അപാര നർത്തകർ ഒരേ ഫ്രെയിമിൽ, മഞ്ജുളികയ്ക്കായുള്ള കാത്തിരിപ്പ് അധികം വൈകില്ല; വരുന്നൂ ഭൂൽ ഭൂലയ്യ 3

പ്രേക്ഷകർ ഇരുകയ്യുംനീട്ടി സ്വീകരിച്ച സിനിമാ പരമ്പരയാണ് ഭൂൽ ഭൂലയ്യ. ചിത്രത്തിന്റെ മൂന്നാം ഭാ​ഗം റിലീസിനെത്തുന്നതിന് മുന്നോടിയായുള്ള അവസാനവട്ട മിനുക്കുപണികളിലാണ്. ഇപ്പോഴിതാ ഭൂൽ ഭൂലയ്യ സിനിമകളിലെ ഹൈലൈറ്റ് എന്ന് വിശേഷിപ്പിക്കാവുന്ന അമി ജേ തൊമാർ എന്ന ​ഗാനത്തിന്റെ പുത്തൻ പതിപ്പിന്റെ വീഡിയോ പുറത്തിറങ്ങിയിരിക്കുകയാണ്.

അമി ജേ തൊമാർ 3.0 എന്നാണ് അണിയറപ്രവർത്തകർ ​ഗാനത്തെ വിശേഷിപ്പിച്ചിരിക്കുന്നത്. ചിത്രത്തിൽ മുഖ്യവേഷങ്ങളിലെത്തുന്ന മാധുരി ദീക്ഷിത്തും വിദ്യാബാലനുമാണ് ​ഗാനരം​ഗത്തിൽ. ഇരുവരുടേയും മത്സരിച്ചുള്ള നൃത്തപ്രകടനമാണ് ​ഗാനത്തിനെ ആകർഷകമാക്കുന്നത്. ഭൂൽ ഭൂലയ്യ ആദ്യഭാ​ഗത്തിലെ മഞ്ജുളിക എന്ന കഥാപാത്രം വീണ്ടും എത്തുന്നു എന്നുള്ളതാണ് ഭൂൽ ഭൂലയ്യ 3-യുടെ ഏറ്റവും വലിയ പ്രത്യേകത.

ശ്രേയാ ഘോഷാലാണ് ​ഗാനം ആലപിച്ചിരിക്കുന്നത്. സമീരിന്റെ വരികൾക്ക് അമാൽ മാലിക് ഈണം പകർന്നിരിക്കുന്നു. ചിന്നി പ്രകാശാണ് നൃത്ത സംവിധാനം. ചിത്രത്തിന്റെ രണ്ടാം ഭാ​ഗം ഒരുക്കിയ അനീസ് ബസ്മിതന്നെയാണ് മൂന്നാം ഭാ​ഗവും ഒരുക്കുന്നത്. 

കാർത്തിക് ആര്യനാണ് നായകവേഷത്തിൽ. രണ്ടാം ഭാ​ഗത്തിൽ അവതരിപ്പിച്ച റൂഹ് ബാബ എന്ന കഥാപാത്രത്തെ അദ്ദേഹം വീണ്ടും അവതരിപ്പിക്കുന്നു. ത്രിപ്തി ദിമ്രിയാണ് മറ്റൊരു സുപ്രധാനവേഷത്തിലെത്തുന്നത്. ദീപാവലിയോടനുബന്ധിച്ച് നവംബർ ഒന്നിന് ചിത്രം തിയേറ്ററുകളിലെത്തും. 

Content Highlights: song from Bhool Bhulaiyaa 3, `Ami Je Tomar 3.0`, featuring Madhuri Dixit and Vidya Balan, is out now