വാർത്താസമ്മേളനത്തിനിടെ പപ്പു യാദവിന് നേരെ ആക്രമണം; പ്രതികൾ പിടിയിൽ, വധശ്രമമെന്ന് പപ്പു യാദവ്
ന്യൂഡൽഹി: സ്വതന്ത്ര പാർലമെന്റ് അംഗം പപ്പു യാദവിന് നേരെ വധശ്രമമുണ്ടായതായി പരാതി. ഞായറാഴ്ച ഡൽഹിയിലെ വസതിയിൽ വെച്ച് നടന്ന വാർത്താസമ്മേളനത്തിനിടെ അപ്രതീക്ഷിതമായി ഒരു സംഘം ആളുകൾ എംപിയെ തടയുകയായിരുന്നു. തുടർന്ന് അദ്ദേഹത്തിന്റെ അനുയായികളുമായി സംഘർഷമുണ്ടാവുകയും സുരക്ഷാ ഉദ്യോഗസ്ഥർ ഇവരെ കസ്റ്റഡിയിലെടുക്കുകയുമായിരുന്നു.
തന്നെ വധിക്കാൻ നടന്ന ആസൂത്രിതമായ നീക്കമാണിതെന്ന് പപ്പു യാദവ് ആരോപിച്ചു. സംഭവസ്ഥലത്തുനിന്ന് ഒരു കത്തി കണ്ടെടുത്തതായി പപ്പു യാദവ് പറഞ്ഞു. തന്നെ കൊല്ലാൻ 51 ലക്ഷം രൂപ പാരിതോഷികം പ്രഖ്യാപിച്ചതായി 'ബാബാമാർ' പറഞ്ഞിട്ടുണ്ട്. തന്റെ മക്കളെപ്പോലും ഭീഷണിപ്പെടുത്താൻ ശ്രമം നടക്കുന്നുണ്ടെന്നും തന്നെ കൊല്ലാനുള്ള ഗൂഢാലോചനയിൽനിന്ന് തലനാരിഴയ്ക്കാണ് രക്ഷപ്പെട്ടതെന്നും അദ്ദേഹം കൂട്ടിച്ചേർത്തു.
#WATCH | The moment the clash erupted while Independent MP from Purnea, Pappu Yadav, was holding a press conference at his residence in Delhi. Further details awaited. pic.twitter.com/NzYEGww5of
— ANI (@ANI) August 2, 2026
സംഭവത്തിൽ ഉത്തർപ്രദേശിലെ ബുലന്ദ്ഷഹർ സ്വദേശിയായ സുമിത് എന്നയാളെയും കൂട്ടാളിയായ ഹാപ്പിയെയും ഡൽഹി പോലീസ് കസ്റ്റഡിയിലെടുത്തു. വാർത്താസമ്മേളനത്തിനിടെ സുമിത് എംപിക്ക് നേരെ ചെരുപ്പെറിഞ്ഞതോടെയാണ് സംഘർഷമുണ്ടായതെന്ന് പോലീസ് വൃത്തങ്ങൾ അറിയിച്ചു. പാർലമെന്റിനുള്ളിൽ പ്രതിപക്ഷം നടത്തിയ രാമക്ഷേത്ര നിർമാണവുമായി ബന്ധപ്പെട്ട ആക്ഷേപഹാസ്യ നാടകത്തെ തുടർന്നുള്ള തർക്കങ്ങളാണ് ആക്രമണത്തിന് പിന്നിലെന്നാണ് സൂചന.
രാമക്ഷേത്ര നിർമാണത്തിനായി ശേഖരിച്ച സംഭാവനകളിലെ ക്രമക്കേടുകൾ ആരോപിച്ചുകൊണ്ട് ജൂലൈ 31-നാണ് പ്രതിപക്ഷ എംപിമാർ പാർലമെന്റ് സമുച്ചയത്തിനുള്ളിൽ നാടകം അവതരിപ്പിച്ചത്. ഇതിൽ കാവി വസ്ത്രം ധരിച്ച് പൂജാരിയുടെ വേഷത്തിലാണ് പപ്പു യാദവ് അഭിനയിച്ചത്. ഈ പ്രകടനം മതവികാരം വ്രണപ്പെടുത്തിയെന്ന് ആരോപിച്ച് ബിജെപി നേതാവ് ബാൻസുരി സ്വരാജ് ഉൾപ്പെടെയുള്ളവർ പോലീസിൽ പരാതി നൽകിയിരുന്നു. പ്രകടനത്തിനെതിരെ വാരണാസിയിലും ഡൽഹിയിലും കേസുകൾ രജിസ്റ്റർ ചെയ്യുകയും ബജ്റങ്ദൾ സംഘടന പ്രതിഷേധം സംഘടിപ്പിക്കുകയും ചെയ്തിരുന്നു.
Content Highlights: Independent MP Pappu Yadav alleges assassination attempt at his Delhi residence., Police arrested a suspect, Sumit from Bulandshahr, for throwing a slipper and carrying a knife., The attack is allegedly linked to a controversial Ram Mandir skit performed by opposition MPs., Pappu Yadav claims a reward of 51 lakhs was announced for his life., BJP leaders have filed complaints against the MP for allegedly hurting religious sentiments.