DHSന്റെ മാറ്റം; ‘തുരപ്പൻ പണി നടത്തുന്നവർ കസേരയിൽ ഇരിക്കില്ല’- മന്ത്രി കെ. മുരളീധരൻ

തിരുവനന്തപുരം: സർക്കാരിനെ അനുസരിക്കാത്ത ഉദ്യോഗസ്ഥർക്ക് താൻ ഈ കസേരയിൽ ഇരിക്കുന്നിടത്തോളം കാലം സ്ഥാനമുണ്ടാകില്ലെന്ന് മന്ത്രി കെ. മുരളീധരൻ. ആരോഗ്യവകുപ്പ് ഡയറക്ടർ സ്ഥാനത്ത് നിന്ന് ഡോ.കെ.ജെ.റീനയെ മാറ്റിയ ഉത്തരവ് അഡ്മിനിസ്‌ട്രേറ്റീവ് ട്രൈബ്യൂണൽ സ്‌റ്റേ ചെയ്ത സംഭവത്തിൽ പ്രതികരിക്കുകയായിരുന്നു മന്ത്രി. ഭരണകൂടത്തിന് വിരുദ്ധമായി തുരപ്പൻ പണി നടത്തുന്ന ആരെയും സുപ്രധാന സ്ഥാനങ്ങളിൽ ഇരുത്തില്ലെന്നും, ചില കാര്യങ്ങളിൽ ഉടനടി തീരുമാനങ്ങൾ എടുക്കുന്നതാണ് തന്റെ ശൈലിയെന്നും അദ്ദേഹം വ്യക്തമാക്കി. അത്തരം വേഗത്തിലുള്ള തീരുമാനങ്ങൾ ഇനിയും ഉണ്ടാകുമെന്ന് അദ്ദേഹം പറഞ്ഞു.

കേന്ദ്ര സർക്കാരുമായുള്ള കരാറുകളിൽ ഒപ്പിടുന്നത് ക്യാബിനറ്റ് കൂട്ടായി എടുത്ത തീരുമാനമാണെന്നും അതിൽ നിന്നും ഇനി പിന്നോട്ട് പോകാൻ നിവർത്തിയില്ലെന്നും മുരളീധരൻ വ്യക്തമാക്കി. സർവശിക്ഷാ അഭിയാൻ ഫണ്ടുമായി ബന്ധപ്പെട്ട കരാറിൽ ഒപ്പിട്ടത് തലയിൽ മുണ്ടിട്ടല്ലെന്നും, ക്യാബിനറ്റ് യോഗത്തിൽ മന്ത്രിമാരുടെ ചർച്ചകൾക്ക് ശേഷമാണ് തീരുമാനമുണ്ടായതെന്നും മുൻ സർക്കാരിന്റെ നിലപാടിനെ പരിഹസിച്ചുകൊണ്ട് അദ്ദേഹം പറഞ്ഞു. ഒരിക്കൽ ഒപ്പിട്ടുകഴിഞ്ഞാൽ അത് ഫൈനൽ ആണെന്നും അതിൽ ഇനി മാറ്റങ്ങൾ വരുത്താൻ ആർക്കും കഴിയില്ലെന്നും അദ്ദേഹം ഉറപ്പിച്ചു പറഞ്ഞു.

വിദ്യാലയങ്ങളിൽ എന്ത് പഠിപ്പിക്കണമെന്നും ഏത് വിദ്യാലയങ്ങൾ തിരഞ്ഞെടുക്കണമെന്നും തീരുമാനിക്കാനുള്ള പൂർണ്ണ അധികാരം സംസ്ഥാന സർക്കാരിനാണെന്നും മന്ത്രി പറഞ്ഞു. കേന്ദ്രം പഠിപ്പിക്കേണ്ട എന്ന് പറഞ്ഞാലും മുഗൾ സാമ്രാജ്യം ഉൾപ്പെടെയുള്ള വിഷയങ്ങൾ പഠിപ്പിക്കേണ്ടതാണെങ്കിൽ കേരളം അത് പഠിപ്പിക്കുക തന്നെ ചെയ്യുമെന്നും അദ്ദേഹം കൂട്ടിച്ചേർത്തു.

Content Highlights: Minister K. Muraleedharan warns officials against undermining government policy.