സഭ നാളെ തുടങ്ങും, രാഷ്ട്രീയം കൊമ്പുകോർക്കും; ആയുധം മൂർച്ചകൂട്ടി ഇരുപക്ഷത്തും ഒരുക്കം
തിരുവനന്തപുരം: ഭരണ -പ്രതിപക്ഷക്യാമ്പുകൾ രാഷ്ട്രീയമായി കൊമ്പുകോർത്തുനിൽക്കേ നിയമസഭാസമ്മേളനം തിങ്കളാഴ്ച തുടങ്ങും. യു.ഡി.എഫ്. സർക്കാർ അധികാരമേറ്റശേഷമുള്ള രണ്ടാംസമ്മേളനം ഒൻപതുദിവസത്തേക്കു മാത്രമാണ്. നിയമനിർമാണത്തിനായി ചേരുന്ന ആദ്യസമ്മേളനമാണിത്. ബജറ്റ് ഉപധനാഭ്യർഥന ചർച്ച ഈ സമ്മേളനത്തിൽ പൂർത്തിയാക്കും.
നൂറുദിന കർമപരിപാടിയുടെ ഭാഗമായി പൂർത്തീകരിച്ച നേട്ടം ഉയർത്തിക്കാട്ടി സഭാസമ്മേളനത്തെ അഭിമുഖീകരിക്കാനുള്ള തയ്യാറെടുപ്പിലാണ് സർക്കാർ. വിഴിഞ്ഞം തുറമുഖവികസനം, പ്രിയദർശിനി സൗജന്യ ബസ് യാത്ര, ഓപ്പറേഷൻ തൂഫാൻ തുടങ്ങിയവയുടെ വിജയം സർക്കാരിന് ആത്മവിശ്വാസമേകുന്നു. വയോജനക്ഷേമ ബിൽ, സ്വകാര്യ സർവകലാശാല ബിൽ തുടങ്ങിയവ തയ്യാറായിക്കഴിഞ്ഞു. കിഫ്ബി ഉടച്ചുവാർക്കാൻ തീരുമാനിച്ചതിനാൽ, വികസനപദ്ധതികൾക്കുള്ള സാമ്പത്തിക സമാഹരണത്തിന് ബദൽ വഴിയെന്തെന്നും സർക്കാരിന് വിശദീകരിക്കേണ്ടിവരും.
നാലുമാസത്തിനിടെ പുതിയ സർക്കാരിന്റെ തിളക്കത്തിനുമേൽ കരിനിഴൽവീഴ്ത്തിയ രാഷ്ട്രീയവിവാദങ്ങൾ പ്രതിപക്ഷം ആയുധമാക്കും. തദ്ദേശ ഉപതിരഞ്ഞെടുപ്പിൽ യു.ഡി.എഫ്. നേരിട്ട തിരിച്ചടി ജനങ്ങൾക്കുള്ള അവിശ്വാസത്തിന് തെളിവായി ഉയർത്തിക്കാട്ടും.
പ്രതിപക്ഷ ആയുധങ്ങൾ
- മുഖ്യമന്ത്രിയുടെയും മന്ത്രിമാരുടെയും വിവാദ സ്പോൺസർഷിപ്പ് യാത്രകൾ
- വൈദ്യുതി പ്രതിസന്ധി
- സർക്കാർ ആശുപത്രികളിലെ മരുന്നുക്ഷാമം
- വന്ദേമാതരം, പി.എം- ശ്രീ വിവാദം
- യു.ഡി.എഫ്. കൺവീനർ- മുഖ്യമന്ത്രി അഭിപ്രായഭിന്നത
ഭരണപക്ഷത്തെ ആവനാഴി
- സി.എം.ആർ.എൽ-എക്‌സാലോജിക് കേസിൽ പ്രതിപക്ഷ നേതാവുതന്നെ പ്രതിസ്ഥാനത്ത്
- മെസ്സിയെ കേരളത്തിൽ കൊണ്ടുവരുന്നതിന്റെ പേരിലുള്ള തട്ടിപ്പ്
- സി.പി.എം. വിശാലകമ്മിറ്റികളിലെ തെറ്റുതിരുത്തലും പാലക്കാട് ജില്ലാസെക്രട്ടറിക്കു നേരേയുള്ള പരാതിയും
- പ്രതിപക്ഷ ഉപനേതാവ് തർക്കം
- പി.എസ്.സി. ക്രമക്കേടും ഹൈക്കോടതി ഇടപെടലും
Content Highlights: The second session of the Kerala Legislative Assembly convenes on Monday for nine days to complete key legislative business and budget discussions. The ruling UDF government plans to highlight achievements like the Vizhinjam port expansion, Priyadarshini free bus scheme, and Operation Toofan. Opposition LDF prepares to corner the government over controversy regarding ministers' sponsored trips, power crisis, and drug shortages in government hospitals. Major legislative bills, including the Senior Citizens Welfare Bill and Private University Bill, are scheduled for consideration during the session. Both fronts are set for a intense political showdown amid political disputes and recent local body by-election results.