പ്രതീക്ഷയേറ്റി ഫസ്റ്റ്‌ലുക്ക്; മോഹൻലാലിന്റെ 368-ാം ചിത്രത്തിന് തുടക്കമായി; സംവിധാനം അനൂപ് സത്യൻ
മലയാള സിനിമയിൽ മറ്റൊരു ശ്രദ്ധേയ കൂട്ടുകെട്ടിന് തുടക്കമാകുന്നു. മോഹൻലാലിനെ നായകനാക്കി സത്യൻ അന്തിക്കാടിന്റെ മകൻ അനൂപ് സത്യൻ സംവിധാനം ചെയ്യുന്ന പുതിയ ചിത്രത്തിന് കൊച്ചിയിൽ പൂജയോടെ തുടക്കമായി. മോഹൻലാലിന്റെ 368-ാമത്തെ ചിത്രമെന്ന പ്രത്യേകതയുള്ള സിനിമയുടെ ഫസ്റ്റ് ലുക്ക് പോസ്റ്ററും പുറത്തുവിട്ടിട്ടുണ്ട്.
ബിനു ജോർജ് അലക്‌സാണ്ടർ പ്രൊഡക്ഷൻസ്, ആശീർവാദ് സിനിമാസ് എന്നീ ബാനറിൽ ഒരുങ്ങുന്ന ചിത്രത്തിന്റെ നിർമാണം നിർവ്വഹിക്കുന്നത് ബിനു ജോർജ് അലക്‌സാണ്ടർ ആണ്. മോഹൻലാലും അനൂപ് സത്യനും ആദ്യമായി ഒന്നിക്കുന്ന സിനിമയെന്ന നിലയിൽ പ്രഖ്യാപന സമയം മുതൽതന്നെ ശ്രദ്ധ നേടിയിരുന്നു.
ചിത്രത്തിന്റെ ഫസ്റ്റ് ലുക്ക് പോസ്റ്റർ പതിവ് താരചിത്രങ്ങളിൽനിന്ന് വ്യത്യസ്തമാണ്. കടലും കായലും പച്ചപ്പും അതിനിടയിലൂടെ നീണ്ടുപോകുന്ന തീരദേശപാതയുമാണ് പോസ്റ്ററിന്റെ പ്രധാന പശ്ചാത്തലം. മുൻഭാഗത്ത് മോഹൻലാലിനൊപ്പം രണ്ട് പെൺകുട്ടികളെയും കാണാം. കുട്ടികൾക്കൊപ്പം സന്തോഷത്തോടെ സമയം ചെലവിടുന്ന മോഹൻലാലും നിറമുള്ള കടലാസ് രൂപങ്ങളും ചിത്രത്തിന് വ്യത്യസ്തമായൊരു ഭാവം നൽകുന്നു.
പോസ്റ്ററിലെ കടലും തീരദേശപാതയും ഒരു യാത്രയുടെ ദൃശ്യാനുഭവം സൃഷ്ടിക്കുമ്പോൾ കുട്ടികളുടെ സാന്നിധ്യം കുടുംബബന്ധങ്ങളുടെയും ബാല്യത്തിന്റെയും നിഷ്‌കളങ്കതയുടെയും സാധ്യതകളിലേക്ക് പ്രേക്ഷകരുടെ ശ്രദ്ധ ക്ഷണിക്കുന്നു. മോഹൻലാലിന്റെ കഥാപാത്രം കുട്ടികളുമായി അടുത്ത ബന്ധം പുലർത്തുന്ന ഒരാളായിരിക്കുമോ? തീരദേശ പശ്ചാത്തലത്തിൽ നടക്കുന്ന കുടുംബകഥയാണോ? അതോ നർമവും വൈകാരികതയും ത്രില്ലറും കലരുന്ന മറ്റൊരു ലോകമാണോ അനൂപ് ഒരുക്കുന്നത്? പോസ്റ്റർ ഇത്തരം ചോദ്യങ്ങൾ ഉയർത്തുന്നുണ്ടെങ്കിലും കഥയുടെ വിശദാംശങ്ങൾ പുറത്തുവന്നിട്ടില്ല.
ചിത്രം ഒരു കോമഡി ആക്ഷൻ ത്രില്ലറായിരിക്കുമെന്നും അതിനുള്ളിൽ വൈകാരികമായൊരു പ്രമേയമുണ്ടാകുമെന്നും അനൂപ് സത്യൻ നേരത്തേ വ്യക്തമാക്കിയിട്ടുണ്ട്. അതുകൊണ്ടുതന്നെ പോസ്റ്ററിലെ ശാന്തവും മനോഹരവുമായ ദൃശ്യലോകത്തിന് പിന്നിൽ മറ്റൊരു സിനിമാനുഭവം ഒളിഞ്ഞിരിക്കുന്നുണ്ടാകുമെന്ന പ്രതീക്ഷയുമുണ്ട്.
