ഇപിയുടെ ആത്മകഥ ചോർന്നത് DC ബുക്സിൽനിന്ന്, പോലീസിന് നേരിട്ട് അന്വേഷിക്കാനാകില്ല; റിപ്പോർട്ട്

തിരുവനന്തപുരം: സി.പി.എം. നേതാവ് ഇ.പി ജയരാജന്റെ പുറത്തിറങ്ങാനിരിക്കുന്ന ആത്മകഥയിലെ ഉള്ളടക്കമെന്നനിലയിൽ ചിലഭാഗങ്ങൾ ചോർന്നത് ഡി.സി. ബുക്സിൽ നിന്നെന്ന് പോലീസ് റിപ്പോർട്ട്. ഡി.സി.യുടെ പബ്ലിക്കേഷന്‍സ് വിഭാഗം മേധാവി ശ്രീകുമാറിൽ നിന്നാണ് ഈ ഭാ​ഗങ്ങൾ ചോർന്നത്. ഇതുസംബന്ധിച്ച അന്വേഷണ റിപ്പോർട്ട് കോട്ടയം എസ്.പി. ഡി.ജി.പി.ക്ക് കൈമാറി. സംഭവത്തിൽ, പോലീസിന് നേരിട്ട് കേസെടുക്കാൻ കഴിയില്ലെന്നും റിപ്പോർട്ട്. 

വോട്ടെടുപ്പ് ദിവസം ഈ രീതിയിൽ ആത്മകഥയിലെ ഉള്ളടക്കമെന്നനിലയിൽ ഭാ​ഗങ്ങൾ പ്രചരിച്ചതിൽ ​ഗൂഢാലോചന അന്വേഷിക്കണമെന്ന് ആവശ്യപ്പെട്ട് ഇ.പി. ഡി.ജി.പിക്ക് നേരത്തെ പരാതി സമർപ്പിച്ചിരുന്നു. ഈ പരാതിയുടെ അടിസ്ഥാനത്തിൽ കോട്ടയം എസ്.പിയെ അന്വേഷിക്കാൻ ഡി.ജി.പി. ചുമതലപ്പെടുത്തി. ഇത്തരത്തിൽ ആദ്യഘട്ടത്തിൽ ഒരു റിപ്പോർട്ടും എസ്.പി. സമർപ്പിച്ചിരുന്നു. എന്നാൽ ഈ റിപ്പോർട്ടിൽ കൂടുതൽ വ്യക്തത ആവശ്യപ്പെട്ട് ഡി.ജി.പി മടക്കി അയക്കുകയും ചെയ്തു. 

അതിന്റെ അടിസ്ഥാനത്തിൽ കോട്ടയം എസ്.പി. സമർപ്പിച്ച രണ്ടാംഘട്ട റിപ്പോർട്ടാണ് ഇപ്പോൾ പുറത്തുവന്നിരിക്കുന്നത്. ആത്മകഥയിലെ ഉള്ളടക്കമെന്നനിലയിൽ ഭാ​ഗങ്ങൾ ചോർന്നത് ഡി.സി. ബുക്സിൽ നിന്ന് തന്നെയാണെന്നാണ് റിപ്പോർട്ടിലെ പ്രധാനപ്പെട്ട കണ്ടെത്തൽ. ശ്രീകുമാറിന്റെ മെയിലിൽ നിന്നാണ് ഉള്ളടക്കം ചോർന്നത് എന്നാണ് പറയുന്നത്. 

ഇ.പി. ജയരാജനുമായി കൃത്യമായ ഒരു കരാർ ഡി.സി. ബുക്സിനില്ലായിരുന്നു. പിന്നെ, എങ്ങിനെയാണ് ആത്മകഥയുടെ ഭാ​ഗങ്ങൾ ഡി.സി. ബുക്സിലേക്കെത്തിയത് എന്നതിൽ അന്വേഷണം ആവശ്യമാണ്. എന്നാൽ, വിഷയം പകർപ്പവകാശ നിയമത്തിന് കീഴിൽ വരുന്ന കാര്യമായതിനാൽ പോലീസിന് നേരിട്ട് കേസെടുത്ത് അന്വേഷിക്കാനാകില്ലെന്ന് റിപ്പോർട്ടിൽ പറയുന്നു. 

Content Highlights: EP's autobiography was leaked from DC Books, and the police cannot directly investigate it, says sp