അർജന്റീന ഫുട്‌ബോൾ അസോസിയേഷനുമായി ആശയവിനിമയം നടത്തിയത് അമീറ ഐഷാ ബീഗം; ഇ- മെയിൽ പകർപ്പിൽ വിശദീകരണം

പൊന്നാനി: മുൻമന്ത്രി വി. അബ്ദുറഹിമാനുവേണ്ടി അർജന്റീന ഫുട്‌ബോൾ അസോസിയേഷനുമായി ആശയവിനിമയം നടത്തിയിരുന്നത് താനായിരുന്നുവെന്ന് പൊന്നാനി എം.ഇ.എസ്. കോളേജ് ഇംഗ്ലീഷ് വിഭാഗം അസി. പ്രൊഫസർ അമീറ ഐഷാ ബീഗം. മെസ്സിയുടെ കേരളസന്ദർശനവുമായി ബന്ധപ്പെട്ട് അർജന്റീന ഫുട്‌ബോൾ അസോസിയേഷന് അയച്ചിരുന്ന ഇ-മെയിലുകളുടെ പകർപ്പ് അവർക്ക് അയക്കാനുണ്ടായ കാരണം വിശദീകരിക്കുകയായിരുന്നു അമീറ ഐഷാ.

‘മെസ്സിയുടെ കേരളസന്ദർശനവുമായി ബന്ധപ്പെട്ട് അർജന്റീന ഫുട്‌ബോൾ അസോസിയേഷൻ ഇന്റർനാഷണൽ റിലേഷൻസ് ഹെഡ് പാബ്ലോ ഡയസ്, മാർക്കറ്റിങ് ഹെഡ് ലിയാൻഡ്രോ പീറ്റേഴ്‌സൺ എന്നിവരുമായാണ് ആശയവിനിമയം നടത്തിയിരുന്നത്. ഇ-മെയിൽ അയക്കാനുള്ള മാറ്ററുകൾ മന്ത്രിക്കുവേണ്ടി ഞാനാണ് തയ്യാറാക്കിയിരുന്നത്’ -അമീറ ഐഷാ ബീഗം ‘മാതൃഭൂമി’യോട് പറഞ്ഞു.

ഭർത്താവിന്റെ സുഹൃത്ത് മുഖേനയാണ് മന്ത്രിയെ പരിചയപ്പെടുന്നത്. ഫുട്‌ബോൾ തനിക്കും ആവേശമാണ്. ഖത്തറിൽ ലോകകപ്പ് കാണാൻപോയിരുന്നു. അസോസിയേഷനുമായി സംസാരിക്കാൻ അവസരം ലഭിച്ചപ്പോൾ ആവേശത്തോടെ സ്വീകരിച്ചതാണെന്നും ഇത് പ്രതിഫലംവാങ്ങി ചെയ്ത കാര്യമല്ലെന്നും അമീറ ഐഷാ ബീഗം പറഞ്ഞു.

Content Highlights: Ameera Aisha Begum assisted former minister V. Abdurahiman in communicating with the Argentina Football Association., She corresponded with Pablo Diaz and Leandro Peterson regarding Messi's potential visit to Kerala., She clarified that this was done out of passion for football and without any remuneration.