ഇടിവ് തുടരുന്നു: വെള്ളിയാഴ്ച മാത്രം നിക്ഷേപകർക്ക് നഷ്ടം അഞ്ചുലക്ഷം കോടി, കാരണങ്ങൾ അറിയാം

ഓഹരിവിപണിയിൽ ഇടിവ് തുടരുന്നു. വെള്ളിയാഴ്ചത്തെ വ്യാപാരത്തിനിടെ സെൻസെക്‌സ് 700 പോയിന്റ് താഴ്ന്നു. നിഫ്റ്റിയാകട്ടെ ഒരു ശതമാനത്തോളം ഇടിവ് നേരിടുകയും ചെയ്തു. ഇതോടെ ബി.എസ്.ഇ.യിൽ ലിസ്റ്റ് ചെയ്ത കമ്പനികളുടെ മൊത്തം മൂല്യം 478 ലക്ഷം കോടി രൂപയായി കുറഞ്ഞു. ഒറ്റദിവസം കൊണ്ട് അഞ്ചുലക്ഷം കോടി രൂപയുടെ നഷ്ടമാണ് നിക്ഷേപകർക്കുണ്ടായത്. പശ്ചിമേഷ്യയിലെ സംഘർഷം, ക്രൂഡ് ഓയിൽ വിലക്കയറ്റം, യു.എസ്. കടപ്പത്ര ആദായത്തിലെ വർധന എന്നിവയാണ് വിപണിയെ ബാധിച്ചത്. വിപണിയിലെ അസ്ഥിരതാ സൂചികയായ ഇന്ത്യ വിക്‌സ് ആറു ശതമാനത്തിലധികം ഉയരുകയും ചെയ്തു.

എല്ലാ സെക്ടറൽ സൂചികകളും നഷ്ടത്തിലായി.

• നിഫ്റ്റി റിയൽറ്റി: 3.5 ശതമാനത്തിലധികം ഇടിവ് രേഖപ്പെടുത്തി.
• നിഫ്റ്റി മെറ്റൽ: മൂന്നു ശതമാനം ഇടിഞ്ഞു.
• നിഫ്റ്റി ഓട്ടോ, ഫിനാൻഷ്യൽ സർവീസസ്: രണ്ടു ശതമാനം വരെ താഴേക്ക് പോയി.
• പ്രധാന ഓഹരികൾ: എം&എം, ബജാജ് ഫിനാൻസ്, ഇൻഡിഗോ, ടാറ്റ സ്റ്റീൽ തുടങ്ങിയ ഓഹരികൾ രണ്ട് ശതമാനത്തോളം ഇടിവ് നേരിട്ടു. ഐടി മേഖലയിൽ ടെക് മഹീന്ദ്ര, ഇൻഫോസിസ് എന്നിവ നേരിയ നേട്ടമുണ്ടാക്കി.

തകർച്ചയുടെ പ്രധാന കാരണങ്ങൾ

ഇറാൻ-യുഎസ് സംഘർഷം

ഇറാൻ അനുകൂലികളായ ഹൂതികൾ യെമനിലെ മോച്ച (Mocha) തുറമുഖം പിടിച്ചെടുത്തതോടെ പശ്ചിമേഷ്യയിൽ സംഘർഷം രൂക്ഷമായി. ഇറാന്റെ യുറേനിയം സമ്പുഷ്ടീകരണ കേന്ദ്രത്തിന് സമീപമുള്ള പിക്ആക്‌സ് മൗണ്ടൻ ആക്രമിക്കുമെന്ന് യുഎസ് പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകിയത് യുദ്ധം നീണ്ടുനിൽക്കുമെന്ന ഭീതി പരത്തി.

അസംസ്‌കൃത എണ്ണവില

സംഘർഷം രൂക്ഷമായതോടെ വിതരണ തടസ്സം ഭയന്ന് എണ്ണവില കുതിച്ചു. ബ്രെന്റ് ക്രൂഡ് ബാരലിന് 108 ഡോളറിന് മുകളിലെത്തി. ഡബ്ല്യുടിഐ ക്രൂഡ് മെയ് മാസത്തിന് ശേഷം ആദ്യമായി 100 ഡോളർ കടന്നു. ഇന്ത്യയെപ്പോലുള്ള ഇറക്കുമതിയെ കൂടുതൽ ആശ്രയിക്കുന്ന രാജ്യങ്ങളുടെ സാമ്പത്തിക അടിത്തറയെ ഇത് ബാധിക്കുമെന്ന് നിക്ഷേപകർ ഭയപ്പെടുന്നു.

കടപ്പത്ര ആദായ വർധന

യുഎസ് 10-വർഷ ട്രഷറി ആദായം 4.97 ശതമാനമായി ഉയർന്നു. 2023-ന് ശേഷമുള്ള ഏറ്റവും ഉയർന്ന നിലവാരമാണിത്. ഇന്ത്യയിലെ 10-വർഷ ബോണ്ട് യീൽഡും ഏഴ് ശതമാനത്തിന് മുകളിലെത്തി. ഓഹരി വിപണിയിൽ നിന്നുള്ള പണം ബോണ്ട് വിപണിയിലേക്ക് പോകാൻ ഇതിടയാക്കും.

രൂപയുടെ മൂല്യത്തകർച്ച

യുഎസ് ഡോളറിനെതിരെ രൂപയുടെ മൂല്യം 27 പൈസ താഴ്ന്ന് 95.79 എന്ന നിലവാരത്തിലെത്തി. അസംസ്‌കൃത എണ്ണവില വർധനയും ഡോളറിന്റെ കരുത്തുമാണ് രൂപയ്ക്ക് തിരിച്ചടിയായത്. റിസർവ് ബാങ്ക് വിപണിയിൽ ഇടപെട്ടത് കൂടുതൽ തകർച്ച തടയാൻ സഹായിച്ചതായി റിപ്പോർട്ടുകൾ സൂചിപ്പിക്കുന്നു.

ഐപിഒ വിപണിയിലെ തിരക്ക്

രാജ്യത്തെ പ്രാഥമിക വിപണിയിലുണ്ടായ കുതിച്ചുചാട്ടം സെക്കൻഡറി മാർക്കറ്റിൽ പണലഭ്യത കുറയാൻ കാരണമായി. എട്ട് പ്രധാന ഐപിഒകൾ ഒരേസമയം വരുന്നത് നിക്ഷേപകരുടെ പണം വിപണിയിൽ പോകാനിടയാക്കുമെന്ന് വിദഗ്ദ്ധർ അഭിപ്രായപ്പെടുന്നു.

വിദേശ വില്പന

വിദേശ നിക്ഷേപകർ (FII) ഓഹരികൾ വിറ്റഴിക്കുന്നത് തുടരുന്നത് വിപണിയിലെ ആത്മവിശ്വാസം കുറയ്ക്കുന്നു. വെള്ളിയാഴ്ച മാത്രം 438 കോടി രൂപയുടെ ഓഹരികളാണ് വിദേശ നിക്ഷേപകർ വിറ്റഴിച്ചത്. സെപ്റ്റംബറിലെ എട്ട് വ്യാപാര സെഷനുകളിൽ അഞ്ചിലും ഇവർ അറ്റ വിൽപനക്കാരായിരുന്നു.

Content Highlights: Sensex dropped 700 points and Nifty fell nearly 1% in a single day., BSE listed companies lost Rs 5 lakh crore in market capitalization., Key triggers include Middle East conflict, rising crude oil prices above $108, and surging US bond yields., Foreign Institutional Investors (FIIs) sold shares worth Rs 438 crore.