'ഹനുമാൻ 2: ദി റൈസ് ഓഫ് വാനരാസ്' പ്രഖ്യാപിച്ച് പ്രൈംഷോ എന്റർടെയ്ൻമെന്റ്; നായകനായി പഞ്ച വൈഷ്ണവ് തേജ്, സംവിധാനം വി.ഐ. ആനന്ദ്

#മൂവീസ് ഡെസ്‌ക്
'ഹനുമാൻ 2' പോസ്റ്റർ
'ഹനുമാൻ 2' പോസ്റ്റർ

'ഹനുമാൻ 2: ദി റൈസ് ഓഫ് വാനരാസ്' ഔദ്യോഗികമായി പ്രഖ്യാപിച്ച് പ്രൈംഷോ എന്റർടെയ്ൻമെന്റ്. ഇന്ത്യൻ സിനിമയിലെ വമ്പൻ വിജയങ്ങളിലൊന്നായി മാറിയ 'ഹനുമാൻ' ചിത്രത്തിന്റെ രണ്ടാംഭാഗവുമായാണ് പ്രൈം ഷോ എന്റർടെയ്ൻമെന്റ് എത്തുന്നത്. യുവതാരം പഞ്ച വൈഷ്ണവ് തേജാണ് ചിത്രത്തിൽ നായകനായെത്തുന്നത്. ഫാന്റസിക്കും മിത്തോളജിക്കും ഭാവനയ്ക്കും പ്രാധാന്യം നൽകി ബിഗ് ബജറ്റിൽ ഒരുങ്ങുന്ന സിനിമ സംവിധാനം ചെയ്യുന്നത് വി.ഐ. ആനന്ദാണ്. കെ. നിരഞ്ജൻ റെഡ്ഡിയും ചൈതന്യ റെഡ്ഡിയും ചേർന്നാണ് പ്രൈംഷോ എന്റർടെയ്ൻമെന്റിന്റെ ബാനറിൽ ചിത്രം നിർമിക്കുന്നത്.

'ഹനുമാൻ' എന്ന ചിത്രത്തിലൂടെ പ്രേക്ഷകർക്ക് മുന്നിൽ അവതരിപ്പിച്ച ഫാന്റസി ലോകത്തിന് പുതിയൊരു അധ്യായം തുറക്കുകയാണ് 'ഹനുമാൻ 2: ദി റൈസ് ഓഫ് വാനരാസ്'. ചിത്രത്തിന്റെ ടൈറ്റിൽ പ്രഖ്യാപനത്തോടൊപ്പം പുറത്തിറക്കിയ പോസ്റ്ററും ഏറെ ശ്രദ്ധേയമാണ്. മേഘങ്ങൾക്കിടയിലൂടെ ഉയർന്നുപോകുന്ന ഒരാളെയും അതിനുചുറ്റും പ്രത്യക്ഷപ്പെടുന്ന ഭീമാകാരമായ ദിവ്യവാലും അതീന്ദ്രിയമായ ദൈവിക സാന്നിധ്യവും ഉൾക്കൊള്ളുന്ന ദൃശ്യമാണ് പോസ്റ്ററിലുള്ളത്. ചിത്രത്തിന്റെ മിസ്റ്റിക് ഫാന്റസി ലോകത്തിലേക്കുള്ള കൗതുകമുണർത്തുന്ന സൂചനയാണ് പോസ്റ്റർ നൽകുന്നത്. ചിത്രത്തിന്റെ പ്രമേയത്തെയും കഥാപാത്രങ്ങളെയും കുറിച്ച് കൂടുതൽ അറിയാനുള്ള ആകാംക്ഷയും ടൈറ്റിൽ പ്രഖ്യാപനം സൃഷ്ടിച്ചിട്ടുണ്ട്.

