‘ഭീരുവാണെന്ന് വീണ്ടും തെളിയിച്ചു, 17 ദിവസവും സഭയിലെത്തിയില്ല’ അമിത് ഷായെ പരിഹസിച്ച് ജയ്റാം രമേശ്

ന്യൂഡൽഹി: തുടർച്ചയായ പതിനേഴാം ദിവസവും ലോക്‌സഭയിൽ ഹാജരാകാത്ത കേന്ദ്ര ആഭ്യന്തര മന്ത്രി അമിത് ഷായെ പരിഹസിച്ച് കോൺഗ്രസ് നേതാവ് ജയ്‌റാം രമേശ്. ഭീഷണിപ്പെടുത്തുന്നവർ യഥാർത്ഥത്തിൽ ഭീരുക്കളാണെന്ന് അദ്ദേഹം വീണ്ടും തെളിയിച്ചിരിക്കുന്നുവെന്ന് അദ്ദേഹം എക്‌സിൽ പ്രതികരിച്ചു.

കഴിഞ്ഞ 17 ദിവസമായി അമിത് ഷാ ലോക്സഭയിലും രാജ്യസഭയിലും എത്തിയിട്ടില്ല. ഇതൊരു അസാധാരണമായ കാര്യമാണ്. സ്വാഭാവികമായും ഒരു ചോദ്യം ഉയരുന്നു, അദ്ദേഹത്തിന് സുഖമാണോ? ഒന്നാമനും രണ്ടാമനും തമ്മിൽ എല്ലാം ശരിയാണോ?രാജ്യം അത് അറിയാൻ ആഗ്രഹിക്കുന്നു- അദ്ദേഹം കുറിച്ചു.

അതേസമയം കോൺഗ്രസ് ചർച്ചകളിൽ നിന്ന് ഓടിപ്പോവുകയാണെന്നും ആഭ്യന്തരമന്ത്രി മറുപടി നൽകാൻ തയ്യാറാണെന്നുമാണ് കേന്ദ്രമന്ത്രി കിരൺ റിജിജു തിരിച്ചടിച്ചത്. സർക്കാർ ചർച്ചയ്ക്ക് സന്നദ്ധമാണെന്ന് അറിയിച്ചിട്ടും രാഹുൽ ഗാന്ധിയുടെ നേതൃത്വത്തിലുള്ള പ്രതിപക്ഷം സഭാനടപടികളുമായി സഹകരിക്കുന്നില്ല. ഇന്നും ഞങ്ങൾ തയ്യാറായിരുന്നുവെന്ന് റിജിജു സഭയ്ക്ക് പുറത്ത് മാധ്യമപ്രവർത്തകരോട് പ്രതികരിച്ചു.

