ടാറ്റ തർക്കം: വ്യവസായ പ്രമുഖരുടെ മൗനത്തെ വിമർശിച്ച് രാഹുൽ ഗാന്ധി

ടാറ്റ ഗ്രൂപ്പിലെ ആഭ്യന്തര തർക്കങ്ങളിൽ വ്യവസായ പ്രമുഖരുടെ മൗനത്തെ രൂക്ഷമായി വിമർശിച്ച് ലോക്‌സഭാ പ്രതിപക്ഷനേതാവ് രാഹുൽ ഗാന്ധി. ടാറ്റ ഗ്രൂപ്പിനെ കുറ്റകരമായി നശിപ്പിക്കുകയാണെന്ന് ആരോപിച്ച അദ്ദേഹം, വിഷയത്തിൽ പ്രധാനമന്ത്രി നരേന്ദ്ര മോദിക്കും കേന്ദ്ര ആഭ്യന്തരമന്ത്രി അമിത് ഷായ്ക്കുമെതിരെയും വിമർശനം ഉന്നയിച്ചു. ടാറ്റ ഗ്രൂപ്പിലെ ആഭ്യന്തര ഭിന്നതകൾ രൂക്ഷമായി തുടരുന്നതിനിടയിലാണ് പ്രതിപക്ഷനേതാവിന്റെ പ്രതികരണം.

കോർപ്പറേറ്റ് നിയന്ത്രണങ്ങളെ ചൊല്ലി പ്രതിപക്ഷവും കേന്ദ്ര ഭരണകൂടവും തമ്മിൽ നിലനിൽക്കുന്ന ഭിന്നത വ്യക്തമാക്കുന്നതാണ് രാഹുൽ ഗാന്ധിയുടെ നിലപാട്. ബുധനാഴ്ച എക്സ് (X) പ്ലാറ്റ്‌ഫോമിലൂടെയാണ് അദ്ദേഹം തന്റെ അഭിപ്രായം വ്യക്തമാക്കിയത്. വ്യവസായ ലോകത്തിന്റെ മൗനം ഭീരുത്വമാണെന്ന് വിശേഷിപ്പിച്ച രാഹുൽ, ടാറ്റ ഗ്രൂപ്പ് കുറ്റകരമായി നശിപ്പിക്കപ്പെടുമ്പോൾ ഒരു വ്യവസായ പ്രമുഖനും മിണ്ടാൻ ധൈര്യപ്പെടുന്നില്ലെന്ന് കുറ്റപ്പെടുത്തി.

ഇന്ത്യൻ ബിസിനസ്സ് മേഖല മോദിയുടെയും ഷായുടെയും കളിപ്പാട്ടമല്ലെന്നും, നടന്നുകൊണ്ടിരിക്കുന്ന കുറ്റകരമായ നടപടികൾക്കെതിരെ നീതി ഉറപ്പാക്കാൻ പ്രതിപക്ഷം മുന്നിലുണ്ടാകുമെന്നും അദ്ദേഹം വ്യക്തമാക്കി. ടാറ്റ ഗ്രൂപ്പിന്റെ ബോർഡ് മുറിക്കുള്ളിൽ ഉടലെടുത്ത അഭിപ്രായവ്യത്യാസങ്ങളുടെയും ആരോപണങ്ങളുടെയും പശ്ചാത്തലത്തിലാണ് രാഹുൽ ഗാന്ധിയുടെ ഈ പ്രസ്താവന.

രാഹുൽ ഗാന്ധിയുടെ ആരോപണങ്ങളോട് ബി.ജെ.പി. നേതാക്കൾ ഇതുവരെ പ്രതികരിച്ചിട്ടില്ല. അതേസമയം, ടാറ്റയിലെ വിഷയത്തിൽ അഭിപ്രായപ്രകടനവുമായി എൻ.സി.പി. (എസ്.പി.) അധ്യക്ഷൻ ശരദ് പവാർ രംഗത്തെത്തിയിട്ടുണ്ട്. സാമൂഹിക പ്രതിബദ്ധതയ്ക്കും ജീവകാരുണ്യ പ്രവർത്തനങ്ങൾക്കും പ്രാധാന്യം നൽകുന്ന ഉടമസ്ഥാവകാശ മാതൃകയെ പിന്തുണയ്ക്കുന്ന നിലപാടാണ് പവാർ സ്വീകരിച്ചത്. ജംഷെഡ്ജി ടാറ്റയും കുടുംബവും മൂല്യാധിഷ്ഠിത സാമൂഹിക സേവനത്തിന് വലിയ സംഭാവന നൽകിയിട്ടുണ്ടെന്നും, അതിനാൽ ടാറ്റ ട്രസ്റ്റിന്റെ സാമൂഹിക പ്രതിബദ്ധത സംരക്ഷിക്കപ്പെടണമെന്നും അദ്ദേഹം കൂട്ടിച്ചേർത്തു.

Content Highlights: Rahul Gandhi criticized the silence of industry leaders regarding the Tata Group internal crisis., He accused Prime Minister Narendra Modi and Home Minister Amit Shah over corporate control issues., Sharad Pawar supported the philanthropic ownership model of the Tata Trust., BJP leaders have not yet responded to Rahul Gandhi's allegations.