ബിജെപി, ജെഡിഎസ് ക്രോസ് വോട്ടിങ്; ഒറ്റുകാരെ വെറുതെ വിടില്ലെന്ന് ബി.വൈ. വിജയേന്ദ്ര

ബെംഗളൂരൂ: കർണാടക നിയമനിർമ്മാണ കൗൺസിൽ തിരഞ്ഞെടുപ്പിലെ ക്രോസ് വോട്ടിങ് നടന്നതോടെ ബിജെപി, ജെഡിഎസ് ക്യാമ്പുകളിൽ വിള്ളലുകൾ രൂപംകൊണ്ടു. പാർട്ടി നിലപാടിന് വിരുദ്ധമായി വോട്ട് ചെയ്തവരെ തിരിച്ചറിഞ്ഞിട്ടുണ്ടെന്നും അവർക്കെതിരെ കർശനമായ അച്ചടക്ക നടപടി സ്വീകരിക്കുമെന്നും കർണാടക ബിജെപി അധ്യക്ഷൻ ബി.വൈ വിജയേന്ദ്ര വ്യക്തമാക്കി.

ബിജെപിയിൽ നിന്ന് അഞ്ചോ ആറോ എംഎൽഎമാരും ജെഡിഎസിൽ നിന്ന് ആറോ ഏഴോ പേരും കോൺഗ്രസിന് അനുകൂലമായി വോട്ട് ചെയ്തതായാണ് അദ്ദേഹത്തിന്റെ പ്രാഥമിക കണക്കുകൂട്ടൽ. പാർട്ടിക്കുള്ളിലെ ആഭ്യന്തര കലഹങ്ങളും സംസ്ഥാന നേതൃത്വത്തോടുള്ള അതൃപ്തിയുമാണ് ഈ തിരിച്ചടിക്ക് കാരണമായതെന്നാണ് വിലയിരുത്തപ്പെടുന്നത്.

ബെംഗളൂരു നഗരസഭാ തിരഞ്ഞെടുപ്പിനും 2028-ലെ നിയമസഭാ തിരഞ്ഞെടുപ്പിനും മുന്നോടിയായി സ്വന്തം പാളയത്തിലെ ഐക്യം പരിശോധിക്കാൻ ശ്രമിച്ച ജെഡിഎസിന് ഈ ഫലം കനത്ത തിരിച്ചടിയായി. ജെഡിഎസിലെ നാല് പേർ കോൺഗ്രസിന് വോട്ട് ചെയ്തതായി എച്ച്.ഡി കുമാരസ്വാമി സമ്മതിച്ചു. പാർട്ടി വിടാൻ ആഗ്രഹിക്കുന്നവർക്ക് പോകാമെന്നും യുവാക്കളെ അണിനിരത്തി പാർട്ടി കെട്ടിപ്പടുക്കുന്നതിലാണ് ഇനി ശ്രദ്ധ കേന്ദ്രീകരിക്കുകയെന്നും അദ്ദേഹം വ്യക്തമാക്കി. അച്ചടക്ക നടപടികളിൽ അന്തിമ തീരുമാനം തന്റേതായിരിക്കുമെന്നും അദ്ദേഹം പറഞ്ഞു.

ആകെ ഏഴ് സീറ്റുകളിലേക്ക് നടന്ന പോരാട്ടത്തിൽ കോൺഗ്രസ് അഞ്ചെണ്ണം പിടിച്ചെടുത്തപ്പോൾ ബിജെപിക്ക് രണ്ട് സീറ്റുകൾ കൊണ്ട് തൃപ്തിപ്പെടേണ്ടി വന്നു. ഈ തിരഞ്ഞെടുപ്പോടെ മുഖ്യമന്ത്രി ഡി.കെ ശിവകുമാറിന്റെയും ബി.കെ ഹരിപ്രസാദിന്റെയും നേതൃത്വത്തിലുള്ള കോൺഗ്രസ് ക്യാമ്പ് കൂടുതൽ കരുത്താർജ്ജിച്ചു. പ്രതീക്ഷിച്ചിരുന്ന 140 വോട്ടുകൾക്ക് പകരം 151 വോട്ടുകൾ നേടിയത് കോൺഗ്രസിന്റെ തന്ത്രപരമായ നീക്കങ്ങളുടെ വിജയമായി കാണപ്പെടുന്നു. കോൺഗ്രസ് സ്ഥാനാർഥികളായ തിപ്പണ്ണപ്പ കംക്നൂർ, പി.വി മോഹൻ, ബി.കെ ഹരിപ്രസാദ്, ശിവണ്ണ ബി.എസ്, വിനയ് കാർത്തിക് പ്രകാശ് എന്നിവർ വിജയം നേടി.

Content Highlights: Congress wins 5 Karnataka Legislative Council seats as BJP and JD(S) face internal revolt.