സൈനികന്റെ തിരോധാനം; വസ്ത്രങ്ങള്‍ ലഭിച്ചു, സൈനികന് വേണ്ടി അന്വേഷണം പുരോഗമിക്കുന്നു

ശ്രീനഗർ: കശ്മീരിലെ ഷോപ്പിയാനിൽ തീവ്രവാദികൾ തട്ടിക്കൊണ്ടുപോയതായി കരുതുന്ന സൈനികന്റെ വസ്ത്രങ്ങൾ കണ്ടെത്തി. സൈനികൻ താമസിച്ചിരുന്ന വീട്ടിൽനിന്നു മൂന്ന് കിലോ മീറ്റര്‍ ദൂരത്ത് നിന്നാണ് വസ്ത്രം ലഭിച്ചത്. മൂന്ന് സ്ഥലങ്ങളിൽ നിന്നായി ലഭിച്ച വസ്ത്രത്തിന്റെ കഷ്ണങ്ങൾ പ്രാദേശികവാസികളാണ് സുരക്ഷാജീവനക്കാരെ ഏൽപ്പിച്ചത്.

ഓഗസ്ത് രണ്ടിനാണ് ഷാക്കിർ മൻസൂർ എന്ന സൈനികനെ ഷോപ്പിയാനിലെ റെഷിപോരയിൽനിന്നു കാണാതാവുന്നത്. ഇദ്ദേഹത്തിന്റെ കാർ കത്തിനശിപ്പിച്ച നിലയിൽ കുൽഗാമിൽനിന്നു കണ്ടെത്തിയിരുന്നു. മൂന്ന് സ്ഥലങ്ങളിൽനിന്നു ലഭിച്ച വസ്ത്രങ്ങൾ ഷാക്കിറിന്റേത് തന്നെയാണ് അദ്ദേഹത്തിന്റെ കുടുംബം സ്ഥിരീകരിച്ചു.

സൈനികനെ തീവ്രവാദികൾ തട്ടിക്കൊണ്ടുപോയതാവാമെന്നാണ് സൈന്യത്തിന്റെ സംശയം. എന്നാൽ ഷാക്കിറിനെ തട്ടിക്കൊണ്ടുപോയിട്ടില്ലെന്ന സന്ദേശം തീവ്രവാദികൾ പുറത്തുവിട്ടിട്ടുണ്ടെന്നാണ് വിവരം. ഷാക്കിറിന്റെ തിരോധാനത്തെ സംബന്ധിച്ച് കൂടുതൽ അന്വേഷണം പുരോഗമിക്കുകയാണ്.

Content Highlights: Abducted Territorial Army soldier Shakir Manzoors clothes recovered from Shopian village

Content Highlights: