ഓഹരി വില്‍ക്കും, 'വൈദേകം' ബന്ധം ഒഴിവാക്കാന്‍ ഇ.പിയുടെ കുടുംബം; തീരുമാനം റെയ്ഡിന് പിന്നാലെ
കണ്ണൂർ: വൈദേകം റിസോർട്ടുമായുള്ള ബന്ധം അവസാനിപ്പിക്കാൻ ഒരുങ്ങി ഇ.പി. ജയരാജന്റെ കുടുംബം. ഇ.പി. ജയരാജന്റെ ഭാര്യ ഇന്ദിര മകൻ ജയ്സൺ എന്നിവരുടെ ഓഹരിയാണ് വിറ്റൊഴിവാക്കാന്‍ ഒരുങ്ങുന്നത്. ഷെയറും വായ്പയും ഉൾപ്പടെ ഒരു കോടിയിലധികം രൂപയാണ് ഇവർക്ക് വൈദേകം റിസോർട്ടിൽ ഓഹരിയായി ഉള്ളത്.
9,199 ഓഹരികളായിരുന്നു ഇവർക്ക് വൈദേകം റിസോർട്ടിന്റെ പ്രമോട്ടിങ് കമ്പനിയിൽ ഉണ്ടായിരുന്നത്. ഇ.പി. ജയരാജന്റെ ഭാര്യ ഇന്ദിരയ്ക്കാണ് നിലവിൽ റിസോർട്ടിൽ ഏറ്റവും കൂടുതൽ ഓഹരികൾ ഉള്ളത്. 8,10,9900 രൂപയുടേതാണ് ഇന്ദിരയുടെ ഓഹരി. 25 ലക്ഷം കമ്പനിയ്ക്ക് വായ്പയും നൽകിയിട്ടുണ്ട്. മകൻ ജയ്സണ് പത്ത് ലക്ഷം രൂപയുടെ ഓഹരിയും ഉണ്ട്. ഓഹരി മറ്റൊരു ഓഹരി ഉടമയ്ക്ക് കൈമാറാനാണ് തീരുമാനം. നേരത്തെ സഹകരണ ബാങ്കിലെ ജീവനക്കാരിയായിരുന്നു പി.കെ. ഇന്ദിര അവിടെ നിന്ന് വിരമിക്കുമ്പോൾ ലഭിക്കുന്ന തുക ഉപയോഗിച്ചാണ് ഓഹരി വാങ്ങിയത് എന്നായിരുന്നു നൽകിയ വിശദീകരണം.
സാമ്പത്തിക ആരോപണത്തിന്റെ പശ്ചാത്തലത്തിലായിരുന്നു കുടുംബത്തിന്റെ തീരുമാനം എന്നാണ് ഇപ്പോൾ പുറത്തുവരുന്ന റിപ്പോർട്ട്. ഇ.പി. ജയരാജന്റെ രാഷ്ട്രീയ പ്രതിച്ഛായയ്ക്ക് മങ്ങലേൽപ്പിക്കുന്ന ഒരു നടപടിയുമായി മുന്നോട്ട് പോകേണ്ടതില്ലെന്ന ജയരാജന്റെ മകൻ ജയ്സൺന്റെ തീരുമാനത്തിന്റെ അടിസ്ഥാനത്തിലാണ് നിക്ഷേപം പിൻവലിക്കുന്നതെന്നാണ് ലഭിക്കുന്ന വിവരം. 'വിവാദങ്ങളുടെ അടിസ്ഥാനത്തിൽ റിസോർട്ടിൽ നിന്ന് കുടുംബം പിന്മാറുകയാണ്. വിവാദം ഉണ്ടാക്കി മുന്നോട്ട് പോകാൻ താത്പര്യമില്ല. നല്ല സംരംഭം എന്ന നിലക്കാണ് നിക്ഷേപം നടത്തിയത്' എന്ന് ഇ.പി. പ്രതികരിച്ചു.
അതേസമയം ഓഹരി പങ്കാളിത്തം പാർട്ടിക്ക് അകത്തും പുറത്തും ചർച്ചയാവുകയും ഇ.പിക്കും കുടുംബത്തിനും എതിരെ ഇ.ഡിക്കും ആദായനികുതി വകുപ്പിനും പരാതി ലഭിക്കുകയും വിവിധ അന്വേഷണങ്ങളിലേക്ക് കടക്കുകയും ചെയ്ത സാഹചര്യത്തിലാണ് ഓഹരി പങ്കാളിത്തത്തിൽ നിന്ന് ഇപിയുടെ കുടുംബം പൂർണമായും പിൻവാങ്ങുന്നത് എന്നതും ശ്രദ്ധേയമാണ്.
Content Highlights: ep jayarajan family withdraw shares from vaidekam resort