ആവശ്യം കൂടുതൽ, ഉൽപ്പാദനം കുറവ്‌, കാത്തിരിക്കുന്നത് വലിയ വൈദ്യുത പ്രതിസന്ധി; കൽക്കരി ലഭ്യത കുറഞ്ഞത് തിരിച്ചടി

ന്യൂഡൽഹി: രാജ്യത്ത് വൈദ്യുതി ആവശ്യകത റെക്കോർഡ് തലത്തിലേക്ക് ഉയർന്നതിനൊപ്പം താപവൈദ്യുതി നിലയങ്ങളിൽ കൽക്കരിക്ഷാമം രൂക്ഷമായതോടെ സ്‌പോട്ട് വിപണിയിൽ വൈദ്യുതി നിരക്കുകൾ കുത്തനെ ഉയർന്നു. ഇന്ത്യൻ എനർജി എക്‌സ്‌ചേഞ്ചിൽ (IEX) സെപ്റ്റംബറിലെ ശരാശരി ഡേ-എഹെഡ് മാർക്കറ്റ് വില മുൻവർഷത്തെ അപേക്ഷിച്ച് 105% വർദ്ധിച്ച് യൂണിറ്റിന് 7.30 രൂപയായി ഉയർന്നു. സെൻട്രൽ ഇലക്ട്രിസിറ്റി അതോറിറ്റിയുടെ കണക്കനുസരിച്ച്, കൽക്കരി ശേഖരം അപകടനിലയിലേക്ക് താഴ്ന്ന വൈദ്യുതി നിലയങ്ങളുടെ എണ്ണം 90 ആയി ഉയർന്നു. രാജ്യത്തെ 190 താപവൈദ്യുതി നിലയങ്ങളിലായി ആകെ 20.5 മില്യൺ ടൺ കൽക്കരി മാത്രമാണുള്ളത്. ഇത് സാധാരണയായി വേണ്ടതിന്റെ 33% മാത്രമാണ്.

സെപ്റ്റംബർ 10-ന് രാജ്യത്തെ പീക്ക് ഡിമാൻഡ് 269 ഗിഗാവാട്ടിൽ എത്തി. സെപ്റ്റംബറിലെ രാജ്യത്തെ ആകെ വൈദ്യുതി ഉപഭോഗം 11% വർദ്ധിച്ച് 162 ബില്യൺ യൂണിറ്റായി. ഇന്ത്യയിലെ ഏറ്റവും വലിയ വൈദ്യുതി ഉൽപ്പാദകരായ എൻടിപിസിയുടെ 50 നിലയങ്ങളിൽ ഭൂരിഭാഗത്തിലും വെറും 7 ദിവസത്തേക്കുള്ള കൽക്കരി ശേഖരം മാത്രമാണുള്ളത്. ഏപ്രിലിൽ 18.7 മില്യൺ ടൺ ഉണ്ടായിരുന്ന ഇവരുടെ ശേഖരം ഇപ്പോൾ 5.2 മില്യൺ ടണ്ണായി കുറഞ്ഞു.

കൽക്കരി ലഭ്യതക്കുറവ് മൂലം വിന്ധ്യാചൽ, സിംഗ്രൗളി, സിപത്, കോർബ തുടങ്ങിയ എൻടിപിസിയുടെ താപവൈദ്യുതി നിലയങ്ങളുടെ പ്രവർത്തനത്തിൽ തടസ്സങ്ങൾ നേരിട്ടിട്ടുണ്ട്. കൃത്യമായ ഏകോപനത്തിലൂടെ സാഹചര്യം മെച്ചപ്പെടുത്തിയില്ലെങ്കിൽ വരുന്ന ഫെബ്രുവരിയോടെ രാജ്യത്ത് കടുത്ത വൈദ്യുതി ക്ഷാമത്തിന് സാധ്യതയുണ്ടെന്ന് അധികൃതർ വ്യക്തമാക്കുന്നു. അതേസമയം, ഒക്ടോബർ ആദ്യവാരം വൈദ്യുതി നിലയങ്ങളിലേക്കുള്ള കൽക്കരി വിതരണം വർദ്ധിപ്പിച്ചിട്ടുണ്ടെന്ന് കൽക്കരി മന്ത്രാലയം അറിയിച്ചു.

Content Highlights: India's electricity demand hits record highs as coal shortages worsen, causing a sharp rise in spot market prices and potential power shortages.