മധു സി. നാരായണനും നസ്‌ലനും ഒന്നിക്കുന്നു; പുതിയ സിനിമയുടെ ചിത്രീകരണം പൂർത്തിയായി

'കുമ്പളങ്ങി നൈറ്റ്‌സ്' എന്ന സൂപ്പർഹിറ്റ് ചിത്രത്തിന് ശേഷം സംവിധായകൻ മധു സി. നാരായണൻ ഒരുക്കുന്ന പുതിയ ചിത്രത്തിന്റെ ചിത്രീകരണം പൂർത്തിയായി. നസ്‌ലൻ നായകനായെത്തുന്ന ചിത്രം, ഡോക്ടർ അനന്തു പ്രൊഡക്ഷൻസിന്റെ ബാനറിൽ ഡോക്ടർ അനന്തുവും സൈലന്റ് കാറ്റ് ഫിലിംസും ചേർന്നാണ് നിർമ്മിക്കുന്നത്. ഈ കഴിഞ്ഞ ജൂലൈ അവസാന വാരമാണ് ചിത്രത്തിന്റെ ഔദ്യോഗിക പ്രഖ്യാപനം നടന്നതും ചിത്രീകരണം ആരംഭിച്ചതും.

നസ്‌ലനൊപ്പം സൗബിൻ ഷാഹിർ, ബേബി ജീൻ, ചന്തു സലിംകുമാർ, പൂർണിമ ഇന്ദ്രജിത്, ഹാനിയ, ഫ്രാങ്കോ, അനൂപ് മോഹൻദാസ്, അലിസ്റ്റർ എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു. വ്യത്യസ്ത തലമുറകളിൽപ്പെട്ട ശ്രദ്ധേയരായ അഭിനേതാക്കൾ ഒന്നിക്കുന്ന സിനിമയുടെ ചിത്രീകരണം പൂർത്തിയായതോടെ ചിത്രത്തിന്റെ ജോലികൾ അടുത്ത ഘട്ടത്തിലേക്ക് കടന്നിരിക്കുകയാണ്.

യുവതാരങ്ങളിൽ ശ്രദ്ധേയനായ നസ്‌ലൻ മധു സി. നാരായണന്റെ സംവിധാനത്തിൽ എത്തുന്നു എന്നത് ചിത്രത്തിന്റെ പ്രധാന ആകർഷണമാണ്. പ്രേക്ഷകർക്ക് പരിചിതമായ കഥാപാത്രങ്ങളിൽ നിന്ന് വ്യത്യസ്തമായൊരു വേഷത്തിലും പുതുമയുള്ളൊരു കഥാപരിസരത്തിലുമാകും താരം എത്തുകയെന്ന പ്രതീക്ഷയിലാണ് ആരാധകർ.

ബേസിൽ ജോസഫിനൊപ്പം ചേർന്ന് നിർമ്മിച്ച സൂപ്പർഹിറ്റ് ചിത്രം 'അതിരടി'ക്ക് ശേഷം നിരവധി ശ്രദ്ധേയമായ പ്രോജക്ടുകളുമായി മുന്നോട്ടുപോകുകയാണ് ഡോക്ടർ അനന്തു പ്രൊഡക്ഷൻസ്. കരിക്ക് ടീം ഒരുക്കുന്ന ഗുഡ് ലക്ക് ചിക്കോ, ഷിഫ്‌ന ബബിൻ പാക്കർ സംവിധാനം ചെയ്യുന്ന '40 ഡേയ്‌സ് ഓഫ് ഹൗസ് പാർട്ടി' എന്നിവയും ഈ നിർമ്മാണ കമ്പനിയുടെ ബാനറിൽ ഒരുങ്ങുന്ന മറ്റ് ചിത്രങ്ങളാണ്. പിആർഒ & മാർക്കറ്റിങ്: വൈശാഖ് സി വടക്കേവീട്, ജിനു അനിൽകുമാർ.

Content Highlights: Director Madhu C Narayanan and actor Naslen team up for a new Malayalam movie., Shooting has been successfully wrapped up after starting in July., Star-studded cast includes Soubin Shahir, Chandu Salimkumar, and Poornima Indrajith., Produced by Dr Ananthu Productions and Silent Cat Films.