'BBC ഡോക്യുമെന്ററി കേരളത്തില് പ്രദര്ശിപ്പിക്കാന് അനുവദിക്കരുത്, പിണറായി അടിയന്തരമായി ഇടപെടണം'
വിശാഖപട്ടണം: ഗുജറാത്ത് കലാപത്തെക്കുറിച്ചുള്ള ഡോക്യുമെന്ററി കേരളത്തില് പ്രദര്ശിപ്പിക്കാനുള്ള നീക്കം ഒരുതരത്തിലും അനുവദിക്കരുതെന്ന് കേന്ദ്രവിദേശകാര്യ സഹമന്ത്രി വി മുരളീധരന്. ഇക്കാര്യത്തില് മുഖ്യമന്ത്രി പിണറായി വിജയന് അടിയന്തരമായി ഇടപെടണമെന്നും കേന്ദ്രമന്ത്രി ഫെയ്സ്ബുക്കില് കുറിച്ചു.
രാജ്യത്തിന്റെ പരമോന്നത നീതിപീഠം തള്ളിക്കളഞ്ഞ ആരോപണങ്ങള് വീണ്ടും അവതരിപ്പിക്കുന്നത് സുപ്രീംകോടതിയുടെ വിശ്വാസ്യതയെ ചോദ്യം ചെയ്യലാണ്. പ്രദര്ശനം അനുവദിക്കുന്നത് ഇന്ത്യയുടെ ഐക്യവും അഖണ്ഡതയും അപകടപ്പെടുത്താനുള്ള വിദേശനീക്കങ്ങള്ക്ക് കൂട്ടുനില്ക്കുന്നതിന് തുല്യമാണെന്നും മുരളീധരന് കുറിപ്പില് പറയുന്നു.
സുപ്രീംകോടതിയെ അപമാനിക്കാന് കേരളത്തിന്റെ മണ്ണ് ഉപയോഗിക്കണോയെന്ന് സര്ക്കാര് തീരുമാനിക്കണം.
ഗുജറാത്തില് കഴിഞ്ഞ രണ്ടുദശകമായി കലാപങ്ങളില്ല, വികസനക്കുതിപ്പ് മാത്രമാണ് കാണാനാകുക. ഗുജറാത്ത് ജനത മറക്കാനാഗ്രഹിക്കുന്ന ഇരുണ്ട ദിനങ്ങളെ വീണ്ടും ഓര്മിപ്പിക്കുന്നതിലൂടെ എന്ത് സന്ദേശമാണ് നല്കുന്നതെന്നും മന്ത്രി ചോദിച്ചു.
ബിജെപിയുടെ വളര്ച്ചയില് അസ്വസ്ഥയുള്ളവരാണ് ഡോക്യുമെന്ററിക്ക് പിന്നിലെന്നും രാജ്യത്തിന്റെ പരമാധികാരത്തിനുമേല് കടന്നുകയറി വിദേശമാധ്യമം നടത്തുന്ന പ്രചാരവേലയ്ക്ക് കൂട്ടുനില്ക്കുന്നത് രാജ്യദ്രോഹമാണെന്നും അദ്ദേഹം പറഞ്ഞു.
Content Highlights: v muraleedharan against dyfi and youth congress