തേങ്ങ നെഞ്ചിലേക്ക് തെറിച്ചുവീണു; ബൈക്ക് യാത്രക്കാരന് ദാരുണാന്ത്യം

കിളിമാനൂർ (തിരുവനന്തപുരം): എം.സി. റോഡിലൂടെ പോകുകയായിരുന്ന ബൈക്ക് യാത്രക്കാരൻ, നെഞ്ചിലേക്ക് തേങ്ങ തെറിച്ചുവീണ് മരിച്ചു. പുളിമാത്ത് താളിക്കുഴി വാലുപച്ച കൃഷ്ണകൃപയിൽ സൈജുവാണ്‌ (47) മരിച്ചത്.

പ്ലംബിങ് തൊഴിലാളിയായ സൈജു വ്യാഴാഴ്ച രാവിലെ എട്ടുമണിയോടെ ആറ്റിങ്ങലിൽ ജോലിക്കു പോകാനായി വീട്ടിൽനിന്നു കിളിമാനൂർ ഭാഗത്തേക്ക് വരുമ്പോഴായിരുന്നു അപകടം.

പൊരുന്തമൺ എം.ജി.എം. സ്കൂളിന് സമീപത്തുവെച്ച് റോഡരികിലെ പുരയിടത്തിലെ തെങ്ങിൽനിന്ന് അടർന്നുവീണ തേങ്ങ സമീപത്തെ മതിലിൽ പതിച്ചശേഷം, സൈജുവിന്റെ നെഞ്ചിലേക്ക് തെറിച്ചുവീഴുകയായിരുന്നു.

ബൈക്ക് നിർത്തിയ സൈജുവിന് വേദനയും അസ്വസ്ഥതയും അനുഭവപ്പെടുകയും തുടർന്ന് കുഴഞ്ഞുവീഴുകയുമായിരുന്നു. ഉടൻ ആശുപത്രിയിലെത്തിച്ചെങ്കിലും രക്ഷിക്കാനായില്ല.

വെള്ളിയാഴ്ച രാവിലെ ഒൻപതിന് സംസ്കാരം നടത്തും. ചിറയിൻകീഴിലെ സ്വകാര്യ ലാബിൽ ജീവനക്കാരിയായ ആതിരയാണ് സൈജുവിന്റെ ഭാര്യ. മകൾ: ഐശ്വര്യ. കിളിമാനൂർ പോലീസ് കേസെടുത്തു.

Content Highlights: A biker named Saiju (47) died after a coconut fell from a tree, bounced off a wall, and struck his chest while he was traveling on MC Road in Kilimanoor.