വിജയുടെ 'ഗില്ലി'യെ വീഴ്ത്തി ബോളിവുഡിൻ്റെ 'തുമ്പാഡ്'; റീറിലീസിൽ പുതുചരിത്രം

റീറിലീസുകളുടെ ഇടയിൽ പുതുചരിത്രമെഴുതി ബോളിവുഡ് ഫാൻ്റസി ഹൊറർ 'തുമ്പാഡ്'. റീറിലീസ് ചെയ്തതിൽ ഇന്ത്യയിൽ നിന്ന് ഏറ്റവുമധികം കളക്ഷൻ നേടിയ ചിത്രമെന്ന ഖ്യാതി 'തുമ്പാഡ്' സ്വന്തമാക്കിയെന്ന് റിപ്പോർട്ടുകൾ. വിജയ് ചിത്രം ​'ഗില്ലി'യുടെ റെക്കോഡാണ് 'തുമ്പാഡ്' തകർത്തത്.   

റീറിലീസ് ചെയ്ത 12-ാം ദിവസമാണ് ചിത്രം റെക്കോഡ് കളക്ഷൻ സ്വന്തമാക്കിയത്. റിപ്പോർട്ടുകൾ പ്രകാരം ഇതുവരെ 24.67 കോടിരൂപയാണ് ചിത്രം നേടിയത്. ഹോളിവുഡ് ചിത്രം 'ടെെറ്റാനിക്' ആയിരുന്നു ​ഗില്ലിക്ക് മുൻപ് റെക്കോഡ് സ്വന്തമാക്കിയിരുന്ന ചിത്രം. 18 കോടി രൂപയായിരുന്നു 'ടെെറ്റാനിക്കി'ൻ്റെ ഇന്ത്യയിലെ കളക്ഷൻ. 13 കോടിരൂപ നേടിയ 'ഷോലെ' ആണ് തൊട്ടുപിന്നിൽ.

ആദ്യം പ്രദർശനത്തിന് എത്തിയപ്പോൾ നേടിയതിലും ഉയർന്ന തുകയാണ് ചിത്രം രണ്ടാംവരവിൽ സ്വന്തമാക്കിയിരിക്കുന്നത്. 2018-ൽ ആദ്യമായി പ്രദർശനത്തിനെത്തിയ ചിത്രം ആറ് വർഷങ്ങൾക്കിപ്പുറം 2024 സെപ്റ്റംബർ 13-നാണ് റീറിലീസ് ചെയ്തത്. 12.5 കോടി രൂപയായിരുന്നു ആദ്യതവണ പ്രദർശനത്തിനെത്തിയപ്പോൾ നേടിയത്. ചിത്രത്തിൻ്റെ രണ്ടാം ഭാ​ഗവും പ്രഖ്യാപിച്ചിട്ടുണ്ട്. ലോകവ്യാപകമായി ചിത്രം റീറിലീസ് ചെയ്യാൻ നിർമാതാക്കൾ ഒരുങ്ങുകയാണ്. 

രാഹി അനിൽ ബാർവെ സംവിധാനം ചെയ്ത ചിത്രം മികച്ച നിരൂപണ പ്രശംസ നേടിയിരുന്നു. സോഹം ഷാ, ജ്യോതി മാൽഷെ തുടങ്ങിയവരാണ് ഈ ഹൊറർ-ഫാൻ്റസി ചിത്രത്തിൽ പ്രധാനവേഷത്തിൽ എത്തിയത്. 

Content Highlights: Tumbbad beats vijay Ghilli to become highest grossing re-release movie in India