദൻ പറഞ്ഞു.
പി.വി അൻവറിന് പിറകില്‍ അൻവർ മാത്രമാണുള്ളത്. മറ്റൊരാളുമില്ലെന്നും എം.വി ഗോവിന്ദൻ കൂട്ടിച്ചേർത്തു. സി.പി.എം സമ്മേളനം തുടങ്ങുന്നതിന്റെ ഭാഗമായുള്ള പാലക്കാട്ടെ മേഖലാ ജനറൽബോഡി യോഗത്തിന് ഒറ്റപ്പാലത്തെത്തിയപ്പോഴായിരുന്നു അദ്ദേഹത്തിന്റെ പ്രതികരണം.
ബി.ജെ.പിയുടെ വളർച്ചക്ക് പിന്നിൽ ഫലപ്രദമായ സഹായം ചെയ്തിട്ടുള്ളത് കോൺഗ്രസാണ്. മുൻമുഖ്യമന്ത്രിമാരുടെ മക്കൾ പോലും ബി.ജെ.പിയിലേക്ക് പോകുന്ന സ്ഥിതിയുണ്ടായി. തൃശൂരിൽ കോൺഗ്രസ് മൂന്നാംസ്ഥാനത്തേക്ക് പോയതുൾപ്പടെയുള്ള കാര്യങ്ങൾ പഠിക്കാൻ കോൺഗ്രസ് കമ്മീഷനെ നിയോഗിച്ചിട്ടുണ്ട്. ഈ കമ്മീഷൻ റിപ്പോർട്ട് പുറത്തുവന്നാൽ അത് ഹേമാ കമ്മിറ്റി റിപ്പോർട്ടിനേക്കാൾ ഗൗരവമുള്ളതാകും. അപ്പോൾ കോൺഗ്രസ് നേതാക്കൾ എന്ത് നിലപാട് സ്വീകരിക്കുമെന്ന് കണ്ടറിയാമെന്നും എം.വി ഗോവിന്ദൻ പറഞ്ഞു.
Content Highlights: no one behind pv anvar allegations says mv govindan