കൈത്തണ്ട മുറിച്ച് ആത്മഹത്യക്കു ശ്രമിച്ചു; പിന്നാലെ പോലീസ് ട്രെയിനി ക്യാമ്പില്‍ തൂങ്ങിമരിച്ചനിലയില്‍

തിരുവനന്തപുരം: രണ്ടു ദിവസം മുന്‍പ് കൈത്തണ്ട മുറിച്ച് ആത്മഹത്യക്കു ശ്രമിച്ച പോലീസ് ട്രെയിനിയെ പേരൂര്‍ക്കട എസ്എപി ക്യാമ്പില്‍ തൂങ്ങിമരിച്ചനിലയില്‍ കണ്ടെത്തി. വിതുര കരിപ്പാലം അരവിന്ദ് ഭവനില്‍ ആനന്ദി(24)നെയാണ് വ്യാഴാഴ്ച രാവിലെ ക്യാമ്പിലെ മുറിയില്‍ തൂങ്ങിമരിച്ച നിലയില്‍ കണ്ടെത്തിയത്.

പട്ടികവര്‍ഗ വിഭാഗത്തില്‍പ്പെട്ട ആനന്ദ് മൂന്നുമാസം മുന്‍പാണ് പരിശീലനത്തിനെത്തിയത്. ആനന്ദിന്റെ മരണത്തില്‍ ദുരൂഹത ആരോപിച്ച് ബന്ധുക്കള്‍ പേരൂര്‍ക്കട പോലീസില്‍ പരാതിനല്‍കി.

ആനന്ദ് കൈത്തണ്ട മുറിച്ച് ആത്മഹത്യക്കു ശ്രമിച്ചെന്ന് അധികൃതര്‍ വിവരം അറിയിച്ചതനുസരിച്ച് അമ്മ ചന്ദ്രികയും സഹോദരന്‍ അരവിന്ദും ക്യാമ്പിലെത്തി ആനന്ദിനെ കണ്ടിരുന്നു. എന്നാല്‍, ആനന്ദിനെ വീട്ടിലേക്കു വിടാന്‍ ഉദ്യോഗസ്ഥര്‍ തയ്യാറായില്ലെന്നാണ് ബന്ധുക്കളുടെ ആരോപണം. കമാന്‍ഡിങ് ഓഫീസര്‍ ആനന്ദിനെ വീട്ടിലേക്കു വിടാന്‍ ശുപാര്‍ശചെയ്‌തെങ്കിലും ഡിഐജി ഓഫീസില്‍നിന്നു വാക്കാല്‍ അനുമതി നിഷേധിക്കുകയായിരുന്നുവെന്നും ആരോപണമുണ്ട്.

ഏതാനും ദിവസം മുന്‍പ് പരിശീലനത്തിനിടയില്‍ ആനന്ദിന് ഗ്രൗണ്ടിനു ചുറ്റും ചാടിക്കുന്നതടക്കമുള്ള ശിക്ഷാനടപടികള്‍ നല്‍കിയിരുന്നതായും ഇതിലെ മാനസികവിഷമമാണ് ആത്മഹത്യക്കു കാരണമെന്നും ബന്ധുക്കള്‍ പറയുന്നു. ഇതെല്ലാം കാണിച്ച് പോലീസ് ഉന്നത ഉദ്യോഗസ്ഥര്‍ക്കു പരാതിനല്‍കുമെന്നും ബന്ധുക്കള്‍ പറഞ്ഞു.

എന്നാല്‍, ആനന്ദിന് ഹൈപ്പര്‍ടെന്‍ഷന്‍ ഉണ്ടായിരുന്നതായാണ് പോലീസ് പറയുന്നത്. പരേതനായ അശോകന്‍ കാണിയാണ് അച്ഛന്‍.

(ഓർക്കുക-ആത്മഹത്യ ഒന്നിനും പരിഹാരമല്ല. അതിജീവിക്കാൻ ശ്രമിക്കുക. ഹെൽപ്‌ലൈൻ നമ്പർ: 1056)

Content Highlights: A police trainee in Kerala was found dead after a reported suicide attempt. Family alleges foul play