തീര്‍ഥഘട്ടങ്ങള്‍ ഒഴിഞ്ഞു, ഇക്കുറി വാവുബലി വീടുകളിലേക്ക്
പിതൃപരമ്പരയുടെ മോക്ഷപ്രാപ്തിക്കായി അനന്തരതലമുറ കൊല്ലത്തിലൊരിക്കല്‍ ശ്രാദ്ധമൂട്ടുന്ന കര്‍ക്കടകവാവ് ഇന്ന്. പതിനായിരങ്ങള്‍ പിതൃതര്‍പ്പണത്തിന് എത്തിയിരുന്ന സംസ്ഥാനത്തെ എല്ലാ തീര്‍ഥഘട്ടങ്ങളും ഇക്കുറി വിജനമാണ്. കോവിഡ് വ്യാപനത്തിന്റെ പശ്ചാത്തലത്തില്‍ ആള്‍ക്കാര്‍ കൂടുന്നതും, തീര്‍ഥഘട്ടങ്ങളില്‍ ബലിയിടുന്നതും പാടില്ലെന്ന് സംസ്ഥാന പോലീസ് മേധാവി അറിയിച്ചിട്ടുണ്ട്. ദേശീയതലത്തില്‍ കോവിഡ് നിയന്ത്രണത്തിന്റെ ഭാഗമായ മാര്‍ഗരേഖയാണ് കേരളത്തിലും അനുവര്‍ത്തിക്കുന്നതെന്നും അദ്ദേഹം അറിയിച്ചു. വിവിധ ദേവസ്വം ബോര്‍ഡുകള്‍ക്കും ഇതേ നിലപാടാണുള്ളത്. അതിര്‍ത്തിക്കപ്പുറത്ത് സാഗരസംഗമത്തിലെ കന്യാകുമാരിയിലും ഇക്കുറി ബലിതര്‍പ്പണത്തിന് സൗകര്യമുണ്ടായിരിക്കില്ല.
നീണ്ട ദിവസത്തെ ലോക്ഡൗണിന് ശേഷമെത്തുന്ന കര്‍ക്കടകവാവും പിതൃതര്‍പ്പണവും വിശ്വാസികള്‍ക്ക് ഒഴിച്ചുകൂടാന്‍ കഴിയാത്തതാണ്. കേരളത്തില്‍ വയനാട്ടിലെ തിരുനെല്ലി, തിരുനാവായ, ആലുവാ മണപ്പുറം, കൊല്ലം തിരുമുല്ലവാരം, തലസ്ഥാനത്ത് തിരുവല്ലം പരശുരാമസ്വാമി ക്ഷേത്രം, ശംഖുമുഖം, വര്‍ക്കല കടപ്പുറം, അരുവിപ്പുറം മഠം തുടങ്ങി പിതൃബലിക്ക് പ്രസിദ്ധമായ സ്ഥലങ്ങള്‍ നിരവധിയാണ്. ഓരോ വര്‍ഷവും ഓരോ പുണ്യതീര്‍ഥത്തില്‍ ബലിയിടുന്ന പതിവ് ചിലര്‍ക്കുണ്ട്. എത്ര ദൂരെ കഴിഞ്ഞാലും കര്‍ക്കടകവാവിന് പതിവുള്ള സ്ഥലത്തു തന്നെയെത്തി ബലിയിടുന്നവരും നിരവധിയാണ്. ഇവരെല്ലാം ഇക്കുറി നാടിന്റെയും കാലത്തിന്റെയും അനിവാര്യമായ സത്യം അംഗീകരിച്ചു കഴിഞ്ഞു. ഇക്കുറി വീടുകളില്‍ ബലിയിടാമെന്ന പൊതുധാരണ തുടക്കം മുതല്‍ അംഗീകരിക്കപ്പെട്ടിരുന്നു.