'വിദ്യാർത്ഥികളുടെ പ്രതിഷേധവുമായി ബന്ധപ്പെട്ട എല്ലാ കാര്യങ്ങളെക്കുറിച്ചും പൂർണ്ണവും വിശദവുമായ ചർച്ചയ്ക്ക് തയ്യാറാണ്. സർക്കാരും കേന്ദ്ര ആഭ്യന്തര മന്ത്രി ഷായും മറുപടി നൽകാൻ തയ്യാറാണ്. എന്നാൽ അവർ (പ്രതിപക്ഷം) ചർച്ച നടക്കാൻ അനുവദിക്കുന്നില്ല. ഇന്നും ഞങ്ങൾ തയ്യാറായിരുന്നു. പക്ഷേ കോൺഗ്രസ് ഒഴിഞ്ഞുമാറുകയും പുറത്ത് മുദ്രാവാക്യം വിളിക്കുകയും ചെയ്ത് ചർച്ച തടസ്സപ്പെടുത്തി. ചർച്ചയിൽ നിന്ന് കോൺഗ്രസ് ഒഴിഞ്ഞുമാറുന്നത് നിർഭാഗ്യകരമാണ്. സർക്കാർ ചർച്ചയ്ക്ക് തയ്യാറാണെന്ന കാര്യം ജനങ്ങൾക്ക് വ്യക്തമാണ്. തുടക്കം മുതൽ രാഹുൽ ഗാന്ധി പറഞ്ഞത് ആഭ്യന്തരമന്ത്രി പ്രസ്താവന നടത്തണം എന്നായിരുന്നു അത്. ഞങ്ങൾ പറയുന്നത്, എല്ലാ കാര്യങ്ങളിലും വിശദമായ ചർച്ച നടത്താനും ഓരോ വിഷയത്തിലും മറുപടി നൽകാനും ഞങ്ങൾ തയ്യാറാണെന്നാണ്...'അദ്ദേഹം പറഞ്ഞു. കോൺഗ്രസ് പാർട്ടി ഇതിൽ നിന്ന് ഒഴിഞ്ഞുമാറരുതെന്നും അദ്ദേഹം കൂട്ടിച്ചേർത്തു. വിദ്യാർത്ഥി സമരങ്ങളും അയോധ്യയിലെ അഴിമതി ആരോപണങ്ങളും ഉന്നയിച്ച് പ്രതിപക്ഷം പാർലമെന്റ് തടസ്സപ്പെടുത്തുന്ന സാഹചര്യത്തിലാണ് ഇരുനേതാക്കളുടെയും രൂക്ഷമായ പ്രതികരണം. 

ഡൽഹിയിൽ പ്രതിഷേധിച്ച വിദ്യാർത്ഥികൾക്ക് നേരെ പോലീസ് ലത്തിചാർജ് നടത്തുകയും കണ്ണീർവാതകം പ്രയോഗിക്കുകയും ചെയ്തിരുന്നു. ക്രമസമാധാന പാലനത്തിന്റെ ഭാഗമായി മെട്രോ സ്റ്റേഷൻ കവാടങ്ങൾ അടയ്ക്കുകയും ചിലയിടങ്ങളിൽ ഇന്റർനെറ്റ് വിച്ഛേദിക്കുകയും ചെയ്തിരുന്നു. റാഞ്ചിയിൽ നടന്ന വിദ്യാർത്ഥി പ്രതിഷേധങ്ങൾക്കിടെ പോലീസ് ജലപീരങ്കിയും ലത്തിച്ചാർജും ഉപയോഗിച്ചു. ഝാർഖണ്ഡ് വിദ്യാർത്ഥി നേതാവായ ദേവേന്ദ്ര നാഥ് മഹ്‌തോയ്ക്ക് നേരെ നടന്ന പോലീസ് നടപടിയും വലിയ തോതിൽ വിമർശിക്കപ്പെട്ടു. വിദ്യാർത്ഥികൾക്ക് നേരെ നടന്ന ഈ പോലീസ് അതിക്രമങ്ങളെക്കുറിച്ച് ആഭ്യന്തര മന്ത്രി അമിത് ഷാ പാർലമെന്റിൽ മറുപടി പറയണമെന്നായിരുന്നു പ്രതിപക്ഷത്തിന്റെ ആവശ്യം. ഈ വിഷയങ്ങളിൽ പൂർണ്ണമായ ചർച്ചയ്ക്ക് തയ്യാറാണെന്ന് സർക്കാർ അറിയിച്ചെങ്കിലും അതിക്രമങ്ങളിൽ വ്യക്തമായ മറുപടിയും പ്രധാനമന്ത്രിയുടെ മാപ്പപേക്ഷയും വേണമെന്നാണ് പ്രതിപക്ഷത്തിന്റെ ആവശ്യം.

Content Highlights: Congress leader Jairam Ramesh mocks Amit Shah for missing 17 consecutive days in Lok Sabha., Union Minister Kiren Rijiju retaliates, stating the government is ready for discussion but the opposition is running away., Opposition demands Amit Shah's statement and Prime Minister's apology over student protests and police action.