ടെർമിനേറ്ററിൽ കാണിച്ച എ.ഐ ലോകം യാഥാർത്ഥ്യമായിരിക്കുന്നു -അർനോൾഡ്
നിർമിത ബുദ്ധിയെക്കുറിച്ചുള്ള ചർച്ചകൾ പൊടിപൊടിക്കുന്ന സമയമാണിത്. എ.ഐ മനുഷ്യർക്ക് ഗുണമോ ദോഷമോ എന്ന രീതിയിലാണ് ചർച്ചകൾ പുരോഗമിക്കുന്നത്. സിനിമകളിൽ പ്രത്യേകിച്ച് ഹോളിവുഡിൽ സയൻസ് ഫിക്ഷൻ ചിത്രങ്ങൾക്ക് യാതൊരു പഞ്ഞവുമില്ല. അതിൽത്തന്നെ മികച്ച ചിത്രങ്ങളെടുത്താൽ മുന്നിലുണ്ടാവും അർനോൾഡ് ഷ്വാസ്നഗർ നായകനായ ടെർമിനേറ്റർ പരമ്പര. നിർമിതബുദ്ധിയേക്കുറിച്ച് ഉയർന്നുകൊണ്ടിരിക്കുന്ന വാദപ്രതിവാദങ്ങളിൽ തന്റെ അഭിപ്രായം പറഞ്ഞിരിക്കുകയാണ് അർനോൾഡ്.
ലോസ് ഏഞ്ചൽസിൽ നടന്ന ആൻ ഈവനിങ് വിത്ത് അർനോൾഡ് ഷ്വാസ്നഗർ എന്ന പരിപാടിയിലാണ് നിർമിത ബുദ്ധിയേക്കുറിച്ചും ടെർമിനേറ്റർ എന്ന ചിത്രത്തേക്കുറിച്ചും സൂപ്പർതാരം സംസാരിച്ചത്. ടെർമിനേറ്റർ എന്ന സിനിമയിൽ കാണിച്ച എ.ഐ ലോകം യാഥാർത്ഥ്യമായിരിക്കുകയാണെന്ന് അർനോൾഡ് അഭിപ്രായപ്പെട്ടു. ഇതെങ്ങോട്ടാണ് പോകുന്നതെന്നാലോചിച്ച് എല്ലാവരും ഭയപ്പെട്ടിരിക്കുകയാണ്. യന്ത്രങ്ങൾ സ്വയം നിയന്ത്രിക്കുകയും മറ്റുള്ളവയുടെ നിയന്ത്രണം ഏറ്റെടുക്കുന്നതും ടെർമിനേറ്ററിൽ നമ്മൾ സംസാരിച്ചതാണെന്നും അർനോൾഡ് കൂട്ടിച്ചേർത്തു.
ചടങ്ങിൽ ടെർമിനേറ്ററിന്റെ സംവിധായകനായ ജെയിംസ് കാമറൂണിന്റെ ദീർഘവീക്ഷണത്തെ അർനോൾഡ് പ്രശംസിച്ചു. ലോകത്തെ ഒന്നാം നമ്പർ സംവിധായകനാണ് കാമറൂണെന്ന് അർനോൾഡ് പറഞ്ഞു. "സിനിമ ഇറങ്ങിയിട്ട് പതിറ്റാണ്ടുകളായെങ്കിലും ഇപ്പോളത് യാഥാർത്ഥ്യമായിരിക്കുകയാണ്. അതിനാൽ ഇത് ഇനി ഫാന്റസിയല്ല. അത് ഇന്ന് ഇവിടെയുണ്ട്. ജെയിംസ് കാമറൂൺ അസാധാരണനായ എഴുത്തുകാരനും അവിശ്വസനീയമാംവിധം എന്നുപറയാവുന്ന സംവിധായകനുമാണ്. ടെർമിനേറ്റർ എന്ന കഥാപാത്രത്തെ അവതരിപ്പിച്ച ക്രെഡിറ്റ് മാത്രമേ ഞാനെടുക്കൂ. ജെയിംസ് കാമറൂൺ ആണ് അതെഴുതിയത്. അതുകൊണ്ടാണ് അദ്ദേഹം ലോകത്തെ ഒന്നാം നമ്പർ സംവിധായകനായിരിക്കുന്നത്." അർനോൾഡ് വ്യക്തമാക്കി.
1984-ലാണ് ടെർമിനേറ്റർ പരമ്പരയിലെ ആദ്യചിത്രം പുറത്തുവന്നത്. സാറാ കോണർ എന്ന നായികയെ വകവരുത്താൻ ഭാവിയിൽ നിന്നെത്തുന്ന സൈബോർഗിന്റെ വേഷമായിരുന്നു അർനോൾഡ് ഈ ചിത്രത്തിൽ അവതരിപ്പിച്ചത്. ലിൻഡാ ഹാമിൽട്ടൺ ആണ് സാറയായെത്തിയത്. 1991-ൽ ഈ ചിത്രത്തിന്റെ രണ്ടാം ഭാഗമായ ജഡ്ജ്മെന്റ് ഡേ എത്തി. 2003-ൽ റൈസ് ഓഫ് ദ മെഷീൻസ്, 2009-ൽ ടെർമിനേറ്റർ സാൽവേഷൻ, 2015-ൽ ടെർമിനേറ്റർ ജെനിസിസ്, 2019-ൽ ഡാർക് ഫെയ്റ്റ് എന്നീ ചിത്രങ്ങളും ഈ പരമ്പരയിൽ പുറത്തിറങ്ങി.
Content Highlights: arnold schwarzenegger about ai, terminator movie; james cameron