തൃഷയുടെ രാഷ്ട്രീയ പ്രവേശം വീണ്ടും ചർച്ചകളിൽ; അഭ്യൂഹങ്ങൾക്ക് തിരികൊളുത്തി മധുരയിൽ പോസ്റ്ററുകൾ

തമിഴ് നടി തൃഷ രാഷ്ട്രീയത്തിലേക്കെന്ന അഭ്യൂഹങ്ങൾ വീണ്ടും സജീവം. മധുരയിൽ നടിയുടെ ആരാധക സംഘടനയുടെ പേരിൽ ഉയർന്ന പോസ്റ്ററുകളാണ് ഇത്തവണ അഭ്യൂഹങ്ങൾക്ക് കാരണമായത്. പുതുതായി രൂപവത്കരിച്ച 'തൃഷ വെൽഫെയർ അസോസിയേഷൻ' എന്ന സംഘടനയുടെ പേരിലാണ് നടിയെ പരോക്ഷമായി രാഷ്ട്രീയത്തിലേക്ക് ക്ഷണിച്ചുകൊണ്ടുള്ള പോസ്റ്ററുകൾ നഗരത്തിലുടനീളം പ്രത്യക്ഷപ്പെട്ടത്.

'എല്ലാ രാഷ്ട്രീയ പാർട്ടികൾക്കും വേരുകളുള്ള മണ്ണാണ് മധുര' എന്ന പോസ്റ്ററുകളിലെ വാക്കുകളാണ് അഭ്യൂഹങ്ങൾക്ക് കാരണമായത്. തമിഴ്നാട് സർക്കാരിന്റെ അംഗീകാരം ലഭിച്ച ആദ്യ സംഘടനയാണ് തങ്ങളുടേതെന്നും പോസ്റ്ററുകളിൽ അവകാശപ്പെടുന്നുണ്ട്.

എന്നാൽ തൃഷയുടെ അറിവോടെയോ സമ്മതത്തോടെയോ ആണോ സംഘടന പ്രവർത്തിക്കുന്നത് എന്നതിൽ സ്ഥിരീകരണമില്ല. 53/2026 എന്ന രജിസ്‌ട്രേഷൻ നമ്പറോടെയാണ് പോസ്റ്ററുകൾ. ഭാരവാഹികളുടെ പേരുകളോ സ്ഥാനങ്ങളോ പോസ്റ്ററിൽ വ്യക്തമാക്കുന്നില്ല. എന്നാൽ, സംഘടനാ ഭാരവാഹികൾ എന്ന് കരുതപ്പെടുന്ന വെള്ളക്കുപ്പായമണിഞ്ഞ ഒൻപതു യുവാക്കളുടെ ചിത്രങ്ങൾ പോസ്റ്ററുകളിലുണ്ട്.

തൃഷ രാഷ്ട്രീയത്തിലിറങ്ങുമെന്ന് നേരത്തെ പലതവണ അഭ്യൂഹമുയർന്നിരുന്നു. രണ്ട് മണ്ഡലങ്ങളിൽ വിജയിച്ചതിനെത്തുടർന്ന് തമിഴ്‌നാട് മുഖ്യമന്ത്രി സി. ജോസഫ് വിജയ് രാജിവെച്ച തിരുച്ചിറപ്പള്ളി ഈസ്റ്റിൽ തൃഷ മത്സരിച്ചേക്കുമെന്നായിരുന്നു ഒരു അഭ്യൂഹം. വിജയ്‌യുടെ സത്യപ്രതിജ്ഞാ ചടങ്ങിലെ നടിയുടെ സാന്നിധ്യവും പ്രചാരണങ്ങൾക്ക് ഇടയാക്കി. എന്നാൽ തനിക്ക് ടി.വി.കെയുമായി യാതൊരുവിധ ബന്ധവുമില്ലെന്ന് തൃഷ നേരത്തെ പരസ്യമായി വ്യക്തമാക്കിയിരുന്നു.

അതേസമയം, തൃഷ വെൽഫെയർ അസോസിയേഷൻ എന്ന സംഘടനയെക്കുറിച്ചോ പോസ്റ്ററുകളെക്കുറിച്ചോ തനിക്ക് അറിവില്ലെന്ന് മധുര സൗത്ത് വിജയ് മക്കൾ ഇയക്കം പ്രസിഡന്റും ടി.വി.കെ. എം.എൽ.എയുമായ എസ്.ആർ. തങ്കപാണ്ടി പ്രതികരിച്ചു.

Content Highlights: Fresh rumors regarding actress Trisha's entry into Tamil Nadu politics have surfaced following the appearance of mystery posters in Madurai. The posters were put up under the banner of the newly formed 'Trisha Welfare Association', claiming official Tamil Nadu government recognition with a specific registration number. Neither Trisha nor her official team has issued a statement confirming whether this welfare association operates with her knowledge or approval. Speculation about her political career previously linked her to Vijay's TVK party, though Trisha had publicly denied any political affiliations earlier. TVK leader and MLA S.R. Thankapandi clarified that their party has no connection with the newly formed Trisha Welfare Association or the posters in Madurai.