AIADMK പിളർന്നു; ഷണ്മുഖം പക്ഷം വിജയ്ക്കൊപ്പം, തോറ്റുമടുത്ത പാർട്ടിയെ പുനരുജ്ജീവിപ്പിക്കുക ലക്ഷ്യം

ചെന്നൈ: തമിഴ്‌നാട്ടിൽ എ.ഐ.എ.ഡി.എം.കെ.യിലെ ഒരുവിഭാഗം ടി.വി.കെ.യ്ക്ക് പിന്തുണ പ്രഖ്യാപിച്ചു. സി.വി. ഷണ്മുഖം നയിക്കുന്ന വിഭാഗമാണ് ഭരണപക്ഷത്തിന് പിന്തുണയറിയിച്ചത്. പിന്നാലെ ചൊവ്വാഴ്ച മുഖ്യമന്ത്രി ജോസഫ് വിജയ്‌യെ കാണാൻ ഉദ്ദേശിക്കുന്നുണ്ടെന്നും ഷണ്മുഖം പറഞ്ഞു. സംസ്ഥാനത്ത് എ.ഐ.എ.ഡി.എം.കെ.യ്ക്ക് തുടർച്ചയായുണ്ടായ തോൽവികളാണ് ഈ മാറ്റത്തിന് കാരണമെന്നും അദ്ദേഹം ചൂണ്ടിക്കാട്ടി.

പാർട്ടിയെ പുനരുജ്ജീവിപ്പിക്കാൻ അതിന്റെ ഭാവിയെക്കുറിച്ച് ചർച്ച വേണമെന്ന് ഷണ്മുഖം പറഞ്ഞു. ടി.വി.കെ. സർക്കാർ രൂപവത്കരിക്കുന്നതിനെ തടയാൻ മുൻ മുഖ്യമന്ത്രി എടപ്പാടി കെ. പളനിസാമി ഡി.എം.കെ.യുമായി സഖ്യം ചേരുന്നതിനെക്കുറിച്ച് ചിന്തിച്ചതിനെയും അദ്ദേഹം വിമർശിച്ചു. കഴിഞ്ഞ 53 വർഷമായി ഡി.എം.കെ.യ്‌ക്കെതിരേ നിലകൊള്ളുന്ന പാർട്ടിയാണ് ഐ.ഐ.എ.ഡി.എം.കെ.യെന്നും അദ്ദേഹം പറഞ്ഞു.

അതേസമയം എ.ഐ.എ.ഡി.എം.കെ.യെ പിളർത്താൻ തനിക്ക് ഉദ്ദേശ്യമില്ലെന്നും ഷണ്മുഖം പറയുന്നു. നിലവിൽ തങ്ങൾക്ക് സഖ്യമില്ല. പാർട്ടിയുടെ പുനരുജ്ജീവനത്തിലും ശക്തിപ്പെടുത്തലിലുമാണ് ശ്രദ്ധ. വിജയിച്ച ടി.വി.കെ.യ്ക്ക് പിന്തുണ നൽകാൻ തങ്ങൾ തീരുമാനിച്ചെന്നും അദ്ദേഹം പറഞ്ഞു.

വിജയ്‌യുടെ പാർട്ടി 234 സീറ്റുകളിൽ 108 സീറ്റുകൾ നേടിയാണ് വിജയിച്ചത്. കേവല ഭൂരിപക്ഷത്തിന് വീണ്ടും ആവശ്യമായ പത്തു സീറ്റുകളിൽ അഞ്ചെണ്ണം കോൺഗ്രസ് നൽകി. ബാക്കി സീറ്റുകൾ നൽകാൻ ഷണ്മുഖം പക്ഷം തയ്യാറായിരുന്നു. എന്നാൽ ഇടതുപാർട്ടികളിൽനിന്ന് നാല് സീറ്റും വിടുതലൈ ചിരുതൈകൾ കക്ഷിയിൽനിന്ന് രണ്ടു സീറ്റും ലഭിച്ചതോടെ ടി.വി.കെ.യ്ക്ക് ഭരണമുറപ്പിക്കാൻ സാധിച്ചു.

Content Highlights: CV Shanmugam-led faction breaks from EPS to support TVK government., Motivation driven by repeated AIADMK electoral defeats., Rejection of potential AIADMK-DMK alliance proposal., TVK secures majority government in 2026 with new coalition support., Internal power struggle within AIADMK leadership intensifies.