'ക്ഷമ ചോദിക്കുന്നു'; ബി.ജെ.ഡി.യുടെ കനത്ത തോൽവി, സജീവ രാഷ്ട്രീയം ഉപേക്ഷിച്ച് വി.കെ. പാണ്ഡ്യന്‍
ഭുവനേശ്വര്‍: ബിജു ജനതാദള്‍(ബി.ജെ.ഡി) നേതാവും മുന്‍ ഐ.എ.എസ്. ഉദ്യോഗസ്ഥനുമായ വി.കെ. പാണ്ഡ്യന്‍ സജീവ രാഷ്ട്രീയം ഉപേക്ഷിച്ചു. ഒഡിഷയിലെ നിയമസഭ, ലോക്‌സഭ തിരഞ്ഞെടുപ്പുകളില്‍ ബി.ജെ.ഡി.ക്ക് കനത്ത തോല്‍വി ഏറ്റുവാങ്ങേണ്ടിവന്ന സാഹചര്യത്തിലാണ് സജീവ രാഷ്ട്രീയത്തില്‍നിന്ന് പിന്മാറുകയാണെന്ന് അദ്ദേഹം പ്രഖ്യാപിച്ചത്. ബിജു ജനതാദള്‍ നേതാവും മുന്‍ മുഖ്യമന്ത്രിയുമായ നവീന്‍ പട്‌നായിക്കിന്റെ അടുത്ത അനുയായിയാണ് പാണ്ഡ്യന്‍.
നവീന്‍ ബാബുവിനെ സഹായിക്കുകയെന്നത് മാത്രം ഉദ്ദേശിച്ചാണ് താന്‍ രാഷ്ട്രീയത്തില്‍ പ്രവേശിച്ചതെന്നായിരുന്നു ഞായറാഴ്ച പുറത്തിറക്കിയ വീഡിയോസന്ദേശത്തില്‍ പാണ്ഡ്യന്റെ വിശദീകരണം. ഇപ്പോള്‍ സജീവരാഷ്ട്രീയത്തില്‍നിന്ന് പിന്മാറാന്‍ താന്‍ തീരുമാനിച്ചിരിക്കുന്നു. ഈ യാത്രയ്ക്കിടെ ആരെയെങ്കിലും വേദനപ്പിച്ചെങ്കില്‍ ക്ഷമിക്കണം. തനിക്കെതിരേയുള്ള പ്രചരണത്തില്‍ പാര്‍ട്ടിക്ക് നഷ്ടമുണ്ടായെങ്കില്‍ അതിനും ക്ഷമചോദിക്കുന്നു. തന്നോടൊപ്പം സഹകരിച്ച ലക്ഷക്കണക്കിന് വരുന്ന ബിജു പരിവാര്‍ അംഗങ്ങള്‍ക്ക് നന്ദി. എല്ലായ്‌പ്പോഴും ഹൃദയത്തിനുള്ളില്‍ ഒഡിഷയും ശ്വാസമായി ഗുരു നവീന്‍ ബാബുവും ഉണ്ടായിരിക്കും. അവരുടെ ക്ഷേമത്തിനായി ജഗദീശ്വരനോട് പ്രാര്‍ഥിക്കുമെന്നും പാണ്ഡ്യന്‍ വീഡിയോ സന്ദേശത്തില്‍ പറഞ്ഞു.
കഴിഞ്ഞവര്‍ഷമാണ് സിവില്‍ സര്‍വീസില്‍നിന്ന് രാജിവെച്ച് അദ്ദേഹം ബി.ജെ.ഡി.യില്‍ ചേര്‍ന്നത്. ഒഡിഷയിലെ തിരഞ്ഞെടുപ്പില്‍ ബി.ജെ.ഡി.യുടെ പ്രചരണത്തിന് ചുക്കാന്‍ പിടിച്ചതും പാണ്ഡ്യനായിരുന്നു.
