25 ദിവസം പിന്നിട്ട് 'ആരം'; മികച്ച പ്രേക്ഷക പ്രതികരണവുമായി തിയേറ്ററുകളിൽ തുടരുന്നു

സൈജു കുറുപ്പിനെ കേന്ദ്ര കഥാപാത്രമാക്കി രജീഷ് പരമേശ്വരൻ സംവിധാനം ചെയ്ത ക്രൈം ത്രില്ലർ ചിത്രം 'ആരം' തിയേറ്ററുകളിൽ 25 ദിവസം പൂർത്തിയാക്കി. മികച്ച പ്രേക്ഷക പ്രതികരണത്തോടെ പ്രദർശനം തുടരുന്ന ചിത്രത്തിന്റെ സക്‌സസ് ടീസറും പുറത്തിറങ്ങി. തിയേറ്ററുകളിൽ നിന്നുള്ള പ്രതികരണങ്ങളും ചിത്രത്തിന്റെ വിജയവും അടയാളപ്പെടുത്തുന്നതാണ് ടീസർ.

വ്യത്യസ്തമായ അന്വേഷണ കഥയും അപ്രതീക്ഷിത വഴിത്തിരിവുകളും സൈജു കുറുപ്പിന്റെ പ്രകടനവുമാണ് ചിത്രത്തിന്റെ പ്രധാന ആകർഷണങ്ങളായി പ്രേക്ഷകർ ചൂണ്ടിക്കാട്ടുന്നത്. ഒരു മരണത്തെ ചുറ്റിപ്പറ്റി നടക്കുന്ന അന്വേഷണമാണ് 'ആര'ത്തിന്റെ പ്രമേയം. അന്വേഷണം മുന്നോട്ട് പോകുന്നതിനനുസരിച്ച് അരങ്ങേറുന്ന സംഭവവികാസങ്ങളും ട്വിസ്റ്റുകളുമാണ് ചിത്രത്തെ മുന്നോട്ടുനയിക്കുന്നത്. പോലീസ് ഉദ്യോഗസ്ഥന്റെ വേഷത്തിലെത്തുന്ന സൈജു കുറുപ്പിനും മികച്ച പ്രതികരണമാണ് ലഭിക്കുന്നത്.

ഗുഡ് ഹോപ് പ്രൊഡക്ഷൻ ആൻഡ് ഡിസ്ട്രിബ്യൂഷന്റെ ബാനറിൽ ഡോ. ജുനൈസ് ബാബു ഗുഡ് ഹോപ്പും ഡോ. അബ്ദുൽ ഹമീദ് ഗുഡ് ഹോപ്പും ചേർന്നാണ് ചിത്രം നിർമ്മിച്ചത്. റോവാൻ എന്റർടെയ്ൻമെന്റ്‌സും ഗുഡ് ഫെല്ലാസും ചേർന്നാണ് ചിത്രം തിയേറ്ററുകളിലെത്തിച്ചത്. അസ്‌കർ അലി, സിദ്ധിഖ്, അഞ്ജു കുര്യൻ, സുധീഷ്, മനോജ് കെ.യു, ഷഹീൻ സിദ്ദിഖ് എന്നിവരും പ്രധാന വേഷങ്ങളിലെത്തുന്നു.

വിഷ്ണു രാമചന്ദ്രൻ തിരക്കഥ ഒരുക്കിയ ചിത്രത്തിന്റെ ഛായാഗ്രഹണം ജിത്തു ദാമോദറും എഡിറ്റിങ് വി. സാജനും സംഗീതം രോഹിത് ഗോപാലകൃഷ്ണനും നിർവഹിച്ചിരിക്കുന്നു. തിയേറ്റർ റിലീസിന് മുൻപ് തന്നെ ചിത്രത്തിന്റെ ഡിജിറ്റൽ അവകാശം സോണി ലിവ് സ്വന്തമാക്കിയിരുന്നു. തിയേറ്റർ പ്രദർശനം പൂർത്തിയായ ശേഷമായിരിക്കും ചിത്രം സോണി ലിവിലൂടെ സ്ട്രീമിംഗിനെത്തുക.

ഡിജിറ്റൽ: ജാങ്കോ സ്‌പേസ്, മാർക്കറ്റിങ് ആൻഡ് അഡ്വർടൈസിങ്: ബ്രിങ്‌ഫോർത്ത്, പി.ആർ.ഒ: ഐശ്വര്യ രാജ്.

Content Highlights: crime thriller film 'Aaram', starring Saiju Kurup and directed by Rajeesh Parameswaran, completed 25 successful days in theatres. A success teaser highlighting the positive audience response and theatre reactions was released by the makers. Plot revolves around an investigation into a mysterious death, featuring Saiju Kurup in the role of a police officer. Produced by Dr. Junais Babu Good Hope and Dr. Abdul Hameed Good Hope under the banner of Good Hope Production and Distribution. Digital streaming rights for 'Aaram' have been acquired by SonyLIV, where it will stream after its theatrical run.