ഇഡി പറഞ്ഞത് അതേപടി വിഴുങ്ങില്ലെന്ന് മന്ത്രിമാർ; സിഎംആർഎൽ കേസിൽ കരുതൽ, കൈക്കൂലിയും ഹവാലയും വെവ്വേറെ പരിശോധിക്കും

തിരുവനന്തപുരം: വളരെസൂക്ഷിച്ചും തിരിച്ചടിക്കരുതെന്ന കരുതലെടുത്തുമാണ് സംസ്ഥാനസർക്കാർ കൈക്കൂലി, ഹവാല ആരോപണങ്ങളിലുള്ള അന്വേഷണം പ്രഖ്യാപിച്ചത്. ഇ.ഡി. റിപ്പോർട്ട് അടിസ്ഥാനമാക്കി നേരിട്ട് എഫ്.ഐ.ആർ ഇട്ട് കേസ് രജിസ്റ്റർ ചെയ്യാൻ കഴിയുമെങ്കിലും സംസ്ഥാന പോലീസ് അന്വേഷിച്ച് ബോധ്യപ്പെട്ടാൽമാത്രം കേസുമായി മുന്നോട്ടുപോയാൽ മതിയെന്ന തീരുമാനത്തിലാണ് സർക്കാർ. ഇ.ഡി.യെ അന്ധമായി പിന്തുടരേണ്ടതില്ലെന്നതാണ് ഈ തീരുമാനത്തിന്റെ രാഷ്ട്രീയവശം.

കേന്ദ്രസർക്കാർ രാഷ്ട്രീയ ആയുധമായാണ് ഇ.ഡി.യെ ഉപയോഗിക്കുന്നതെന്നാണ് കോൺഗ്രസ് ദേശീയതലത്തിൽ ഉയർത്തുന്ന പ്രതിരോധം. അതിനാൽ കേരളത്തിൽ ഇ.ഡിയെ അനുകൂലിക്കുന്നുവെന്ന പ്രതീതി ഉണ്ടാകുന്നത് ദേശീയതലത്തിൽ തേച്ചു മിനുക്കിയ ആയുധത്തിന്റെ മൂർച്ചകുറയ്ക്കുമെന്ന പരിമിതിയും കോൺഗ്രസിനു മുൻപിലുണ്ട്.

അന്വേഷിക്കാതിരിക്കാൻ നിയമപ്രകാരം കഴിയില്ലെന്ന് ആഭ്യന്തരമന്ത്രി രമേശ് ചെന്നിത്തലയും ഇ.ഡി. പറയുന്നത് അതേപടി വിഴുങ്ങില്ലെന്ന് മന്ത്രി കെ. മുരളീധരനും പറഞ്ഞത് വൈരനിര്യാതന ബുദ്ധിയോടെയല്ല സർക്കാരിന്റെ നീക്കമെന്ന് വ്യക്തമാക്കാനാണ്.

പിണറായി വിജയനു നേരേയുള്ളത് കൈക്കൂലി ആരോപണമാണ്. കൈക്കൂലിയെങ്കിൽ സി.എം.ആർ.എല്ലിന് പ്രത്യുപകാരമായി എന്ത് ആനുകൂല്യം നൽകിയെന്ന ചോദ്യമാണ് പ്രതിപക്ഷം ഉയർത്തുന്ന പ്രതിരോധം. അന്വേഷണസംഘം ഇതിനു മറുപടി കണ്ടെത്തേണ്ടിവരും. മുഖ്യമന്ത്രിയുടെ മകൾ ഇത്തരമൊരു കമ്പനിയുമായി വ്യാപാര ബന്ധത്തിലേർപ്പെടണോയെന്ന ധാർമിക പ്രശ്നമാണ് രാഷ്ട്രീയമായി ഉയർന്നുവരുക. കേസ് അന്വേഷണം കൂടുതലും ഹവാല അന്വേഷണത്തിലായിരിക്കും കേന്ദ്രീകരിക്കപ്പെടുക. ഇതിന് ഇ.ഡി. പറയുന്ന തെളിവുകൾ നിയമപരമായി നിലനിൽക്കുന്നതാണോയെന്നാകും പോലീസ് പരിശോധിക്കുക.

ഇ.ഡി. കേസ് രാഷ്ട്രീയപ്രേരിതമാണെന്ന വാദം ഉയർത്തി പ്രതിരോധിക്കുന്നതിനാൽ അന്വേഷണത്തെ രാഷ്ട്രീയപരമെന്നതുപോലെ നിയമപരമായും ചോദ്യംചെയ്യുകയെന്ന സമീപനമായിരിക്കും സി.പി.എം. സ്വീകരിക്കുക. അഡ്വക്കേറ്റ് ജനറൽ, ഡയറക്ടർ ജനറൽ ഓഫ് പ്രോസിക്യൂഷൻ, സ്റ്റേറ്റ് അറ്റോർണി എന്നിവരുടെ നിയമോപദേശം ആഭ്യന്തരവകുപ്പ് പ്രത്യേകമായി വാങ്ങിയിട്ടുണ്ട്.

Content Highlights: The Kerala government is proceeding with extreme legal and political caution regarding the probe based on the ED report, balancing potential fallout and legal scrutiny.