അനൂപ് സത്യന്റെ സംവിധാനത്തിലെത്തുന്ന രണ്ടാമത്തെ ചിത്രമാണിത്. 2020-ൽ പുറത്തിറങ്ങിയ 'വരനെ ആവശ്യമുണ്ട്' ആയിരുന്നു അദ്ദേഹത്തിന്റെ ആദ്യ സിനിമ. ദുൽഖർ സൽമാൻ, ശോഭന, സുരേഷ് ഗോപി, കല്യാണി പ്രിയദർശൻ എന്നിവർ പ്രധാന കഥാപാത്രങ്ങളായെത്തിയ ചിത്രം കുടുംബബന്ധങ്ങളും പ്രണയവും നർമവും വൈകാരികതയും ചേർത്തുള്ള അവതരണത്തിലൂടെ ശ്രദ്ധനേടി.
ആദ്യ സിനിമയ്ക്കുശേഷം ആറ് വർഷത്തെ ഇടവേള കഴിഞ്ഞാണ് അനൂപ് പുതിയ ചിത്രവുമായി എത്തുന്നത്. ഇടവേളയ്ക്കുശേഷം മോഹൻലാലിനെപ്പോലൊരു വലിയ താരത്തെ നായകനാക്കി സിനിമ ചെയ്യാൻ തീരുമാനിച്ചതും പ്രേക്ഷകർക്കിടയിൽ കൗതുകമുണ്ടാക്കുന്നു. മോഹൻലാലിനുവേണ്ടി ഏറെക്കാലമായി കാത്തുവച്ചിരുന്ന കഥയാണിതെന്നും തിരക്കഥ കേട്ടപ്പോൾ നടന് ഇഷ്ടപ്പെട്ട വ്യത്യസ്തമായ ഘടകമാണ് സിനിമ വേഗത്തിൽ മുന്നോട്ടുപോകാൻ കാരണമായതെന്നും അനൂപ് നേരത്തേ വെളിപ്പെടുത്തിയിരുന്നു.
ചിത്രത്തിന്റെ സാങ്കേതികസംഘവും ശ്രദ്ധേയമാണ്. 'ഭ്രമയുഗം' ഉൾപ്പെടെയുള്ള ചിത്രങ്ങളിലൂടെ ശ്രദ്ധ നേടിയ ഷെഹ്നാദ് ജലാൽ ഛായാഗ്രഹണം നിർവഹിക്കുന്നു. 'തുടരും' ഉൾപ്പെടെയുള്ള ചിത്രങ്ങളിലൂടെ ശ്രദ്ധേയനായ ജേക്‌സ് ബിജോയ് സംഗീതസംവിധാനം നിർവഹിക്കുന്നു. കൈതപ്രമാണ് ഗാനരചന. പ്രശാന്ത് മാധവ് കലാസംവിധാനവും അനിൽ രാധാകൃഷ്ണൻ ലൊക്കേഷൻ സൗണ്ട്, സൗണ്ട് ഡിസൈൻ വിഭാഗങ്ങളും കൈകാര്യം ചെയ്യുന്നു. സുജിത്ത് സുധാകരനാണ് വസ്ത്രാലങ്കാരം. സ്റ്റണ്ട് സിൽവ ആക്ഷൻ രംഗങ്ങൾ ഒരുക്കുന്നു. ബിജു തോമസാണ് പ്രൊഡക്ഷൻ കൺട്രോളർ. അക്ഷയ് പ്രകാശാണ് പി.ആർ.ഒ.
മോഹൻലാലിനൊപ്പം മുകേഷും ചിത്രത്തിൽ പ്രധാന വേഷത്തിലെത്തുന്നുണ്ട്. ഇരുവരും ഒന്നിച്ച നിരവധി സിനിമകൾ മലയാളികൾക്ക് സമ്മാനിച്ച ഹാസ്യനിമിഷങ്ങൾ ഇന്നും പ്രേക്ഷകരുടെ ഓർമയിലുണ്ട്.
Content Highlights: Mohanlal's 368th film (L368), directed by Anoop Sathyan, officially launched with a puja ceremony in Kochi. First look poster featuring Mohanlal alongside two young children in a coastal backdrop has been revealed. The film is produced by Binu George Alexander Productions in association with Aashirvad Cinemas. Director Anoop Sathyan describes the project as a comedy action thriller rooted in emotional depth. Technical crew includes cinematographer Shehnad Jalal, music director Jakes Bejoy, and lyricist Kaithapram, with actor Mukesh in a key role.