ഫാന്റസിയും ഭാവനാത്മകമായ കഥപറച്ചിലും വ്യത്യസ്തമായ രീതിയിൽ അവതരിപ്പിക്കുന്ന സംവിധായകൻ വി.ഐ. ആനന്ദിന്റെ സാന്നിധ്യമാണ് ചിത്രത്തിന്റെ മറ്റൊരു പ്രധാന സവിശേഷത. യുവതാരം പഞ്ച വൈഷ്ണവ് തേജ് നായകനാകുന്നതോടെ യുവത്വത്തിന്റെ ഊർജവും വലിയ കാൻവാസിലുള്ള ഫാന്റസി ലോകവും ഒന്നിക്കുന്ന ചിത്രമായിരിക്കും ഇത്. മിത്തോളജിയുടെയും ഭാവനയുടെയും അസാധാരണമായ സിനിമാറ്റിക് സാധ്യതകൾ പ്രയോജനപ്പെടുത്തി പ്രേക്ഷകർക്ക് മികച്ച തിയേറ്റർ അനുഭവം സമ്മാനിക്കുകയാണ് അണിയറപ്രവർത്തകരുടെ ലക്ഷ്യം.

'ഹനുമാൻ' എന്ന ബ്ലോക്ക്ബസ്റ്റർ ചിത്രത്തിലൂടെ ഇന്ത്യൻ സിനിമയിൽ ശ്രദ്ധേയമായ നേട്ടം കൈവരിച്ച പ്രൈംഷോ എന്റർടെയ്ൻമെന്റ്, നിലവിൽ മെഗാ സുപ്രീം ഹീറോ സായ് ദുർഗ തേജിനെ നായകനാക്കി 'എസ്.വൈ.ജി'യും കിച്ച സുദീപിനെ നായകനാക്കി 'ബി.ആർ.ബി'യും നിർമിച്ചുവരികയാണ്. കെ. നിരഞ്ജൻ റെഡ്ഡിയും ചൈതന്യ റെഡ്ഡിയും തങ്ങളുടെ ബാനറിന് കീഴിൽ വ്യത്യസ്തവും വലിയ കാൻവാസിലുള്ളതുമായ സിനിമകൾ ഒരുക്കുന്നതിന്റെ തുടർച്ചയായാണ് പുതിയ ഫാന്റസി ചിത്രം പ്രഖ്യാപിച്ചിരിക്കുന്നത്. 'ഹനുമാൻ' നേടിയ വൻവിജയത്തിന് ശേഷം അതേ ഫാന്റസി പ്രപഞ്ചത്തെ പുതിയൊരു തലത്തിലേക്ക് എത്തിക്കാനുള്ള ശ്രമം കൂടിയാണ് 'ഹനുമാൻ 2: ദി റൈസ് ഓഫ് വാനരാസ്'.

ആകർഷകമായ ടൈറ്റിലും പുതിയ നായകതാരവും വ്യത്യസ്തമായ സംവിധായക കാഴ്ചപ്പാടും ഒത്തുചേരുന്ന ചിത്രം പ്രൈംഷോ എന്റർടെയ്ൻമെന്റിന്റെ വരാനിരിക്കുന്ന പ്രധാന സിനിമാ സംരംഭങ്ങളിലൊന്നായി മാറുകയാണ്. ചിത്രത്തിലെ മറ്റ് താരങ്ങൾ, സാങ്കേതിക പ്രവർത്തകർ, ചിത്രീകരണം ഉൾപ്പെടെയുള്ള കൂടുതൽ വിവരങ്ങൾ വൈകാതെ പുറത്തുവിടും.

രചന, സംവിധാനം: വി.ഐ. ആനന്ദ്, നിർമാതാക്കൾ: കെ. നിരഞ്ജൻ റെഡ്ഡി, ചൈതന്യ റെഡ്ഡി, നിർമാണം: പ്രൈംഷോ എന്റർടെയ്ൻമെന്റ്, മാർക്കറ്റിങ്: ഹാഷ്ടാഗ് മീഡിയ, പി.ആർ.ഒ: ശബരി.

Content Highlights: Primeshow Entertainment officially announced HanuMan 2: The Rise of Vanaras, the sequel to the blockbuster film HanuMan. Young actor Panja Vaisshnav Tej plays the lead role in the big-budget fantasy mythology project. Written and directed by VI Anand, the film is produced by K Niranjan Reddy and Chaitanya Reddy. The announcement was accompanied by a striking title poster hinting at a mystical fantasy world. Additional cast, crew, and filming details will be revealed by the makers soon.