ദീപാവലിക്ക് പ്രണയത്തിന്റെ മധുരവുമായി 'ചങ്ക് കട്ടോളെ'; 'മെനി മെനി ഹാപ്പി റിട്ടേൺസി'ലെ രണ്ടാമത്തെ ഗാനം പുറത്തിറങ്ങി

അഹമ്മദ് കബീർ സംവിധാനം ചെയ്യുന്ന ഏറ്റവും പുതിയ ചിത്രം 'മെനി മെനി ഹാപ്പി റിട്ടേൺസി'ലെ രണ്ടാമത്തെ ഗാനമായ 'ചങ്ക് കട്ടോളെ' പുറത്തിറങ്ങി. പ്രണയത്തിന്റെ മനോഹരമായ ഭാവങ്ങളും ഹൃദ്യമായ ഈണവും ചേർന്നൊരുക്കിയ ഗാനം മികച്ചൊരു ഫീൽ ഗുഡ് സംഗീതാനുഭവമാണ് പ്രേക്ഷകർക്ക് സമ്മാനിക്കുന്നത്.

ഗോവിന്ദ് വസന്തയാണ് ചിത്രത്തിന് സംഗീതം പകർന്നിരിക്കുന്നത്. മനോഹരമായ ഈണത്തിന് വരികൾ ഒരുക്കിയിരിക്കുന്നത് വിനായക് ശശികുമാറാണ്. ഗോവിന്ദ് വസന്തയും ലൈക ജമാലും ചേർന്നാണ് ഗാനം ആലപിച്ചിരിക്കുന്നത്.

തൈക്കുടം ബ്രിഡ്ജിലൂടെയും '96', 'സോളോ', 'മെയ്യഴകൻ' തുടങ്ങിയ ചിത്രങ്ങളിലൂടെയും സംഗീതലോകത്ത് തന്റേതായ വ്യക്തിമുദ്ര പതിപ്പിച്ച ഗോവിന്ദ് വസന്തയുടെ സംഗീതം ഗാനത്തിന് വേറിട്ടൊരു ഭംഗി പകരുന്നു. പ്രണയാർദ്രമായ വരികളും ഹൃദ്യമായ സംഗീതവും ഒത്തുചേരുന്ന 'ചങ്ക് കട്ടോളെ' ഇതിനോടകം ശ്രദ്ധ നേടുകയാണ്.

'ജൂൺ', 'മധുരം' എന്നീ സിനിമകൾക്കും 'കേരള ക്രൈം ഫയൽസ്' എന്ന ഹിറ്റ് പരമ്പരയ്ക്കും ശേഷമാണ് അഹമ്മദ് കബീർ ചിത്രം ഒരുക്കുന്നത്. ഒരിടവേളയ്ക്ക് ശേഷം കാളിദാസ് ജയറാം മലയാളത്തിൽ നായകനായി തിരിച്ചെത്തുന്ന ചിത്രം, നൊസ്റ്റാൾജിയ ഉണർത്തുന്ന റോം-കോം ചിത്രമായാണ് അണിയറയിലൊരുങ്ങുന്നത്. പുതുമുഖമായ ലക്ഷ്മി ജ്യോതിഷാണ് ചിത്രത്തിൽ നായികയായി എത്തുന്നത്. കാളിദാസിന്റെ അച്ഛൻ കഥാപാത്രമായി ലാൽ ശ്രദ്ധേയ വേഷം കൈകാര്യം ചെയ്യുന്നു.

മങ്കി ബിസിനസിന്റെ ബാനറിൽ ഹസ്സൻ റഷീദും അഹമ്മദ് കബീറും ചേർന്നാണ് ചിത്രം നിർമിച്ചിരിക്കുന്നത്. 'മെനി മെനി ഹാപ്പി റിട്ടേൺസി'ന്റെ വിതരണാവകാശം സ്വന്തമാക്കിയിരിക്കുന്നത് പ്രമുഖ നിർമാണ കമ്പനിയായ ഭാവന സ്റ്റുഡിയോസാണ്. 'ആട്ടം' എന്ന സിനിമയിലൂടെ മികച്ച എഡിറ്റിങ്ങിനുള്ള ദേശീയ പുരസ്‌കാരം നേടിയ മഹേഷ് ഭുവനേന്ദാണ് ചിത്രസംയോജനം നിർവഹിക്കുന്നത്. അഹമ്മദ് കബീർ ചിത്രങ്ങളുടെ പ്രധാന സവിശേഷതയായ ദൃശ്യമനോഹരമായ ഫ്രെയിമുകൾ സമ്മാനിച്ച ജിതിൻ സ്റ്റാനിസ്ലാവസ് തന്നെയാണ് 'മെനി മെനി ഹാപ്പി റിട്ടേൺസി'നും ഛായാഗ്രഹണം നിർവഹിക്കുന്നത്.

കോ- പ്രൊഡ്യൂസേഴ്‌സ്: പൗലോസ് തേപ്പാല, വിനീത കോശി, ഓഡിയോഗ്രാഫി: വിഷ്ണു ഗോവിന്ദ്, പ്രൊഡക്ഷൻ ഡിസൈനർ: ശരത് കുമാർ കെ.വി, പ്രൊഡക്ഷൻ കൺട്രോളർ: ഷാഫി ചെമ്മാട്, കോസ്റ്റ്യൂം: മഷർ ഹംസ, മേക്കപ്പ്: റോണക്‌സ് സേവ്യർ, ഗാനരചന: വിനായക് ശശികുമാർ, കളറിസ്റ്റ്: ശ്രീക് വാര്യർ, വി.എഫ്.എക്‌സ്: ഡിജിബ്രിക്സ്, സ്റ്റിൽസ്: അർജുൻ തോമസ്, പബ്ലിസിറ്റി ഡിസൈൻ: റോസ്റ്റഡ് പെപ്പർ, വിഷ്വൽ പ്രൊമോഷൻസ്: സ്നേക്ക്പ്ലാന്റ് എൽ.എൽ.പി, പി.ആർ.ഒ: അപർണ ഗിരീഷ്.

Content Highlights: The second song titled 'Chunk Kattole' from Ahmed Kabir's upcoming film 'Many Many Happy Returns' has been released. Composed by Govind Vasantha with lyrics by Vinayak Sasikumar, the romantic track is sung by Govind Vasantha and Laika Jamal. The film marks Kalidas Jayaram's return as a lead actor in Malayalam alongside newcomer Lakshmi Jyothish and veteran actor Lal. Produced by Hassan Rasheed and Ahmed Kabir under Monkey Business, the distribution rights are bagged by Bhavana Studios. The movie features technical work by National Award-winning editor Mahesh Bhuvanend and cinematographer Jithin Stanislaus.