ഇന്ന് കര്‍ക്കടക വാവ് ... കോവിഡ് വ്യാപനത്തെ തുടര്‍ന്ന് ക്ഷേത്രങ്ങളിലും പൊതുസ്ഥലങ്ങളിലും ബലിതര്‍പ്പണത്തിന് നിരോധനമുണ്ട്. ചടങ്ങുകള്‍ വീടുകളില്‍ നടത്താമെന്നാണ് നിര്‍ദേശം. ജനസഹസ്രങ്ങള്‍ തര്‍പ്പണത്തിന് എത്താറുള്ള പ്രശസ്തമായ ആലുവ മണപ്പുറം ഞായറാഴ്ച ഒരുക്കങ്ങളില്ലാതെ വിജനമായനിലയില്‍ | ഫോട്ടോ: ബി.മുരളീകൃഷ്ണന്‍
മണ്‍മറഞ്ഞ പിതൃക്കളെ ഓര്‍മിക്കാനുള്ള കര്‍ക്കടകവാവില്‍ മനം നിറഞ്ഞ്, അസൗകര്യങ്ങളില്‍ നിന്നുകൊണ്ട് എല്ലാവരും വീടുകളില്‍ ബലിയിടാനുള്ള തയ്യാറെടുപ്പാണ് നടത്തിയത്. അതിന് നേരിയ പ്രയാസങ്ങളുണ്ടെങ്കിലും തയ്യാറെടുപ്പിന് വേണ്ട സഹായവും നിര്‍ദ്ദേശവും ഇതിനകം എല്ലായിടത്തും ഉണ്ടായിട്ടുണ്ട്. പ്രമുഖ പുരോഹിതന്മാര്‍ മുന്‍കൂട്ടി ഓണ്‍ലൈനിലൂടെ നിര്‍ദ്ദേശങ്ങള്‍ മുന്നോട്ടു?െവച്ചു. വിവിധ സംഘടനകളും കര്‍ക്കടകവാവിന്റെ കര്‍മങ്ങള്‍ അന്യൂനമാക്കാനുള്ള ശ്രമം ആരംഭിച്ചിരുന്നു. അതിനൊപ്പം വിശ്വാസികളുടെ മനഃശുദ്ധിയും വ്രതശുദ്ധിയും പ്രാര്‍ഥനയും ചേരുമ്പോള്‍, എല്ലാത്തിലുമെന്നപോലെ മഹാമാരിക്കെതിരായ പ്രതിരോധമായി കര്‍ക്കടകവാവും അതിന്റെ പിതൃപുണ്യവും സംഗമിക്കും.
പിതൃബലിയുടെ പ്രാധാന്യം
അദ്ധ്യാത്മരാമായണം അയോധ്യാകാണ്ഡത്തില്‍ ദശരഥന്റെ മരണത്തെ തുടര്‍ന്ന് രാമലക്ഷ്മണാദികള്‍ ഗംഗയില്‍ ഉദകക്രിയ ചെയ്യുന്ന രംഗമുണ്ട്. നാം ഏത് അന്നം ഭുജിക്കുന്നുവോ അത് പിതൃക്കളും ഭുജിക്കുന്നുവെന്ന് സ്മൃതികളെ ഉദ്ധരിച്ച് എഴുത്തച്ഛന്‍ പറയുന്നു. ഈശ്വരന്‍, ധര്‍മദൈവം എന്നിവയ്ക്ക് തുല്യം മണ്‍മറഞ്ഞ പിതൃക്കളെ ഗുരുസ്ഥാനം നല്‍കി ആദരിക്കുന്ന പാരമ്പര്യമുണ്ട്. ദേവന്മാര്‍ക്ക് മുന്നേ പിതൃക്കളെ പ്രസാദിപ്പിക്കണമെന്നാണ് വിശ്വാസം. പുരാണകാലം മുതല്‍ അനുഷ്ഠിക്കുന്ന ആ കര്‍മത്തിന് തലമുറകളുടെ പുണ്യമുണ്ടെന്നും കരുതുന്നു.
ദക്ഷിണായനത്തിലെ ആദ്യ അമാവാസിയാണ് കര്‍ക്കടകവാവ്. ഈ സമയം സൂര്യന്‍ പിതൃലോകത്തിലേക്ക് കടക്കുമെന്നും പിതൃയാനത്തിനുള്ള പ്രവേശനകവാടമാണ് കര്‍ക്കടകവാവെന്നും വിശ്വാസമുണ്ട്. അതിനാലാണ് സാധാരണ ശ്രാദ്ധത്തില്‍ നിന്നും വ്യത്യസ്തമായി പ്രധാന തീര്‍ഥഘട്ടങ്ങളില്‍ കര്‍ക്കടകവാവിന് എല്ലാവരും ബലിയര്‍പ്പിക്കുന്നത്. അത് പിതാ, പ്രപിതാ, പിതാമഹ പരമ്പരയിലേക്കുള്ള സമര്‍പ്പണമാണ്. അറിയുന്നതും അറിയാത്തതുമായ പിതൃക്കളും സര്‍വചരാചരങ്ങളും ഇതിലുള്‍പ്പെടും. അനന്തരതലമുറയുടെ ക്ഷേമൈശ്വര്യങ്ങള്‍ക്കായുള്ള പ്രാര്‍ഥനയും അതില്‍ അന്തര്‍ലീനമാകുന്നു.
