ഞാൻ ആദ്യം പാടിയ പാട്ടിലെ നടൻ, എന്‍റെ പല പ്രശസ്ത ഗാനങ്ങൾ ശ്രീനിവാസൻ സിനിമയിലേത് - ജി.വേണുഗോപാൽ

നടൻ ശ്രീനിവാസന്റെ വേർപാടിൽ അനുശോചനം രേഖപ്പെടുത്തി ഗായകൻ ജി. വേണുഗോപാൽ. താൻ ആദ്യം പാടിയ പാട്ടിൽ അഭിനയിച്ച നടൻ എന്ന് ഓർത്തെടുത്താണ് വേണുഗോപാൽ ഫെയ്സിബുക്ക് പോസ്റ്റ് പങ്കുവെച്ചത്. 

ഫെയ്സ്ബുക്ക് പോസ്റ്റിൻ്റെ പൂർണരൂപം; 

മലയാളത്തിൽ ഹാസ്യനടനായ് വന്ന് തിരക്കഥാകൃത്തും സംവിധായകനുമൊക്കെയായ് തിളങ്ങിയ ബഹുമുഖപ്രതിഭ.

ഞാൻ ആദ്യമായ് ഒരു മലയാള സിനിമയ്ക്ക് പാട്ട് പാടിയപ്പോൾ ആ ഗാനരംഗം സിനിമയിൽ അഭിനയിച്ചതും ശ്രീനിയേട്ടനായിരുന്നു. (ഓടരുതമ്മാവാ ആളറിയാം) പിൽക്കാലത്ത് എൻ്റെ പ്രശസ്തമായ പല സിനിമാ ഗാനങ്ങളുൾപ്പെടുന്ന സിനിമകളുടേയും തിരക്കഥയും ശ്രീനിയേട്ടൻ്റെതായിരുന്നു. ആ കുടുംബത്തിലെ രണ്ടാം തലമുറയുമായുള്ള ബന്ധവും ദൃഢമാണ്. എൻ്റെ മകൻ അരവിന്ദ് , വിനീത് ശ്രീനിവാസൻ്റെ "ഹൃദയം " എന്ന സിനിമയുടെ സംവിധാന സഹായിയും അതിലെ സൂപ്പർ ഹിറ്റായ "നഗുമോ" എന്ന പാട്ടിൻ്റെ പിന്നണി ശബ്ദവുമായി ശ്രദ്ധിക്കപ്പെട്ടു.

ശ്രീനിവാസൻ സിനിമകളും, തിരക്കഥകളും, ശ്രീനിയുടെ നർമ്മവും ഭാവിയിൽ മലയാള സിനിമാ ഗവേഷണ വിദ്യാർത്ഥികളുടെ വിഷയമായ് മാറുന്ന കാലം വിദൂരമല്ല.

Content Highlights: Singer G. Venugopal pays tribute to actor Sreenivasan, recalling his debut song`s on-screen presence and their shared cinematic journey.