പകുതി ഓടിയപ്പോൾ പറഞ്ഞു പെർമിറ്റ് ഇല്ല; വിദ്യാർഥിനികളെ പുലർച്ചെ വഴിയിൽ ഇറക്കിവിട്ട് കെ.എസ്.ആർ.ടി.സി.

കോഴിക്കോട്: കോയമ്പത്തൂരിലേക്ക് കെ.എസ്.ആർ.ടി.സി. സൂപ്പർ ഡീലക്സ് എയർബസ്സിൽ ടിക്കറ്റ് ബുക്ക് ചെയ്ത് യാത്ര ചെയ്ത വിദ്യാർഥിനികളെ പകുതി വഴിയിൽ ഇറക്കിവിട്ടതയായി പരാതി. കോഴിക്കോട് സ്വദേശിനികളായ അസിന, അശ്വിനി കൃഷ്ണ തുടങ്ങിയ വിദ്യാർഥിനികളെയാണ് ബസ് അധികൃതർ യാത്രയ്ക്കിടെ മണ്ണാർക്കാട് ഇറക്ക് വിട്ടത്. കഴിഞ്ഞ പത്താം തീയതി പുലർച്ചെ നാലരയോടെയാണ് സംഭവം.

കോയമ്പത്തൂരിൽ ടീച്ചേഴ്സ് ട്രെയിനിങ് വിദ്യാർഥികളായ അശ്വിനിയും അസിനയും തിരക്ക് കണക്കിലെടുത്ത് കോയമ്പത്തൂർ യാത്രയ്ക്കായി കാസർകോട് മുതലുള്ള സീറ്റ് ബുക്ക് ചെയ്തിരുന്നു. കോഴിക്കോട് നിന്ന് കയറുകയും ചെയ്തു. എന്നാൽ വണ്ടി മണ്ണാർക്കാട് എത്തിയപ്പോൾ യാത്രക്കാരോട് ഇറങ്ങാൻ ആവശ്യപ്പെടുകയായിരുന്നു. ഇവിടെ നിന്ന് അങ്ങോട്ട് യാത്ര ചെയ്യാൻ ബസ്സിന് പെർമിറ്റ് ഇല്ലെന്നും വേറെ ബസ് കയറി പോകാൻ ആവശ്യപ്പെടുകയുമായിരുന്നുവെന്ന് വിദ്യാർഥികൾ പറയുന്നു.

ഒൻപതാം തീയതിയാണ് കാസർകോട് നിന്നും കോയമ്പത്തൂരിലേക്കുള്ള സൂപ്പർ ഡീലക്സ് എയർ ബസ്സിൽ വിദ്യാർഥിനികൾ ടിക്കറ്റ് ബുക്ക് ചെയ്തത്. തങ്ങൾക്ക് നൽകിയിരിക്കുന്ന ബസ്സിന് അന്തർസംസ്ഥാന പെർമിറ്റ് ഇല്ലെന്നും മണ്ണാർക്കാട് എത്തുമ്പോൾ പെർമിറ്റ് ശരിയാകുമെന്നുമായിരുന്നു ഡ്രൈവറോടും കണ്ടക്ടറോടും കെ.എസ്.ആർ.ടി.സി അധികൃതർ പറഞ്ഞത്. എന്നാൽ പെർമിറ്റ് ലഭിക്കാതെ വന്നതോടെ യാത്ര അവസാനിപ്പിക്കുകയായിരുന്നു.

വിദ്യാർഥിനികൾ ഇത് ചോദ്യം ചെയ്തപ്പോൾ തങ്ങൾക്ക് ഒന്നും അറിയില്ലെന്നും മേലധികാരികളുമായി ബന്ധപ്പെടണമെന്നും അറിയിക്കുകയും ചെയ്തു. ഇതോടെ സീറ്റ് പോലുമില്ലാത്ത ഓർഡിനറി ബസ്സിൽ കയറ്റിവിട്ടെന്നും വിദ്യാർഥിനികൾ ആരോപിക്കുന്നു. സംഭവത്തിൽ മുഖ്യമന്ത്രിക്കും, ട്രാൻസ്പോർട്ട് വകുപ്പ് മന്ത്രിക്കും ഉൾപ്പെടെ പരാതി നൽകുമെന്നും വിദ്യാർഥിനികൾ അറിയിച്ചു.

Content Highlights: Students traveling on a KSRTC Super Deluxe Air Bus to Coimbatore were forced to disembark midway at Mannarkkad due to a lack of interstate permit for the bus. The students had booked their tickets in advance, but were informed en route that the bus could not proceed beyond Mannarkkad, and were advised to take another bus. The students plan to file complaints with higher authorities, including the Chief Minister and Transport Minister, after being transferred to an ordinary bus without seats.