1000 കോടി ചിത്രങ്ങൾ നാലെണ്ണം; ഹിറ്റ് ചാർട്ടുകളിൽ വൻമരങ്ങളെ വീഴ്ത്തിയ ബോളിവുഡ് താരം ഇതാണ്

ഒരു കാലത്ത് ബോക്സ് ഓഫീസിൽ 100 കോടി രൂപ നേടുക എന്നത് ഇന്ത്യൻ സിനിമയിലെ വലിയ നേട്ടമായിരുന്നു. ആമിർ ഖാന്റെ 'ഗജിനി' എന്ന ചിത്രത്തിലൂടെയാണ് ഈ 100 കോടി ക്ലബ്ബ് എന്ന ആശയം തന്നെ ആരംഭിച്ചത്. എന്നാൽ, 'ബാഹുബലി 2' ഇന്ത്യൻ ബോക്സ് ഓഫീസ് ചരിത്രത്തിലെ എല്ലാ പതിവുകളും തിരുത്തിക്കുറിച്ചു കൊണ്ട് 1000 കോടി ക്ലബ്ബിന് തുടക്കം കുറിച്ചു. ഇന്ന് ഒട്ടേറെ താരങ്ങൾ ഈ വലിയ ക്ലബ്ബിന്റെ ഭാഗമാണ്. എന്നാൽ, ഒരു നടൻ മാത്രം ഈ പട്ടികയിൽ മറ്റെല്ലാവരെക്കാളും ബഹുദൂരം മുന്നിലാണ്. സ്വന്തമായി 1000 കോടി ക്ലബ്ബിൽ ഇടം പിടിച്ച നാല് ചിത്രങ്ങൾ അദ്ദേഹത്തിന് സ്വന്തമായുണ്ട്.

പ്രഭാസോ, ഷാരൂഖോ, രൺവീർ സിങ്ങോ അല്ല 66-കാരനായ മുതിർന്ന ബോളിവുഡ് നടൻ സഞ്ജയ് ദത്താണത്. ഇന്ത്യൻ സിനിമയിൽ വലിയ കളക്ഷൻ നേടിയ പത്ത് പടങ്ങളിൽ നാലിലും അഭിനയിച്ച ഒരേയൊരു ഇന്ത്യൻ നടനാണ് സഞ്ജയ് ദത്ത്.

ദക്ഷിണേന്ത്യൻ സിനിമകൾ രാജ്യാന്തര തലത്തിൽ ശ്രദ്ധ നേടിത്തുടങ്ങിയതോടെയാണ് സഞ്ജയ് ദത്ത് ഉൾപ്പെടെയുള്ള താരങ്ങൾ തെന്നിന്ത്യൻ ചിത്രങ്ങളിലേക്ക് തിരിഞ്ഞത്. ബോളിവുഡിൽ നായകവേഷങ്ങൾ കുറഞ്ഞ സഞ്ജയ് ദത്ത് അങ്ങനെ ദക്ഷിണേന്ത്യൻ ചിത്രങ്ങളിലെ പ്രിയപ്പെട്ട വില്ലനായി മാറി. കഴിഞ്ഞ ഒരു പതിറ്റാണ്ടിനിടെ വ്യത്യസ്ത ഭാഷകളിലായി വിവിധ ചിത്രങ്ങളിൽ അഭിനയിച്ചാണ് അദ്ദേഹം ഈ നേട്ടം കൈവരിച്ചത്.

'കെ.ജി.എഫ്. ചാപ്റ്റർ 2' എന്ന ചിത്രത്തിലൂടെയാണ് സഞ്ജയ് ആദ്യമായി 1000 കോടി ക്ലബ്ബിൽ ഇടം നേടിയത്. പിന്നീട് ഷാരൂഖ് ഖാൻ നായകനായ 'ജവാൻ' എന്ന ചിത്രത്തിലെ ഒരു കാമിയോ റോളിലൂടെ അദ്ദേഹം ഈ നേട്ടം ആവർത്തിച്ചു. ഇതിനുശേഷം പുറത്തിറങ്ങിയ 'ധുരന്ധർ', 'ധുരന്ധർ 2' എന്നീ രണ്ട് കൂറ്റൻ ഹിറ്റുകളിലെ സുപ്രധാന സഹനടന്റെ വേഷങ്ങളിലൂടെ അദ്ദേഹം 1000 കോടി ക്ലബ്ബിലെ തന്റെ ഒന്നാം സ്ഥാനം ഒന്നുകൂടി അരക്കിട്ടുറപ്പിച്ചു. ഈ നേട്ടത്തോടെ ബോക്സ് ഓഫീസ് ഹിറ്റുകളിൽ ഷാരൂഖ് ഖാൻ, പ്രഭാസ്, രൺവീർ സിങ്, രൺബീർ കപൂർ തുടങ്ങിയ നായകന്മാരെക്കാൾ സഞ്ജയ് ദത്ത് മുന്നിലെത്തി.

ഷാരൂഖ് ഖാൻ, പ്രഭാസ്, രൺവീർ സിങ് എന്നിവർക്ക് രണ്ട് വീതം 1000 കോടി ചിത്രങ്ങളാണുള്ളത്. ആമിർ ഖാൻ, യാഷ്, രാം ചരൺ, ജൂനിയർ എൻ.ടി.ആർ. എന്നിവർക്ക് ഓരോ 1000 കോടി ചിത്രങ്ങളും സ്വന്തമായുണ്ട്. നായികമാരുടെ പട്ടിക പരിശോധിച്ചാൽ മൂന്ന് ചിത്രങ്ങളുമായി (ജവാൻ, പഠാൻ, കൽക്കി 2898 എ.ഡി.) ദീപിക പദുകോൺ ആണ് ഏറ്റവും മുന്നിൽ നിൽക്കുന്നത്.

ടിക്കറ്റ് നിരക്കുകളിലെ വർധനയും ഇന്ത്യൻ സിനിമകൾക്ക് വിദേശ രാജ്യങ്ങളിലുള്ള വർധിച്ചുവരുന്ന ജനപ്രീതിയും കാരണം ഭാവിയിൽ കൂടുതൽ ചിത്രങ്ങൾ ഈ പട്ടികയിലേക്ക് കടന്നുവരുമെന്ന് ഉറപ്പാണ്.

മഹേഷ് ബാബുവും പ്രിയങ്ക ചോപ്രയും അഭിനയിക്കുന്ന എസ്.എസ്. രാജമൗലിയുടെ 'വാരാണസി', രൺബീർ കപൂറും യാഷും പ്രധാന വേഷങ്ങളിലെത്തുന്ന നിതേഷ് തിവാരിയുടെ രണ്ട് 'രാമായണ' സിനിമകൾ എന്നീ ചിത്രങ്ങൾ 1000 കോടി ക്ലബ്ബിൽ ഇടം പിടിക്കുമെന്ന് പ്രതീക്ഷിക്കപ്പെടുന്നു. ഇത് സംഭവിച്ചാൽ രൺബീർ കപൂറും മഹേഷ് ബാബുവും ആദ്യമായി 1000 കോടി ക്ലബ്ബിൽ ഇടം പിടിക്കും. രാമായണയുടെ 1000 കോടി നേട്ടം യാഷിനെ രണ്ടാമതും ആ ക്ലബ്ബിലെത്തിക്കും.

Content Highlights: Sanjay Dutt has surpassed superstars like Shah Rukh Khan and Prabhas by featuring in four films that crossed the ₹1000 crore mark, establishing himself as the most successful actor in India's highest-earning club.