പ്രിയങ്കാഗാന്ധിയുടെ മകന്റെ ചിത്രങ്ങൾക്ക് പ്രദർശനത്തിൽ വിലക്ക്; 105 ചിത്രങ്ങളിൽ 75 എണ്ണം നീക്കണം

ന്യൂഡൽഹി: കോൺഗ്രസ് നേതാവ് പ്രിയങ്കാ ഗാന്ധിയുടെ മകനും വന്യജീവി-സ്ട്രീറ്റ് ഫോട്ടോഗ്രാഫറുമായ റെയ്‌ഹാൻ വദ്രയുടെ 75 ചിത്രങ്ങൾ പ്രദർശിപ്പിക്കുന്നതിന് വിലക്ക്. ന്യൂഡൽഹിയിലെ ബിക്കാനീർ ഹൗസിൽ നടക്കുന്ന ‘നോ ഐഡിയ ഈസ് ഫൈനൽ’ എന്ന ചിത്രപ്രദർശനത്തിൽനിന്നാണ് ഡൽഹി സമരചിത്രങ്ങൾ ഉൾപ്പെടെ 75 ഫോട്ടോകൾ നീക്കംചെയ്യാൻ നിർദേശിച്ചത്.

പ്രദർശനം ആരംഭിക്കാൻ അഞ്ചുമണിക്കൂർമാത്രം ബാക്കിനിൽക്കെയാണ് അധികൃതർ ഈ നിലപാടെടുത്തത്. ആകെ പ്രദർശിപ്പിക്കാൻ നിശ്ചയിച്ചിരുന്ന 105 ഫോട്ടോഗ്രാഫുകളിൽ 75 എണ്ണവും നീക്കംചെയ്തതോടെ, ഗാലറിയുടെ ചുമരുകളിൽ ആണികളും ഒഴിഞ്ഞ ഇടങ്ങളുമാണ് കൂടുതൽ. ചിത്രങ്ങൾ മാറ്റാത്തപക്ഷം പരിപാടി റദ്ദാക്കുമെന്ന് സംഘാടകർ ഭീഷണിപ്പെടുത്തിയതായും റെയ്‌ഹാൻ സാമൂഹികമാധ്യമത്തിലൂടെ അറിയിച്ചിട്ടുണ്ട്.

സന്ദർശകർക്കായി നൽകിയ കാറ്റലോഗിൽ ഒഴിവാക്കപ്പെട്ട ചിത്രങ്ങളുടെ വിവരങ്ങളും ഉണ്ട്. ഡൽഹി ജന്തർമന്തറിലടക്കം നടന്ന യുവജന പ്രക്ഷോഭങ്ങളുടെ ദൃശ്യങ്ങളാണ് പ്രധാനമായും മാറ്റാൻ ആവശ്യപ്പെട്ടത്. ഇവയ്ക്ക് അമിത രാഷ്ട്രീയസ്വഭാവമുണ്ടെന്നും വേദി അനുവദിക്കുന്നതിനുള്ള മാനദണ്ഡങ്ങൾക്ക് വിരുദ്ധമാണെന്നുമാണ് ബിക്കാനീർ ഹൗസ് മാനേജ്‌മെന്റിന്റെ വാദം.

എന്നാൽ, മുൻകൂട്ടി നൽകിയ ലേഔട്ടിൽ എതിർപ്പ് ഉന്നയിക്കാതിരുന്ന അധികൃതർ, ഉദ്ഘാടനത്തിന് തൊട്ടുമുൻപുമാത്രം തീരുമാനം അടിച്ചേൽപ്പിക്കുകയായിരുന്നെന്ന് റെയ്‌ഹാൻ വദ്ര പറഞ്ഞു. ചിത്രങ്ങളിൽനിന്ന് പ്രകോപനപരമായ ഉള്ളടക്കങ്ങളും രാഷ്ട്രീയ മുദ്രാവാക്യങ്ങളും നേരത്തേതന്നെ ഒഴിവാക്കിയിരുന്നു. ഒരു കലാകാരൻ എന്ന നിലയിൽ സമരങ്ങളെ ഡോക്യുമെന്റ് ചെയ്യുകമാത്രമാണ് ചെയ്തത്. ദേശീയ പതാകയുള്ള ചിത്രങ്ങൾപോലും നീക്കംചെയ്യാൻ അധികൃതർ ആവശ്യപ്പെട്ടെങ്കിലും താൻ ശക്തമായി എതിർത്തു. ഒടുവിൽ പ്രദർശനം മുടങ്ങാതിരിക്കാൻ ചിത്രങ്ങൾ മാറ്റാൻ നിർബന്ധിതനാവുകയായിരുന്നു. ഒഴിവാക്കപ്പെട്ട ചിത്രങ്ങൾ മറ്റൊരു വേദിയിൽ പ്രദർശിപ്പിക്കുമെന്നും റെയ്‌ഹാൻ അറിയിച്ചു.

Content Highlights: 75 out of 105 photographs by Reihan Vadra removed from the 'No Idea Is Final' exhibition., Exhibition held at Bikaner House, New Delhi, faced last-minute censorship just hours before opening., Removed images included documentation of youth protests at Jantar Mantar and national flag photos., Authorities claimed the photos had excessive political content violating venue guidelines., Reihan Vadra stated that provocative content was already removed and plans to exhibit the censored photos elsewhere.