ഭൂമിയിലെ ഒരു വര്‍ഷം പിതൃക്കളുടെ ഒരു ദിവസമെന്നാണ് പുരാണത്തിലുള്ളത്. മണ്‍മറഞ്ഞവര്‍ക്ക് അനന്തരതലമുറ ചെയ്യുന്ന കര്‍മമാണ് ശ്രാദ്ധം. ഓരോ വര്‍ഷവും മരിച്ച തിഥി, നക്ഷത്രം എന്നിവയിലാണ് ശ്രാദ്ധമൂട്ടുന്നത്. ഇതിന് സാധിക്കാതെ വരുന്നവര്‍ക്ക് വര്‍ഷത്തിലൊരിക്കല്‍ വരുന്ന കര്‍ക്കടകവാവ് നാളില്‍ സകല പിതൃക്കളുടെയും ആത്മശാന്തിക്കായി തര്‍പ്പണം നടത്താം.
പിതൃക്കള്‍ ഒരു കൂട്ടം ദേവകളെന്നാണ് മനുസ്മൃതിയിലുള്ളത്. സപ്തര്‍ഷികളാണ് പിതൃക്കളെ സൃഷ്ടിച്ചത്. പിതൃക്കള്‍ക്കു വേണ്ടി ഉരുട്ടിവയ്ക്കുന്ന ചോറാണ് പിതൃപിണ്ഡം. ബലിച്ചോറുകൊണ്ട് പിതൃക്കള്‍ പ്രസന്നരായി, മരിച്ചവരുടെ ആത്മാക്കളെ അനുഗ്രഹിക്കുമെന്നാണ് ഈ വിശ്വാസം. മരിച്ചവരുടെ ആത്മാക്കള്‍ക്ക് പിതൃക്കളില്‍ നിന്നും അനുഗ്രഹം ലഭിക്കുന്നതിന് ചെയ്യുന്ന യജ്ഞമാണ് ശ്രാദ്ധമെന്ന് മഹാഭാരതം അനുശാസനപര്‍വ്വത്തിലും പറയുന്നു.
ബലിക്ക് വേണ്ട വസ്തുക്കള്‍, അവയുടെ പ്രാധാന്യം
•ദര്‍ഭപ്പുല്ല്: പുരാതനകാലം മുതല്‍ ക്ഷേത്രപൂജകള്‍ക്ക് തുല്യം പിതൃകര്‍മത്തിനും ദര്‍ഭപ്പുല്ല് അനിവാര്യമായ വസ്തുവാണ്. ബലിയിടുമ്പോള്‍ ഉപയോഗിക്കുന്ന പവിത്രവും ദര്‍ഭ വളച്ചാണ് നിര്‍മിക്കുന്നത്. മരിച്ചയാളുടെ ജഡം കിട്ടാതെ വരുന്ന വേളയില്‍ 'ദര്‍ഭസംസ്‌ക്കാരം' നടത്തി ആത്മശാന്തി നടത്തുന്ന ക്രിയയും പുരാണങ്ങളിലുണ്ട്. ദര്‍ഭകൊണ്ട് ചെയ്യുന്ന ഈ അപരക്രിയയ്ക്ക് 'ദര്‍ഭ വെട്ടിച്ചുടല്‍' എന്നും പേരുണ്ട്.
• ബലിച്ചോറ്: പിതൃക്കളുടെ വിശപ്പ് മാറ്റാന്‍ തര്‍പ്പണത്തിനുള്ള പ്രധാന ഇനം.
• എള്ള്: പിതൃക്കളുടെ ദാഹം മാറ്റാനാണ് എള്ള് ഉപയോഗിക്കുന്നത്. ദര്‍ഭമുനയില്‍ എള്ളും വെള്ളവും (തിലോദകം) അര്‍പ്പിച്ച് പിതൃക്കളുടെ ദാഹം തീര്‍ക്കാമെന്നാണ് വിശ്വാസം. പ്രേതമുക്തിക്കായി എള്ള് ഉപയോഗിച്ച് ചെയ്യുന്നതാണ് തിലഹോമം.
• നെയ്യ്: ബലികര്‍മത്തിനെല്ലാം നെയ്യ് ചേര്‍ക്കണമെന്നാണ് ആചാരം.
• മറ്റ് വസ്തുക്കള്‍: തൂശനില, വാല്‍ക്കിണ്ടി, നിലവിളക്ക്, ഗണപതി പടുക്ക, ചെറൂള, തെച്ചി. തുളസി ഉള്‍പ്പെടെ പൂക്കള്‍, പഴം, ചന്ദനം.
Content Highlights; karkidaka vavu bali
Content Highlights: