ജാതി സർവേ, അഴിമതി വിരുദ്ധ പോരാട്ടം, സാമ്പത്തിക ബാധ്യത; വിജയ്ക്ക് മുന്നിലുള്ളത് കഠിനമായ ദൗത്യങ്ങൾ

ചെന്നൈ: ടിവികെ അധ്യക്ഷനും മുഖ്യമന്ത്രിയുമായ സി. ജോസഫ് വിജയ് ചുമതലയേറ്റ ശേഷമുള്ള തമിഴ്നാട് നിയമസഭയുടെ ആദ്യ സമ്മേളനം വ്യാഴാഴ്ച ആരംഭിച്ചത് നടപടിക്രമങ്ങളിലെ മാറ്റങ്ങളോടെയുമാണ്. മുൻ ഗവർണർ ആർ.എൻ. രവിയുടെ കാലത്ത് ഔദ്യോഗിക ചടങ്ങുകളുടെ ക്രമത്തെ ചൊല്ലിയുണ്ടായ വിവാദങ്ങൾ ഗവർണർ രാജേന്ദ്ര അർലേക്കർ ആവർത്തിക്കുമോ എന്നായിരുന്നു രാഷ്ട്രീയ വൃത്തങ്ങൾ ഉറ്റുനോക്കിയിരുന്നത്.

എന്നാൽ, 'തമിഴ് തായ് വാഴ്ത്ത്' എന്ന സംസ്ഥാന ഗാനം ആലപിച്ച് സഭ ആരംഭിക്കുന്ന തമിഴ്നാടിന്റെ ദീർഘകാല പാരമ്പര്യം നിയമസഭ പാലിച്ചു. എങ്കിലും, കീഴ്‌വഴക്കങ്ങളിൽനിന്ന് വ്യത്യസ്തമായി ഇതിന് തൊട്ടുപിന്നാലെ ദേശീയഗാനവും ആലപിച്ചു. സാധാരണയായി ഗവർണറുടെ പ്രസംഗം പൂർത്തിയായ ശേഷമാണ് ദേശീയഗാനം ആലപിക്കാറുള്ളത്.

ടിവികെ സർക്കാരിന്റെ നയരേഖകൾ വിശദീകരിച്ച ഗവർണറുടെ പ്രസംഗത്തിൽ, ദേശീയ സെൻസസിന്റെ ഭാഗമായി ജാതി നിർണ്ണയം പൂർത്തിയാക്കാൻ കേന്ദ്രസർക്കാരിൽ സമ്മർദ്ദം ചെലുത്തുമെന്നും തുടർന്ന് സംസ്ഥാനത്ത്  സാമൂഹിക നീതി സർവേ നടത്തുമെന്നും പ്രഖ്യാപിച്ചു. യഥാർത്ഥ സാമൂഹിക നീതിക്ക് എല്ലാ സമുദായങ്ങൾക്കും അർഹമായ പ്രാതിനിധ്യം ആവശ്യമാണെന്നും ദേശീയ ജാതി സെൻസസ് പൂർത്തിയാക്കിയ ശേഷം ഈ വാഗ്ദാനം നടപ്പാക്കുമെന്നും പ്രസംഗത്തിൽ വ്യക്തമാക്കി.

കേന്ദ്ര-സംസ്ഥാന ബന്ധങ്ങളായിരുന്നു പ്രസംഗത്തിലെ ഒരു പ്രധാന വിഷയം. കേന്ദ്രത്തിൽനിന്നുള്ള സാമ്പത്തിക വിഹിതത്തിൽ തമിഴ്നാടിന്റെ അർഹമായ പങ്ക് ആവശ്യപ്പെട്ട് നിയമസഭയിൽ പ്രമേയം പാസാക്കുമെന്ന് സർക്കാർ അറിയിച്ചു. ആവശ്യമെങ്കിൽ ഈ വിഷയം സുപ്രീം കോടതി വരെ കൊണ്ടുപോകുന്നതിനായി നിയമവിദഗ്ധരുടെ പ്രത്യേക സമിതി രൂപീകരിക്കാനും തമിഴ്നാടിനോടുള്ള വിവേചനപരമായ സാമ്പത്തിക സമീപനം രേഖപ്പെടുത്തുന്ന റിപ്പോർട്ട് പ്രസിദ്ധീകരിക്കാനും നിർദ്ദേശമുണ്ട്.

തമിഴ്നാടിന്റെ ഭാഷാ നിലപാട് വീണ്ടും ഉറപ്പിച്ചുകൊണ്ട്, 1968-ൽ മുൻ മുഖ്യമന്ത്രി സി.എൻ. അണ്ണാദുരൈ സ്വീകരിച്ച ഇരുഭാഷാ നയം തന്നെ തുടരുമെന്ന് സർക്കാർ വ്യക്തമാക്കി. ദേശീയ വിദ്യാഭ്യാസ നയത്തിന് (NEP) എതിരെയും പ്രസംഗത്തിൽ രൂക്ഷവിമർശനം ഉണ്ടായി. NEP 2020-നെ ശക്തമായി എതിർക്കുമെന്നും ത്രിഭാഷാ നയം നടപ്പാക്കാത്തതിന്റെ പേരിൽ സമഗ്ര ശിക്ഷാ പദ്ധതി പ്രകാരം തമിഴ്നാടിന് ലഭിക്കേണ്ട 3,458 കോടി രൂപ കേന്ദ്രം തടഞ്ഞുവച്ചതിനെ വിമർശിക്കുകയും ചെയ്തു. നയപരമായ നിബന്ധനകൾ കൂടാതെ ഫണ്ട് അനുവദിക്കണമെന്ന് കേന്ദ്രത്തോട് ആവശ്യപ്പെടുന്നത് തുടരുമെന്നും സർക്കാർ അറിയിച്ചു.

വിദ്യാഭ്യാസത്തെ കൺകറന്റ് ലിസ്റ്റിൽ (Concurrent List) നിന്ന് സ്റ്റേറ്റ് ലിസ്റ്റിലേക്ക് (State List) മാറ്റണമെന്ന സർക്കാരിന്റെ ആവശ്യം പ്രസംഗത്തിൽ ആവർത്തിച്ചു. നീറ്റ് (NEET), ദേശീയ വിദ്യാഭ്യാസ നയം (NEP), ഭാഷാ നയം തുടങ്ങിയ വിഷയങ്ങൾ വിദ്യാഭ്യാസ മേഖലയിൽ കേന്ദ്രത്തിന്റെ വർധിച്ചുവരുന്ന ഇടപെടൽ മൂലം ഉണ്ടായതാണെന്ന് സർക്കാർ വാദിച്ചു.

ഗവർണറുടെ പ്രസംഗത്തിന്റെ വലിയൊരു ഭാഗം സംസ്ഥാനത്തിന്റെ സാമ്പത്തിക നിലയെക്കുറിച്ചായിരുന്നു. അടുത്തിടെ പുറത്തിറക്കിയ ധവളപത്രത്തെ (White Paper) ഉദ്ധരിച്ച്, കഴിഞ്ഞ അഞ്ച് വർഷത്തിനുള്ളിൽ തമിഴ്നാടിന്റെ കടം ഏകദേശം ഇരട്ടിയായി 10 ലക്ഷം കോടി രൂപയിലെത്തിയെന്ന് സർക്കാർ അറിയിച്ചു. ഇത് സംസ്ഥാനത്തിന്റെ ആഭ്യന്തര ഉത്പാദനത്തിന്റെ (GSDP) 28.3 ശതമാനമാണ്; അതായത് ഓരോ പൗരന്റെയും മേൽ ഒരു ലക്ഷം രൂപയിലധികം കടബാധ്യതയുണ്ട്.

സാമ്പത്തിക ഞെരുക്കത്തിനിടയിലും, സാമ്പത്തിക അച്ചടക്കം പുനഃസ്ഥാപിക്കുന്നതിനൊപ്പം തിരഞ്ഞെടുപ്പ് വാഗ്ദാനങ്ങൾ നിറവേറ്റുന്നതിൽ തങ്ങൾ പ്രതിജ്ഞാബദ്ധരാണെന്ന് സർക്കാർ വ്യക്തമാക്കി. അഴിമതിയും വരുമാന ചോർച്ചയും തടയുന്നതിനുള്ള നടപടികൾ പ്രസംഗത്തിൽ എടുത്തുപറഞ്ഞു. മദ്യ നിർമാതാക്കൾക്കുമേൽ അടുത്തിടെ ഏർപ്പെടുത്തിയ അധിക പ്രിവിലേജ് ഫീസിലൂടെ പ്രതിവർഷം 1,000 കോടി രൂപ വരെ സർക്കാർ വരുമാനം പ്രതീക്ഷിക്കുന്നുണ്ട്.

നിയമവിരുദ്ധ ഖനനത്തിനും നികുതി വെട്ടിപ്പിനുമെതിരെ കർശന നടപടികൾ സ്വീകരിക്കുമെന്ന് സർക്കാർ വാഗ്ദാനം ചെയ്തു. കർശനമായ നിയന്ത്രണങ്ങളിലൂടെയും നിയമങ്ങൾ നടപ്പിലാക്കുന്നതിലൂടെയും ധാതുക്കളിൽ നിന്നുള്ള വരുമാനം ഇരട്ടിയാക്കുമെന്നും അറിയിച്ചു. അന്തർസംസ്ഥാന വിഷയങ്ങളിൽ, കർണാടകയുടെ മേക്കേദാട്ടു പദ്ധതിക്കെതിരെയുള്ള തങ്ങളുടെ എതിർപ്പ് സർക്കാർ ആവർത്തിച്ചു. പദ്ധതി നടപ്പാക്കുന്നത് തടയാൻ ആവശ്യമായ എല്ലാ നിയമനടപടികളും സ്വീകരിക്കുമെന്നും കാവേരി നദീജലത്തിൽ തമിഴ്നാടിന്റെ വിഹിതം കൃത്യസമയത്ത് ലഭ്യമാക്കുമെന്ന് ഉറപ്പാക്കുമെന്നും അറിയിച്ചു.

വ്യാവസായിക വികസനം, പുതിയ വ്യാവസായിക നയം, നിക്ഷേപങ്ങൾക്കുള്ള വേഗത്തിലുള്ള അനുമതികൾ എന്നിവയിലൂടെ 2036-ഓടെ തമിഴ്നാടിനെ 1.5 ട്രില്യൺ ഡോളർ സമ്പദ് വ്യവസ്ഥയാക്കി മാറ്റുക എന്ന വലിയ സാമ്പത്തിക ലക്ഷ്യത്തെക്കുറിച്ച് പ്രസംഗത്തിൽ വിവരിച്ചു. കൂടാതെ, മെച്ചപ്പെട്ട കുടിവെള്ള വിതരണം, ആധുനിക അടിസ്ഥാന സൗകര്യങ്ങൾ, ഡിജിറ്റൽ ഭരണം, സുസ്ഥിര നഗരവികസനം എന്നിവയിലൂടെ 2031-ഓടെ തമിഴ്നാടിനെ നഗര മികവിൽ ഇന്ത്യയിലെ മാതൃകാ സംസ്ഥാനമാക്കാനും സർക്കാർ ലക്ഷ്യമിടുന്നു.

Content Highlights: Commitment to conduct a social justice survey following the national caste census. Strategic opposition to NEP 2020 and the three-language policy mandate. Resolution to demand equitable financial devolution from the Union Government. Targeting a 1.5-trillion-dollar state economy by 2036. Fiscal recovery plan involving anti-corruption drives and revenue leakage control.