ചിത്രത്തിലെ നായകൻ, 'ബിഗ് ബാങ്' ഗായകനും; ശ്രീനാഥ് ഭാസിയുടെ ശബ്ദത്തിൽ 'ഒറിജിനലി'ലെ രണ്ടാംഗാനം പുറത്തിറങ്ങി

കൗതുകമുണർത്തുന്ന മലയാളം ടൈം ട്രാവൽ ത്രില്ലർ 'ഒറിജിനലി'ലെ രണ്ടാമത്തെ ഗാനം പുറത്തിറങ്ങി. 'ബിഗ് ബാങ്' എന്ന പേരിൽ പുറത്തിറങ്ങിയ ഗാനം ചിത്രത്തിലെ നായകൻ ശ്രീനാഥ് ഭാസി തന്നെയാണ് പാടിയിരിക്കുന്നത്. മ്യൂസിക് ഡയറക്ടർ ഇലക്ട്രോണിക് കിളിയുടെ വേറിട്ട സംഗീതശൈലിയും ശ്രീനാഥ് ഭാസിയുടെ ശബ്ദവും ഒരുമിക്കുന്ന ഗാനം ചിത്രത്തിലെ നായക കഥാപാത്രമായ റിജിന്റെ രസകരമായ ലോകമാണ് അവതരിപ്പിക്കുന്നത്.

'എ ഡേ ഇൻ റിജിൻസ് ലൈഫ്' എന്ന ടൈറ്റിലോടുകൂടിയാണ് വീഡിയോ ഗാനം ആരംഭിക്കുന്നത്. റിജിന്റെ ഒരു ദിവസത്തെ ജീവിതത്തിലൂടെയാണ് ഗാനം കടന്നുപോകുന്നത്. സ്വന്തം ലോകത്ത് മുഴുകിയുള്ള റിജിന്റെ അലസമായ ജീവിതവും സുഹൃത്തുക്കളുമായുള്ള രസകരമായ നിമിഷങ്ങളും ഗാനത്തിലൂടെ അവതരിപ്പിക്കുന്നു. സുഹൃത്തുക്കളുടെ കളിയാക്കലുകളും തമാശകളും ഉൾപ്പെടെയുള്ള ദൈനംദിന ജീവിതത്തിലെ രസകരമായ മുഹൂർത്തങ്ങൾക്കൊപ്പം റിജിന്റെ സ്വഭാവത്തിലേക്കും വ്യക്തിത്വത്തിലേക്കുമുള്ള കൗതുകകരമായ ഒരു കാഴ്ചകൂടി ഗാനം നൽകുന്നു.

ഇലക്ട്രോണിക് കിളിയാണ് ഗാനത്തിന് സംഗീതം ഒരുക്കിയിരിക്കുന്നത്. മുത്തുവും ജോ ആന്റണിയും ചേർന്നാണ് വരികൾ എഴുതിയിരിക്കുന്നത്. വിജയ് ആനന്ദാണ് മ്യൂസിക് പ്രൊഡ്യൂസർ. ഹാസ്യരംഗങ്ങൾക്കൊപ്പം സഞ്ചരിക്കുന്ന ഗാനത്തിന്റെ സംഗീതാവിഷ്‌കാരവും ശ്രദ്ധേയമാണ്.

വ്യത്യസ്ത സംഗീതശൈലികളെ സമന്വയിപ്പിക്കുന്ന ഇലക്ട്രോണിക് കിളിയുടെ സമീപനം ചിത്രത്തിലും പ്രകടമാണ്. ചിത്രത്തിന്റെ ടീസറും ആദ്യ ഗാനമായ 'മാളേ മല്ലിക്കൊത്തേ'യും പുറത്തിറങ്ങിയതിന് പിന്നാലെയാണ് 'ബിഗ് ബാങ്' പ്രേക്ഷകരിലേക്ക് എത്തുന്നത്. വ്യത്യസ്തമായ ടൈം ട്രാവൽ പ്രമേയവും ശ്രീനാഥ് ഭാസിയുടെ രണ്ട് വ്യത്യസ്ത രൂപങ്ങളുമാണ് ടീസറിലൂടെ പ്രേക്ഷകരിൽ കൗതുകമുണർത്തിയത്. ടൈം ട്രാവൽ, ഫാന്റസി, ഹാസ്യം, ത്രില്ലർ, വൈകാരിക മുഹൂർത്തങ്ങൾ എന്നിവ സമന്വയിപ്പിക്കുന്ന ചിത്രത്തിന്റെ കഥാലോകത്തെ കൂടുതൽ പരിചയപ്പെടുത്തുന്നതാണ് പുതിയ ഗാനം.