12 വര്‍ഷത്തോളം നവീന്‍ പട്‌നായിക്കിനൊപ്പം സിവില്‍ സര്‍വീസ് ഉദ്യോഗസ്ഥനായി പ്രവര്‍ത്തിച്ചിരുന്ന പാണ്ഡ്യനെ പട്‌നായിക്കിന്റെ പിന്‍ഗാമിയെന്നാണ് വിശേഷിപ്പിച്ചിരുന്നത്. ഗഞ്ജം ജില്ലാ കളക്ടറായിരിക്കുമ്പോള്‍ 2011-ലാണ് പാണ്ഡ്യനെ നവീന്‍ പട്‌നായിക് കൂടെ കൂട്ടുന്നത്. പാണ്ഡ്യന്റെ കഴിവുകള്‍ തിരിച്ചറിഞ്ഞ നവീന്‍ പട്‌നായിക് സംസ്ഥാനത്തിന്റെ വികസന സ്വപ്നങ്ങള്‍ക്കായി രൂപീകരിച്ച തന്റെ ടീമിന്റെ ഭാഗമാക്കി. മുഖ്യമന്ത്രിയുടെ പ്രൈവറ്റ് സെക്രട്ടറിയായിട്ടായിരുന്നു പാണ്ഡ്യന്റെ നിയമനം. ഇതോടെ നവീന്‍ പട്നായിക്ക് വിഭാവനം ചെയ്ത ല 5ടി സംരംഭങ്ങള്‍ക്ക് വി കെ. പാണ്ഡ്യന്‍ ക്യൂറേറ്ററായി. ഒഡീഷയുടെ വികസനങ്ങള്‍ക്കും പരിവര്‍ത്തനത്തിനുമായി രൂപീകരിച്ച പദ്ധതിയാണ് 5 ടി എന്നത്. കോവിഡ് കാലത്തും പാണ്ഡ്യന്റെ പ്രവര്‍ത്തനങ്ങള്‍ ശ്രദ്ധ നേടപ്പെട്ടു. ഒഡിഷ മുഖ്യമന്ത്രിയുടെ ഭാഗത്ത് നിന്ന് പലപ്പോഴും അവലോകന യോഗങ്ങളില്‍ പങ്കെടുത്തത് പാണ്ഡ്യനായിരുന്നു. ഇതോടെ ഒഡിഷയില്‍ ഭരണം നടത്തുന്നത് നവീന്‍ പട്നായിക്ക് അല്ലെന്നും പാണ്ഡ്യനാണെന്നും പ്രതിപക്ഷം ആരോപിച്ചു.
നവീന്‍ പട്‌നായിക്കിന്റെ വലംകൈയായി അറിയപ്പെട്ടിരുന്ന പാണ്ഡ്യന്‍ ഇതിനുപിന്നാലെയാണ് സിവില്‍ സര്‍വീസില്‍നിന്ന് രാജിവെച്ചത്. തൊട്ടടുത്തദിവസം നവീന്‍ പട്നായിക്ക് സര്‍ക്കാരില്‍ ക്യാബിനറ്റ് പദവിയോടെ പുതിയ ചുമതലയും കിട്ടി. തുടര്‍ന്ന് 2024-ലെ നിയമസഭ, ലോക്‌സഭ തിരഞ്ഞെടുപ്പിന് ബി.ജെ.ഡി.യുടെ തന്ത്രങ്ങള്‍ ആവിഷ്‌കരിച്ചതും പാണ്ഡ്യനായിരുന്നു. എന്നാല്‍, ഇതേ പാണ്ഡ്യനെതിരേ ആരോപണങ്ങള്‍ ഉന്നയിച്ചാണ് ബി.ജെ.പി. പ്രചരണം നയിച്ചത്. ഒഡിഷയ്ക്ക് പുറത്തുനിന്നുള്ളയാള്‍ സംസ്ഥാനത്തിന്റെ മുഖ്യമന്ത്രിയാകണോ എന്നതായിരുന്നു ബി.ജെ.പി.യുടെ ചോദ്യം.
Content Highlights: odisha bjd leader vk pandian quits active politics