മോശം രീതിയിലുള്ള എന്റെ ചിത്രംകണ്ട് ഞെട്ടി, ഇത് വേദനാജനകം; AI ചിത്രം പ്രചരിക്കുന്നതിനെതിരെ കീർത്തി സുരേഷ്

ഒരു വ്യക്തിയുടെ സ്വകാര്യതയിൽ നിർമിതബുദ്ധി ചെലുത്തുന്ന സ്വാധീനത്തേക്കുറിച്ച് ആശങ്ക പ്രകടിപ്പിച്ച് നടി കീർത്തി സുരേഷ്. തൻ്റെ മോർഫ് ചെയ്ത ചിത്രങ്ങൾ സമൂഹമാധ്യമങ്ങളിൽ പ്രചരിക്കുന്നത് കണ്ടെത്തിയതിനെ തുടർന്ന് പ്രതികരിക്കുകയായിരുന്നു അവർ. എഐ സാങ്കേതികവിദ്യ ഉപയോഗിച്ച് തൻ്റെ ഫോട്ടോകൾ മാറ്റം വരുത്തുന്നത് കാണുന്നതിൻ്റെ വൈകാരിക ആഘാതത്തെക്കുറിച്ച് നടി വിവരിച്ചു. ഇത് താരങ്ങൾക്കും പൊതുജനങ്ങൾക്കും ഒരുപോലെ വർധിച്ചുവരുന്ന ഒരു പ്രശ്നമായി മാറിയിരിക്കുന്നുവെന്ന് അവർ പറഞ്ഞു.

ചെന്നൈയിൽ ഒരു വാർത്താസമ്മേളനത്തിൽ സംസാരിക്കുന്നതിനിടെയാണ് തന്റെ വ്യാജ ചിത്രങ്ങൾ പ്രചരിക്കുന്നതിനെക്കുറിച്ച് കീർത്തി സുരേഷ് സംസാരിച്ചത്. എഐ ഒരു വലിയ പ്രശ്നമായി മാറിയിരിക്കുന്നുവെന്ന് അവർ പറഞ്ഞു. അതൊരു അനുഗ്രഹവും ശാപവുമാണ്. മനുഷ്യർ സാങ്കേതികവിദ്യ കണ്ടുപിടിച്ചു, പക്ഷേ നമുക്ക് അതിൻ്റെ നിയന്ത്രണം നഷ്ടപ്പെടുന്നുവെന്നും കീർത്തി അഭിപ്രായപ്പെട്ടു.

"സമൂഹമാധ്യമങ്ങളിൽ, അനുചിതമായ വസ്ത്രം ധരിച്ചുള്ള എൻ്റെ ചിത്രം കാണുമ്പോൾ ഞാൻ ഞെട്ടിപ്പോകാറുണ്ട്. അത് യഥാർത്ഥമാണെന്ന് കാണുന്ന ആർക്കും തോന്നും. ഞാനാണോ അങ്ങനെയൊരു വസ്ത്രം ധരിച്ചതെന്ന് അത്ഭുതപ്പെട്ടുപോവും. അടുത്തിടെ, ഒരു സിനിമയുടെ പൂജയ്ക്ക് ഞാൻ ധരിച്ച വസ്ത്രം മറ്റൊരു ആംഗിളിൽ നിന്ന് മോശമായ രീതിയിൽ മാറ്റം വരുത്തിയിരുന്നു. ഒരു നിമിഷം ഞാൻ സംശയിച്ചുപോയി, പിന്നീടാണ് അത്തരമൊരു രീതിയിൽ ഞാൻ പോസ് ചെയ്തിട്ടില്ലെന്ന് മനസ്സിലായത്. ഇത് തീർച്ചയായും അസ്വസ്ഥതയുണ്ടാക്കുന്നതാണ്. ഇത് തീർച്ചയായും വേദനാജനകമാണ്."

അനുവാദമില്ലാതെ ചിത്രങ്ങൾ ഉപയോഗിക്കപ്പെടുന്നവർക്ക് ഇത്തരം സാങ്കേതികവിദ്യകൾ നിയന്ത്രിക്കാൻ പ്രയാസമാണെന്നും ഇത് വെല്ലുവിളികൾ സൃഷ്ടിക്കുന്നുവെന്നും അവർ ചൂണ്ടിക്കാട്ടി. ഈ പ്രശ്നം സിനിമാ മേഖലയിൽ മാത്രം ഒതുങ്ങുന്നില്ലെന്നും, സമൂഹമാധ്യമങ്ങളും ഡിജിറ്റൽ പ്ലാറ്റ്‌ഫോമുകളും ഉപയോഗിക്കുന്ന ആരെയും ഇത് ബാധിക്കാമെന്നും കീർത്തി സുരേഷ് അഭിപ്രായപ്പെട്ടു.

തമിഴ് ചിത്രം 'റിവോള്‍വര്‍ റിറ്റ'യാണ് കീർത്തിയുടേതായി ഉടൻ വരുന്ന ചിത്രം. ഈ മാസം 28-ന് റിലീസ് ചെയ്യുന്ന ചിത്രം ആക്ഷനും കോമഡിയും നിറഞ്ഞതാണ്. 'ദി ഗ്രേറ്റസ്റ്റ് ഓഫ് ഓള്‍ ടൈം', 'മാനാട്' എന്നീ സിനിമകളുടെ തിരക്കഥ കൈകാര്യം ചെയ്തിട്ടുള്ള ജെ.കെ. ചന്ദ്രുവിന്റെ, സംവിധായകന്‍ എന്ന നിലയിലുള്ള ആദ്യ ചിത്രം കൂടിയാണ് 'റിവോള്‍വര്‍ റിറ്റ'. ചന്ദ്രു തന്നെയാണ് തിരക്കഥ രചിച്ചിരിക്കുന്നത്.

പാഷന്‍ സ്റ്റുഡിയോസ്, ദി റൂട്ട് എന്നീ പ്രൊഡക്ഷനുകളുടെ ബാനറില്‍ സുധന്‍ സുന്ദരം, ജഗദീഷ് പളനിസാമി എന്നിവര്‍ ചേര്‍ന്ന് നിര്‍മിക്കുന്ന 'റിവോള്‍വര്‍ റിറ്റ'യില്‍, കീര്‍ത്തിക്കൊപ്പം രാധിക ശരത്കുമാര്‍, റെഡിന്‍ കിങ്സ്ലി, മൈം ഗോപി, സെന്‍ട്രയന്‍, സൂപ്പര്‍ സുബ്ബരായന്‍ തുടങ്ങിയവരും പ്രധാനവേഷങ്ങളില്‍ അഭിനയിക്കുന്നു. ചിത്രത്തിലെ ഗാനങ്ങള്‍ ഒരുക്കിയിരിക്കുന്നത് സംഗീത സംവിധായകനും ഗായകനും ഗാനരചയിതാവുമായ ഷോണ്‍ റോള്‍ഡന്‍ ആണ്. ദിനേശ് ബി. കൃഷ്ണന്‍ ഛായാഗ്രഹണവും, പ്രവീണ്‍ കെ.എല്‍. എഡിറ്റിങ്ങും കൈകാര്യം ചെയ്യുന്നു.

Content Highlights: Keerthy Suresh voices alarm over AI-generated morphed images impacting privacy. Learn about the growing concerns for celebrities and the public.