മാസ് മീഡിയ, സിക്കു ഫിലിംസ് എന്നീ ബാനറുകളിൽ ഒരുങ്ങുന്ന ചിത്രത്തിന്റെ സഹനിർമാണം ഹർഷദ് വഹിക്കുന്നു. റമീസ് എഴുതി സംവിധാനം ചെയ്യുന്ന ചിത്രത്തിൽ ശ്രീനാഥ് ഭാസിയോടൊപ്പം, അഭിരാം രാധാകൃഷ്ണൻ, രാജേഷ് മാധവൻ, സാഫ് ബോയ്, ബിനു പപ്പു, ഫെമിന ജോർജ്, ശ്രീകാന്ത് വെട്ടിയാർ, ഗോകുലൻ, അനീഷ് ജി, സലീം ഹസൻ, ദിനേശ് പ്രഭാകർ, രാജേഷ് പറവൂർ, ഷമീർ (ചൂരൽ), സുബിൻ ടാർസൻ, അരുൺ പ്രദീപ്, ലാല മലപ്പുറം, സ്റ്റിനി ഫ്രാൻസിസ്, ഹാരിസ് സലീം, വിരു വിവേക് എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു.

ഷഫീഖ് മുഹമ്മദ് അലിയാണ് ചിത്രത്തിന്റെ എഡിറ്റർ. ഫഹദ് ഫത്ലി ഛായാഗ്രഹണം നിർവഹിക്കുന്നു. അർഷാദ് നാക്കോത്ത്, രജീഷ് കെ. സൂര്യ എന്നിവർ ചേർന്നാണ് കലാസംവിധാനം നിർവഹിക്കുന്നത്. മൈൻഡ്‌സ്‌റ്റൈൻ സ്റ്റുഡിയോസാണ് വിഷ്വൽ എഫക്റ്റ്‌സ് ഒരുക്കുന്നത്. അഷ്‌റ മുഹമ്മദ് എക്‌സിക്യൂട്ടീവ് പ്രൊഡ്യൂസറായും കാസ്റ്റിങ് ചുമതലയും നിർവഹിക്കുന്നു.

സച്ചിൻ സുധാകരൻ, ഹരിഹരൻ എം. (സിങ്ക് സിനിമ) എന്നിവർ ചേർന്നാണ് സൗണ്ട് ഡിസൈൻ നിർവഹിക്കുന്നത്. റൊണെക്‌സ് സേവ്യർ മേക്കപ്പും സമീറ സനീഷ് വസ്ത്രാലങ്കാരവും നിർവഹിക്കുന്നു. പി.സി. സ്റ്റണ്ട്‌സ് ആക്ഷൻ കൊറിയോഗ്രഫി നിർവഹിക്കുന്നു. ചിത്രത്തിന്റെ കോൺസെപ്റ്റ് വികസിപ്പിച്ചിരിക്കുന്നത് ജിപിൻ ഗോപിയാണ്.

സ്റ്റോറീസ് സോഷ്യലിന്റെ ബാനറിൽ ഡോ. സംഗീത ജനചന്ദ്രൻ ചിത്രത്തിന്റെ മാർക്കറ്റിങ് ആൻഡ് കമ്മ്യൂണിക്കേഷൻസ് കൈകാര്യം ചെയ്യുന്നു. പ്രദീപ് മേനോൻ ഡിസ്ട്രിബ്യൂഷൻ ഹെഡാണ്. ചിത്രത്തിന്റെ സംഗീതാവകാശം തിങ്ക് മ്യൂസിക് സ്വന്തമാക്കിയിട്ടുണ്ട്. ഹോം സ്‌ക്രീൻ എന്റർടെയ്ൻമെന്റ്‌സാണ് ചിത്രത്തിന്റെ ജി.സി.സി. വിതരണ പങ്കാളി.

Content Highlights: The second song titled 'Big Bang' from the Malayalam time travel thriller 'Original' has been released. Lead actor Sreenath Bhasi sung the track, which introduces his character Rijin's daily life and personality. The music is composed by Electronic Kili with lyrics written by Muthu and Jo Antony. 'Original' is written and directed by Rameez, featuring an ensemble cast including Abhiram Radhakrishnan and Rajesh Madhavan. The music rights for the film have been acquired by Think Music.