ബാംഗ്ലൂർ ഡേയ്സ് ഹിന്ദിയിലേക്ക്, പ്രിയാ വാര്യരും അനശ്വരാ രാജനും നായികമാർ

അഞ്ജലി മേനോന്റെ സംവിധാനത്തിൽ 2014-ൽ പുറത്തിറങ്ങി തരം​ഗമായ ചിത്രമാണ് ബാം​ഗ്ലൂർ ഡേയ്സ്. ദുൽഖർ സൽമാൻ, ഫഹദ് ഫാസിൽ, നിവിൻ പോളി, നസ്രിയ, നിത്യാ മേനോൻ, പാർവതി എന്നിവർ മുഖ്യവേഷങ്ങളിലെത്തിയ ചിത്രം തമിഴ്, തെലുങ്ക് ഭാഷകളിലേക്കും റീമേക്ക് ചെയ്യപ്പെട്ടിരുന്നു. സിനിമയ്ക്ക് ഹിന്ദി പതിപ്പ് വരുന്നു എന്നതാണ് പുറത്തുവരുന്ന പുതിയ വാർത്ത.

ബോളിവുഡിലെ സൂപ്പർ ഹിറ്റ് ചിത്രം യാരിയാന്റെ രണ്ടാം ഭാ​ഗമായാണ് ബാം​ഗ്ലൂർ ഡേയ്സിന്റെ ഹിന്ദി പതിപ്പ് എത്തുക. യാരിയാൻ 2 എന്നാണ് ചിത്രത്തിന് നൽകിയിരിക്കുന്ന പേര്. സിനിമയുടെ ടൈറ്റിൽ പോസ്റ്റർ അണിയറപ്രവർത്തകർ പുറത്തുവിട്ടു. മലയാളത്തിലെ യുവനായികമാരായ പ്രിയാ വാര്യരും അനശ്വര രാജനുമാണ് ചിത്രത്തിൽ നായികമാരായെത്തുന്നത് എന്നതും ശ്രദ്ധേയമാണ്. ദിവ്യ ഖോസ്‌ല കുമാർ, മീസാൻ ജാഫ്രി, പേൾ വി. പുരി, യാഷ് ദാസ് ഗുപ്ത, വാരിന ഹുസൈൻ എന്നിവരും താരനിരയിലുണ്ട്.

യാരിയാൻ ആദ്യഭാ​ഗം സംവിധാനം ചെയ്ത ദിവ്യ കുമാർ ഖോസ്‌ലയാണ് രണ്ടാം ഭാ​ഗവും ഒരുക്കുന്നത്. ടി സീരീസ് നിർമിക്കുന്ന ചിത്രം മെയ് 12, 2023–ന് തിയറ്ററുകളിൽ എത്തും. 2016-ലാണ് ബാം​ഗ്ലൂർ ഡേയ്സിന്റെ തമിഴ്, തെലുങ്ക് റീമേക്ക് തിയേറ്ററുകളിലെത്തിയത്. ഇരുഭാഷകളിലും ഒരേസമയം ചിത്രീകരിച്ച് തിയേറ്ററുകളിലെത്തിയ ചിത്രമായിരുന്നു ഇത്. ബാം​ഗ്ലൂർ നാട്കൾ എന്നായിരുന്നു തമിഴ് ചിത്രത്തിന്റെ പേര്. റാണാ ദ​ഗ്​ഗുഭട്ടി, ആര്യ, ബോബി സിംഹ, ശ്രീദിവ്യ എന്നിവരായിരുന്നു മുഖ്യവേഷങ്ങളിൽ. ബൊമ്മരിലു ഭാസ്കറായിരുന്നു സംവിധാനം.

Content Highlights: anaswara rajan and priya varrier in bangalore days hindi remake, yaariyan 2