നെടുമ്പാശ്ശേരി അപകടം: 'എഫ്ഐആറിൽ പേരില്ലാത്തത് എന്തുകൊണ്ടെന്ന് മുഖ്യമന്ത്രിയും ചോദിച്ചു'; സഭയിൽ വിശദീകരിച്ച് ചെന്നിത്തല
തിരുവനന്തപുരം: മൂന്നുപേരുടെ മരണത്തിനിടയാക്കിയ നെടുമ്പാശ്ശേരി അപകടത്തിലെ പോലീസ് നടപടികളെ സംബന്ധിച്ച് ഉയർന്ന വിവാദങ്ങളിൽ നിയമസഭയിൽ വിശദീകരണം നൽകി ആഭ്യന്തര മന്ത്രി രമേശ് ചെന്നിത്തല. എഫ്ഐആറിൽ പ്രതിയുടെ പേരുവരാത്തത് സംബന്ധിച്ച് മുഖ്യമന്ത്രിയും തന്നോട് ചോദിച്ചിരുന്നുവെന്ന് രമേശ് ചെന്നിത്തല പറഞ്ഞു. നിയമസഭയിൽ പ്രതിപക്ഷ നേതാവ് പിണറായി വിജയന്റെ ചോദ്യത്തിന് മറുപടിയായി കേസിൽ ധാരാളം അഭ്യൂഹങ്ങൾ പ്രചരിക്കുന്നതായി പറഞ്ഞ ചെന്നിത്തല, ഒരു വിട്ടുവീഴ്ചയും ഉണ്ടാകില്ലെന്നും കുറ്റക്കാർക്ക് പരമാവധി ശിക്ഷ വാങ്ങി കൊടുക്കാനുള്ള നടപടിയുണ്ടാകുമെന്നും സഭയ്ക്ക് ഉറപ്പുനൽകി.
ഒരു അപകടം ഉണ്ടായാൽ പോലീസ് എങ്ങനെയാണ് നടപടി സ്വീകരിക്കുന്നതെന്ന് എല്ലാവർക്കും അറിയാം. അതിലൊന്നും ഒരുവിട്ടുവീഴ്ചയും ഉണ്ടാകില്ല. എഫ്ഐആറിൽ എന്തുകൊണ്ട് പേര് ആദ്യം ഇട്ടില്ല എന്ന് മുഖ്യമന്ത്രിയും എന്നോട് ചോദിച്ചിരുന്നു. അപകടത്തിൽ മരണപ്പെട്ടവരുടെ സഹപ്രവർത്തകനായ റിയാദ് പോലീസിന് നൽകിയ മൊഴിയുടെ അടിസ്ഥാനത്തിലാണ് എഫ്ഐആർ രജിസ്റ്റർ ചെയ്തത്. റിയാദിന് പ്രതിയുടെ പേര് ആ ഘട്ടത്തിൽ അറിയാതിരുന്നതുകൊണ്ടാണ് പ്രതിയുടെ പേരെഴുതുന്ന കോളത്തിൽ ഇന്ന നമ്പറുള്ള വാഹനം ഓടിച്ച ആൾ എന്ന് രേഖപ്പെടുത്തിയത്. പിന്നീട് ശേഖരിച്ച വിവരങ്ങളുടെ അടിസ്ഥാനത്തിലുള്ള റിമാൻഡ് റിപ്പോർട്ട് ഇവിടെയുണ്ട്. ഒന്നാംപ്രതിയുടെ പേരും വിവരങ്ങളും അതിൽ രേഖപ്പെടുത്തിയിട്ടുണ്ട്. മദ്യപിച്ച കാര്യം എഫ്ഐആറിൽ രേഖപ്പെടുത്തിയില്ലെന്നാണ് രണ്ടാമത്തെ കാര്യം. അതിന് കാരണം മരണപ്പെട്ടവരുടെ സുഹൃത്ത് നൽകിയ മൊഴിയുടെ അടിസ്ഥാനത്തിലാണ് കേസ് രജിസ്റ്റർ ചെയ്തത്. മെഡിക്കൽ പരിശോധന നടത്തി പ്രതി മദ്യപിച്ചതായി തെളിഞ്ഞതിനുശേഷം ഇക്കാര്യം കേസിൽ ഉൾപ്പെടുത്തിയിട്ടുണ്ട്', ആഭ്യന്തര മന്ത്രി വിശദീകരിച്ചു.
പ്രതിയെ ബോസ്റ്റൽ സ്കൂളിലേക്ക് മാറ്റിയത് സംബന്ധിച്ചും ചെന്നിത്തല വിശദീകരണം നൽകി. 'ജയിൽ ചട്ടം അനുസരിച്ച് 18 മുതൽ 21 വയസ്സുവരെയുള്ള ആളുകൾ പ്രതികളായാൽ അവരെ ബോസ്റ്റൽ സ്കൂളിലേക്ക് അയക്കുക എന്നതാണ് നിലവിലെ നിയമം. കോടതിയാണ് അവരെ അങ്ങോട്ടേക്ക് അയച്ചത്. നമ്മളല്ല. ആ ചട്ടം മാറ്റണമെങ്കിൽ നമുക്ക് എല്ലാവർക്കും കൂടി ഗൗരവമായി ആലോചിക്കാവുന്നതാണ്' ചെന്നിത്തല പറഞ്ഞു.
ഇതെല്ലാം സാധാരണ നടപടികളാണ്. കുറ്റക്കാർക്ക് പരമാവധി ശിക്ഷ വാങ്ങിനൽകാനുള്ള എല്ലാ നടപടിയും ഈ സർക്കാർ സ്വീകരിക്കും. ദയവായി അഭ്യൂഹങ്ങൾ പ്രചരിപ്പിക്കരുതെന്നും ചെന്നിത്തല ആവശ്യപ്പെട്ടു. അപകടത്തിന് പിന്നാലെയുണ്ടായ വർഗീയ പ്രചാരണങ്ങൾക്കെതിരെയും ചെന്നിത്തല രംഗത്തെത്തി. ഇതൊക്കെ മനുഷ്യത്വരഹിതമായ കാര്യമാണെന്നും അദ്ദേഹം കൂട്ടിച്ചേർത്തു. കേരളത്തിൽ മദ്യപിച്ച് വാഹനം ഓടിക്കുന്നത് അവസാനിപ്പിക്കാനുള്ള നടപടികൾ സ്വീകരിക്കുമെന്നും ചെന്നിത്തല പറഞ്ഞു.
Content Highlights: Home Minister Ramesh Chennithala addressed the Kerala Assembly regarding the Nedumbassery accident., Clarified why the accused's name was initially missing from the FIR based on the complainant's statement