പിന്നില് രാഷ്ട്രീയ ലക്ഷ്യം, അടിയന്തരമായി തടയണം; ആഗോള അയ്യപ്പസംഗമത്തിനെതിരെ സുപ്രീംകോടതിയില് ഹര്ജി
ന്യൂഡല്ഹി : പമ്പ തീരത്ത് നടക്കാന് വേണ്ടി പോകുന്ന ആഗോള അയ്യപ്പസംഗമം തടയണമെന്ന് ആവശ്യപ്പെട്ട് സുപ്രീംകോടതിയില് ഹര്ജി. തിരുവിതാംകൂര് ദേവസ്വം ബോര്ഡിനെ മറയാക്കി സംസ്ഥാന സര്ക്കാര് രാഷ്ട്രീയ ലക്ഷ്യത്തോടെ നടത്തുന്ന പരിപാടിയാണെന്ന് ആരോപിച്ചാണ് ഹര്ജി. ദൈവത്തിന് അവകാശപ്പെട്ട ദേവസ്വം ഫണ്ട് രാഷ്ട്രീയ പരിപാടികള്ക്കായി വിനിയോഗിക്കാന് അനുവദിക്കരുതെന്നും ഹര്ജിയില് ആവശ്യപ്പെട്ടിട്ടുണ്ട്. ഹര്ജി അടിയന്തിരമായി പരിഗണിക്കണമെന്ന ആവശ്യം നാളെ സുപ്രീം കോടതിയില് ഉന്നയിച്ചേക്കും.
അയ്യപ്പ ഭക്തനായ ഡോ പി എസ് മഹേന്ദ്ര കുമാറാണ് അയ്യപ്പസംഗമം തടയണമെന്ന് ആവശ്യപ്പെട്ട് സുപ്രീംകോടതിയെ സമീപിച്ചത്. അയ്യപ്പസംഗമം സംസ്ഥാന സര്ക്കാര് തയ്യാറാക്കിയ പരിപാടിയാണ്. നിരീശ്വരവാദികളായ രാഷ്ട്രീയക്കാരെ സംഗമത്തിലേക്ക് ക്ഷണിച്ചതില് നിന്ന് ഇക്കാര്യം വ്യക്തമാണെന്ന് ഹര്ജിക്കാരന് ചൂണ്ടിക്കാട്ടുന്നു. എന്നാല് ഇന്ത്യന് ഭരണഘടനയുടെ അടിസ്ഥാന തത്വങ്ങളില് ഒന്ന് മതേതര്വതം ആണ്. ഏതെങ്കിലും ഒരു മതവിഭാഗത്തിന്റെ ആശയങ്ങള് പ്രചരിപ്പിക്കാന് സര്ക്കാരിന് അവകാശമില്ലെന്ന് ഹര്ജിയില് ചൂണ്ടിക്കാട്ടിയിട്ടുണ്ട്.
ആഗോള അയ്യപ്പസംഗമം തടഞ്ഞില്ലെങ്കില് ഭാവിയില് സര്ക്കാരുകള്ക്ക് മതസംഗമങ്ങളുടെ പേരില് രാഷ്ട്രീയ പരിപാടികള് നടത്താന് കഴിയുമെന്നും ഹര്ജിക്കാരന് ആരോപിക്കുന്നു. തിരുവിതാംകൂര് ദേവസ്വം ബോര്ഡിന് ആഗോള മതസംഗമം നടത്താന് ചട്ടപ്രകാരം കഴിയില്ല. ദേവസ്വം ബോര്ഡിനെ മറയാക്കി രാഷ്ട്രീയ ലക്ഷ്യത്തോടെ സര്ക്കാര് നടത്തുന്ന പരിപാടിയില് ക്ഷേത്ര ഫണ്ട് ഉപയോഗിക്കാന് കഴിയില്ലെന്നാണ് ഹര്ജിക്കാരുടെ മറ്റൊരു വാദം. ദേവസ്വം ഫണ്ട് ദൈവത്തിന് അവകാശപ്പെട്ടതാണെന്നാണ് ഹര്ജിയില് ചൂണ്ടിക്കാട്ടിയിരിക്കുന്നത്. ദേവസ്വംബോര്ഡ് ഫണ്ട് രാഷ്ട്രീയ ലക്ഷ്യങ്ങള്ക്കോ, പ്രചാരണങ്ങള്ക്കോ വിനിയോഗിക്കാന് പാടില്ല.
പമ്പ നദിയുടെ തീരപ്രദേശം പരിസ്ഥിതി ലോല മേഖലയാണ്. അവിടെ അയ്യപ്പ സംഗമം നടത്തുന്നത് ഹൈക്കോടതി പുറപ്പെടുവിച്ചിട്ടുള്ള മുന് നിര്ദേശങ്ങളുടെ ലംഘനം ആണെന്നും ഹര്ജിയില് ചൂണ്ടിക്കാട്ടിയിട്ടുണ്ട്. സീനിയര് അഭിഭാഷകന് പി ബി കൃഷ്ണന്, അഭിഭാഷകന് എം എസ് വിഷ്ണു ശങ്കര് തുടങ്ങിയവരാണ് ഹര്ജിക്കാര്ക്ക് വേണ്ടിഹാജരാകുന്നത്.
Content Highlights: Supreme Court Plea Against Global Ayyappa Samgam