എച്ച്എം ആക്ട്സും ഹോംസും; ഡിജിറ്റലായി ആഭ്യന്തരമന്ത്രിയുടെ ഓഫിസ്; പരാതിക്കാർക്ക് ഇനി നടപടികൾ കൃത്യമായി അറിയാം

തിരുവനന്തപുരം: ആഭ്യന്തരമന്ത്രിയുടെ ഓഫിസിന്റെയും കേരള പൊലീസിന്റെയും ദൈനംദിന പ്രവർത്തനങ്ങൾ ഏകോപിപ്പിക്കാനായി ഡിജിറ്റൽ സംവിധാനം നിലവിൽവന്നു. പൊതുജനങ്ങളിൽനിന്ന് ആഭ്യന്തരമന്ത്രിക്ക് ലഭിക്കുന്ന പരാതികൾ കാര്യക്ഷമമായി കൈകാര്യം ചെയ്യാൻ HM Acts, പ്രധാന കുറ്റകൃത്യങ്ങളെ സംബന്ധിച്ച കണക്കുകളും വിവരങ്ങളും മന്ത്രിക്ക് തത്സമയം ലഭ്യമാക്കാൻ HOMeS((Home Department Operations, Monitorinhg and e-Services.) എന്നീ സംവിധാനങ്ങളാണ് ഉപയോഗിക്കുന്നത്.

ആഭ്യന്തരവകുപ്പും വിവിധ പൊലീസ് സ്റ്റേഷനുകളും തമ്മിലുള്ള ഏകോപനം മെച്ചപ്പെടുത്തുവാനും പരാതികൾ സംബന്ധിച്ച നടപടികൾ വേഗത്തിലാക്കാനും ഇത് ഗുണംചെയ്യും. ഇതിലൂടെ സംസ്ഥാനത്ത് ഓരോ ദിവസവും റജിസ്റ്റർ ചെയ്യുന്ന എഫ്ഐആറിനെക്കുറിച്ച് ആഭ്യന്തരമന്ത്രിക്ക് ഉടനടി വിവരം ലഭിക്കും. കുറ്റകൃത്യങ്ങളുടെ പൊതുകണക്ക് പോർട്ടലിലുണ്ടാകും.

ഓരോ പരാതിയും എച്ച്എം ആക്ട്സ് എന്ന പോർട്ടലിൽ രജിസ്റ്റർ ചെയ്ത് കേരള പൊലീസിന്‍റെ സോഫ്റ്റ്‍വെയറായ iCoPS വഴി സ്റ്റേഷനിലേക്ക് കൈമാറും. ഇതിലൂടെ, പരാതിയിന്മേലുണ്ടാകുന്ന നടപടിക്രമങ്ങൾ ഓരോന്നും പരിശോധിക്കാനാകും. തീർപ്പ് സംബന്ധിച്ച വിവരങ്ങൾ അപേക്ഷകർക്ക് എസ്എംഎസ് മുഖേന ലഭിക്കും. അടിയന്തര ശ്രദ്ധ ആവശ്യമായ കേസുകൾ വന്നാൽ, പ്രത്യേക അറിയിപ്പ് വരും. കൂടാതെ കുറ്റകൃത്യങ്ങളുമായി ബന്ധപ്പെട്ട രഹസ്യവിവരങ്ങളും വ്യക്തിഗതവിവരങ്ങളും പുറത്തുപോകാതെ സൂക്ഷിക്കാനും പര്യാപ്തമാണ്.

പ്രവർത്തനങ്ങൾ കൂടുതൽ കാര്യക്ഷമമാക്കാനും പരാതികൾ തീർപ്പാക്കുന്നതിലെ കാലതാമസം ഒഴിവാക്കാനും ഡിജിറ്റൽ സംവിധാനം ഗുണംചെയ്യുന്നുണ്ടെന്ന് രമേശ് ചെന്നിത്തല പറഞ്ഞു. ഗൗരവസ്വഭാവമുള്ള പരാതികളിൽ വളരെ വേഗത്തിൽത്തന്നെ നടപടിയെടുക്കാൻ സംസ്ഥാന പോലീസ് മേധാവി എല്ലാ സ്റ്റേഷനുകൾക്കും നിർദ്ദേശം കൊടുത്തിട്ടുണ്ടെന്നും അദ്ദേഹം കൂട്ടിച്ചേർത്തു.

Content Highlights: Introduction of HM Acts and HOMeS digital systems to coordinate Home Department and Kerala Police operations., Efficient handling of public complaints and real-time tracking of major crimes., Integration with iCoPS software for seamless police station communication and SMS updates for applicants., Enhanced data security ensuring confidentiality of sensitive information.